តើអ្វីនៅពីក្រោយដំណើរទស្សនកិច្ចរបស់បុរសខ្លាំងរដ្ឋចិន ទៅកាន់កូរ៉េខាងជើង?

 សារព័ត៌មាន BBC បានចុះផ្សាយថា ដំណើរទស្សនកិច្ចរយៈពេលពីរថ្ងៃរបស់ប្រធានាធិបតីចិន លោក ស៊ី ជីនពីង ទៅកាន់ទីក្រុងព្យុងយ៉ាងនៅពេលនេះ មានអត្ថន័យជ្រាលជ្រៅជាងរូបភាពមិត្តភាពធម្មតា។ សម្រាប់ទីក្រុងប៉េកាំង កូរ៉េខាងជើងជាអ្នកជិតខាងយុទ្ធសាស្ត្រ ដែលមិនអាចមើលរំលងបានឡើយ។ វត្តមានរបស់លោក ស៊ី នៅកូរ៉េខាងជើងនៅពេលនេះ មិនត្រឹមតែជាការបង្ហាញឥទ្ធិពលលើដៃគូយុទ្ធសាស្ត្ររបស់ខ្លួននោះទេ ប៉ុន្តែក៏ជាការបង្ហាញក្ដីបារម្ភចំពោះទំនាក់ទំនង ដែលកំពុងល្អូកល្អើនខ្លាំងរវាងព្យុងយ៉ាង និងម៉ូស្គូ ព្រមទាំងការប្រុងប្រយ័ត្នខ្ពស់ចំពោះគោលនយោបាយអនុត្តរភាពរបស់សហរដ្ឋអាមេរិកនៅឧបទ្វីបកូរ៉េផងដែរ។
អ្នកវិភាគមើលឃើញថា ចិនចង់បានស្ថិរភាពតាមព្រំដែន និងរក្សាឥទ្ធិពលរបស់ខ្លួនលើកូរ៉េខាងជើង ប៉ុន្តែក៏រារែកចិត្តចំពោះវិបត្តិ ដែលបង្កឡើងដោយមហិច្ឆតានុយក្លេអ៊ែរបស់ទីក្រុងព្យុងយ៉ាង។ ហេតុនេះ ដំណើរទស្សនកិច្ចសប្តាហ៍នេះ គឺផ្ដោតសំខាន់លើការរឹតបន្តឹងឥទ្ធិពល។
ប្រភពការទូតលោកខាងលិចបានប្រាប់សារព័ត៌មាន BBC ថា ចិនកំពុងព្រួយបារម្ភកាន់តែខ្លាំងឡើងអំពីភាពជិតស្និទ្ធរវាងកូរ៉េខាងជើង និងរុស្ស៊ី។ បន្ទាប់ពីបានជួបពិភាក្សាជាមួយប្រធានាធិបតីរុស្ស៊ីលោក វ្ល៉ាឌីមៀ ពូទីន កាលពីសប្តាហ៍មុន លោក ស៊ី ប្រហែលជាចង់ធានាថា មេដឹកនាំកូរ៉េខាងជើងលោក គីម ជុងអ៊ុន នៅតែស្ថិតក្នុងរង្វង់ឥទ្ធិពលរបស់ចិន ដ្បិតទីក្រុងប៉េកាំងកំពុងបង្កើនវត្តមានរបស់ខ្លួននៅលើឆាកអន្តរជាតិ។
គួរបញ្ជាក់ថា ចាប់តាំងពីការឈ្លានពានរបស់រុស្ស៊ីលើអ៊ុយក្រែនមក កូរ៉េខាងជើងបានពង្រីកកិច្ចសហប្រតិបត្តិការយោធាជាមួយរុស្ស៊ីរហូតដល់កម្រិតកំពូល ដោយបានចុះកតិកាសញ្ញាការពារជាតិទៅវិញទៅមកក្នុងអំឡុងពេលដំណើរទស្សនកិច្ចរបស់លោក ពូទីន ទៅកាន់ទីក្រុងព្យុងយ៉ាង កាលពីឆ្នាំ២០២៤។
លោក អានគិត ផេនដា (Ankit Panda) អ្នកជំនាញគោលនយោបាយនុយក្លេអ៊ែបានអះអាងថា ទំនាក់ទំនងរុស្ស៊ី-កូរ៉េខាងជើង មិនត្រឹមតែធ្វើឱ្យអាមេរិកភ្ញាក់ផ្អើលនោះទេ សូម្បីតែចិនក៏មិនសូវរីករាយដែរ ព្រោះទីក្រុងប៉េកាំងមិនចង់ឃើញរុស្ស៊ីមានឥទ្ធិពលលេចធ្លោជាងខ្លួននៅក្នុងទីក្រុងព្យុងយ៉ាងឡើយ៕

ដោយៈ សរ សុជាតិ