ដូចដែលយើងដឹងហើយថា ចិនបានបោះទុនវិនិយោគធំជាងគេនៅក្នុងប្រទេសកម្ពុជា ពិសេសទៅលើវិស័យសំណង់និងអចលនទ្រព្យ គឺជាផ្នែកដ៏សំខាន់ដែលវិនិយោគិនចិនបោះទុនវិនិយោគក្នុងទឹកប្រាក់រាប់ពាន់លានដុល្លារ។
ដូច្នេះ តើរដ្ឋាភិបាលចិនបានចេញវិធានការទប់ស្កាត់លំហូរចេញនូវទ្រព្យធនរបស់វិនិយោគិនចិនមកកាន់បរទេស នឹងធ្វើឲ្យប៉ះពាល់ដល់ទីផ្សារអចលនទ្រព្យកម្ពុជាយ៉ាងណាខ្លះ?
ឆ្លើយតបទៅនឹងបញ្ហានេះ ត្រូវបានក្រុមអ្នកជំនាញអចលនទ្រព្យកម្ពុជាបានអះអាងថា មិនមានអ្វីប៉ះពាល់ដល់ការវិនិយោគរបស់ចិននៅកម្ពុជាទេ។
លោកឧកញ៉ា ចេង ខេង អគ្គនាយកក្រុមហ៊ុនអចលនទ្រព្យ ស៊ីភីអិល ជាក្រុមហ៊ុនមានបទពិសោធន៍២០ឆ្នាំនៅក្នុងទីផ្សារអចលនទ្រព្យកម្ពុជា បានបញ្ជាក់អះអាងប្រាប់សារព័ត៌មានអេឡិចត្រូនិក ខេមបូណូមីស ថា ការរឹតបន្តឹងរបស់រដ្ឋាភិបាលចិនដែលមិនឲ្យយកលុយចេញវិនិយោគក្រៅប្រទេសច្រើន រួមទាំងមានការត្រួតពិនិត្យច្បាស់លាស់ មិនធ្វើឲ្យប៉ះពាល់ដល់ការវិនិយោគនៅក្នុងគម្រោងសាងសង់របស់ចិននៅកម្ពុជានោះទេ ។
លោកឧកញ៉ា ចេង ខេង អគ្គនាយកក្រុមហ៊ុនអចលនទ្រព្យ ស៊ីភីអិល។
(cambonomist.com)
ហេតុអ្វីបានជាថាមិនប៉ះពាល់យ៉ាងដូច្នេះ?
ប្រធានក្រុមប្រឹក្សាភិបាលសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកឧកញ៉ា ចេង ខេង បានបកស្រាយថា ដោយសារតែប្រទេសចិនមានខេត្តនិងតំបន់ស្វ័យតមួយចំនួន មានការគ្រប់គ្រងដោយឯករាជ្យរបស់ខ្លួន ដូចជា តៃវ៉ាន់ ហុងកុង ដែលជាតំបន់រដ្ឋបាលស្វ័យតនៃប្រទេសចិន ដែលតំបន់និងខេត្តទំាងអស់នោះមានប្រភពហិរញ្ញវត្ថុផ្ទាល់ខ្លួន។
លោកឧកញ៉ា ចេង ខេង បន្តថា តំបន់និងខេត្តឯករាជ្យទំាងនោះ មិនមានការជាប់ពាក់ព័ន្ធនឹងការរឹតត្បិតនិងបំរាមនៃការទប់ស្កាត់ការហូរចេញទ្រព្យធនទៅវិនិយោគក្រៅប្រទេសទេ។ ដូច្នេះគម្រោងសាងសង់សំណង់អគារលំនៅដ្ឋាន ខុនដូរ អគារពាណិជ្ជកម្ម របស់វិនិយោគិនចិននៅកម្ពុជា ភាគច្រើនមកពីចិនតៃវ៉ាន់ ចិនហុងកុង និងខេត្តមួយចំនួនទៀតនៃប្រទេសចិន។
ពាក់ព័ន្ធទៅនឹងការរឹតបន្តឹងការហូរចេញប្រាក់នេះដែរ លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ថា កម្ពុជាមានទំនាក់ទំនងជាមួយចិនយ៉ាងស្អិតរមួត ហើយកម្ពុជាគោរពគោលនយោបាយចិនតែមួយ ដូច្នេះចិនទំនងជាមិនរឹតត្បិតមកលើប្រទេសកម្ពុជានោះទេ។
លោក គីម ហ៊ាង ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា។
(cambonomist.com)
អត្ថបទដទៃទៀតដែលទាក់ទងនឹងវិនិយោគចិននៅកម្ពុជា
លោក គីម ហ៊ាង ដែលជាអគ្គនាយកក្រុមហ៊ុនខ្មែររៀលអេស្ទេត ដែរនោះ បានមើលឃើញថា មិនមានអ្វីប៉ះពាល់ជាដុំកំភួននោះឡើយ ប៉ុន្តែ អ្វីដែលប៉ះពាល់ធំជាងគេ គឺចិនកំពុងសម្លឹងរឹតត្បិតការហូរចេញទ្រព្យធនក្នុងការវិនិយោគវិស័យអចលនទ្រព្យ គឺ អាមេរិក អឺរ៉ុប។ ដូច្នេះការបង្វិលសាច់ប្រាក់របស់វិនិយោគចិនទៅអាមេរិក និង អឺរ៉ុប នឹងមានការលំបាក។
លោកបានបញ្ជាក់ថា ពិតណាស់ថា ចិនជាផ្នែកមួយដ៏សំខាន់ក្នុងការជួយអភិវឌ្ឍវិស័យសំណង់ និងជំរុញទីផ្សារអចលនទ្រព្យកម្ពុជា ប៉ុន្តែ បើសិនជាការរឹតត្បិតនេះប៉ះពាល់ខ្លាំងដល់កម្ពុជាមែន ក៏កម្ពុជាមានវិនិយោគិនមកពីប្រទេសជាច្រើន មកវិនិយោគនៅទីនេះដែរ។
ក្រុមអ្នកជំនាញសេដ្ឋកិច្ចបានមើលឃើញថា កម្ពុជាមិនមែនពឹងផ្អែកតែលើវិនិយោគមកពីប្រទេសចិនតែមួយនោះទេ កម្ពុជាត្រូវធ្វើការកៀងគរអ្នកវិនិយោគមកពីប្រទេសផ្សេងៗជាច្រើនទៀត។
ក្រុមអ្នកវិភាគទាំងនោះ បានបញ្ជាក់ថា «បើទោះបីជាគ្មានវត្តមានចិន ឬសកម្មភាពអន់ថយរបស់ចិននៅក្នុងវិស័យសំណង់ និងអចលនទ្រព្យ ក៏មិនមែនជាហេតុផលធ្វើឲ្យទីផ្សារអចលនទ្រព្យកម្ពុជា ជាប់គាំងមិនដំណើរការនោះដែរ»។
វិស័យសំណង់នៅកម្ពុជាជាម៉ាស៊ីនរុញច្រានកំណើនសេដ្ឋកិច្ចកម្ពុជាដ៏សំខាន់មួយ។
(រូបភាព៖ ហេង ភារម្យ)
សូមជម្រាបថា ថ្មីៗនេះរដ្ឋាភិបាលចិនបានចេញវិធានការទប់ស្កាត់លំហូរមូលធនរបស់អ្នកវិនិយោគចិន ដែលវិនិយោគនៅក្រៅប្រទេស។ ដោយរដ្ឋាភិបាលបានស្នើឲ្យក្រុមហ៊ុនវិនិយោគដែលមានគម្រោងវិនិយោគទៅបរទេស ធ្វើការបញ្ជាក់ពីប្រភពទឹកប្រាក់សម្រាប់វិនិយោគនិងផ្តល់ព័ត៌មានបន្ថែមរាល់ការចំណាយផ្សេងៗ។
អ្នកដែលរំលោភបំពាននឹងត្រូវដាក់ចូលក្នុងបញ្ជីត្រួតពិនិត្យរបស់រដ្ឋាភិបាល ត្រូវហាមឃាត់មិនឲ្យប្រើប្រាស់រូបិយប័ណ្ណបរទេសរយៈពេល៣ឆ្នាំ និងត្រូវជាប់ក្នុងការស៊ើបអង្កេតទាក់ទិននឹងការលាងលុយ ។
គួររំឭកដែរថា គិតចាប់តំាងពីឆ្នាំ១៩៩៤ រហូតមកដល់ពេលបច្ចុប្បន្ន គណៈកម្មាធិការវិនិយោគកម្ពុជា បានកត់ត្រាតួលេខវិនិយោគមកពីប្រទេសចិនក្នុងគម្រោងទឹកប្រាក់ប្រមាណជាង ១៤ពាន់លានដុល្លារអាមេរិក ឈរក្នុងចំណាត់ថ្នាក់លេខ២ ខណៈដែលការវិនិយោគរបស់ក្រុមហ៊ុនជប៉ុន និងក្រុមហ៊ុនមកពីប្រទេសកូរ៉េ ស្ថិតក្នុងលំដាប់ថ្នាក់លេខ៣ និងលេខ៤ ជាបន្តបន្ទាប់។ ប៉ុន្តែ បើគិតតែការវិនិយោគពីបរទេស គឺការវិនិយោគរបស់ចិនទទួលបានចំណាត់ថ្នាក់លេខ១។ នេះបើយោងតាមរបាយការណ៍ពីក្រុមប្រឹក្សាអភិវឌ្ឍន៍កម្ពុជា៕
