វ៉ាក់សាំង AstraZeneca ផលិតនៅឥណ្ឌា ដឹកមកដល់កម្ពុជាហើយ នៅយប់ថ្ងៃទី២ មីនា ២០២១

វ៉ាក់សាំងកូវីដ-១៩ របស់​ក្រុមហ៊ុន AstraZeneca ដែលផលិតនៅប្រទេសឥណ្ឌា ចំនួន ៣២៤,០០០ដូស បានដឹក​និង​ប្រគល់​ដល់​ប្រទេស​កម្ពុជា​ហើយ កាលពី​យប់ថ្ងៃទី០២ ខែមីនា ឆ្នាំ២០២១ ។ វ៉ាក់សាំង AstraZeneca ទាំងនេះ ជាជំនួយ​ពី​មជ្ឈមណ្ឌល​កូវ៉ាក់ (COVAX Facility) ដែល​ជា​យន្តការបែងចែក​វ៉ាក់សាំង​សកល ក្រោម​ការ​ដឹកនាំដោយ​អង្គការ GAVI, CEPI, និង​អង្គការ​សុខភាព​ពិភពលោក (WHO) ក្នុង​ភាព​ជាដៃគូ​ជាមួយ​នឹង​អង្គការ យូនីសេហ្វ (UNICEF) ។ រដ្ឋមន្ត្រី​ក្រសួង​សុខាភិបាល​កម្ពុជា លោក ម៉ម ប៊ុនហេង អញ្ជើញ​ចូលរួម​ក្នុង​ពិធី​ប្រគល់-ទទួល នៅ​ព្រលាន​យន្តហោះ​អន្តរជាតិ​ភ្នំពេញ ដោយ​មាន​ការប្រគល់​ពី​សំណាក់​លោកស្រី​វេជ្ជបណ្ឌិត លី អាយលែន (Mrs. Dr. Li Ailan) តំណាងអង្គការ​សុខភាព​ពិភពលោក​ប្រចាំ​កម្ពុជា និង​លោកស្រី Ms. Foroogh Foyouzat តំណាង​អង្គការ​យូនីសេហ្វ ប្រចាំ​កម្ពុជា ៕