#វិបត្តិ​ថាមពល​

វិបត្តិថាមពលសកល ដែលបានកើតឡើងនៅតាមបណ្តាប្រទេសទាំងតូចទាំងធំ រួមទាំងចិន សហរដ្ឋអាមេរិក និងអឺរ៉ុបជាដើម កំពុងធ្វើឲ្យមេដឹកនាំរដ្ឋនីមួយៗឈឺក្បាលវិលមុខខ្លាំងមែនទែនក្នុងការដោះស្រាយបញ្ហានេះ ខណៈតម្រូវការប្រើប្រាស់មានខ្ពស់ ឯតម្លៃវិញក៏ហក់ឡើងខ្លាំង។ ក្នុងនោះ បើយើងមើលទៅលើតំបន់អឺរ៉ុប មេដឹកនាំទាំង ២៧ប្រទេសនៅសប្តាហ៍នេះ បានណាត់គ្នាមកអង្គុយចុះ ពិភាក្សារកដំណោះស្រាយ ធ្វើយ៉ាងណាឲ្យតម្លៃថាមពលធ្លាក់ថ្លៃមកវិញ ក្រោយពីតម្លៃថាមពលគ្រប់មុខ រួមមាន ប្រេងសាំង អគ្គិសនី និងហ្គាស នៅតំបន់អឺរ៉ុប បានបន្តហក់ឡើងព្រមៗគ្នា។