យើងសង្កេតឃើញថា ការដាច់ចរន្តអគ្គិសនីតែងតែកើតមានជាញឹកញាប់ សម្រាប់ការប្រើប្រាស់ប្រចាំថ្ងៃរបស់ប្រជាពលរដ្ឋ និងក្នុងដំណើរការអាជីវកម្ម និងឧស្សាហកម្មនានានៅកម្ពុជា។ ពេលមានការដាច់ចរន្តអគ្គិសនីម្តងៗ មានមតិរិះគន់មួយចំនួនតែងលើកឡើងថា ការដាច់ចរន្តអគ្គិសនីនេះទំនងមកពីកម្ពុជាខ្វះខាតថាមពលអគ្គិសនីប្រើប្រាស់ ឬដើម្បីបុកឲ្យឡើងគីឡូកុងទ័រភ្លើងជាដើម។
ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកអគ្គិសនីកម្ពុជាបានបញ្ជាក់ប្រាប់ខេមបូណូមីស ថា ការដាច់ចរន្តអគ្គិសនីប្រើប្រាស់ជាញឹមញាប់នៅតាមតំបន់មួយចំនួន មិនមែនបណ្តាលមកពីកម្ពុជាខ្វះថាមពលអគ្គិសនីនោះទេ។ ឯកឧត្តមអះអាងថា បច្ចុប្បន្នកម្ពុជាមានប្រភពថាមពលអគ្គិសនីគ្រប់គ្រាន់ក្នុងការផ្គត់ផ្គង់តម្រូវការប្រើប្រាស់លើវិស័យឧស្សាហកម្ម ពាណិជ្ជកម្ម សិប្បកម្ម និងការប្រើប្រាស់ប្រចាំថ្ងៃរបស់ប្រជាពលរដ្ឋ។
ថ្នាក់ដឹកនាំអគ្គិសនីកម្ពុជារូបនេះ បានគូសបញ្ជាក់ថា មូលហេតុដែលធ្វើឲ្យដាច់ចរន្តអគ្គិសនីជាញឹកញាប់ គឺដោយសារការពង្រីកហេដ្ឋារចនាសម្ព័ន្ធ ផ្លូវថ្នល់មួយចំនួន បានបង្ខំឲ្យមានការរំកិលបង្គោលអគ្គិសនីពីទីតាំងចាស់មកទីតាំងថ្មី និងផលប៉ះពាល់លើបណ្តាញចែកចាយថាមពលដែលបណ្តាលមកពីការអភិវឌ្ឍគ្មានច្បាប់ទម្លាប់មួយចំនួនរបស់ក្រុមហ៊ុនឯកជន និងប្រជាពលរដ្ឋ។ ការតម្លើងឧបករណ៍ និងបរិក្ខាអគ្គិសនីថ្មី និងគ្រោះធម្មជាតិនានា ក៏ជាបញ្ហាមួយផងដែរ។
អត្ថបទគួរអាន
ឯកឧត្តម កែវ រតនៈ ធ្លាប់បានអះអាងកន្លងមកថា វិបត្តិថាមពលសកលដែលកំពុងជះឥទ្ធិពលអាក្រក់លើវិស័យលើវិស័យមួយចំនួនរបស់ប្រទេសធំៗលើសកលលោក មិនបានជះឥទ្ធិពលធ្ងន់ធ្ងរមកលើវិស័យថាមពលអគ្គិសនីកម្ពុជានោះទេ គ្រាន់តែធ្វើឲ្យថ្លៃដើមផលិតអគ្គិសនីរបស់រោងចក្រដើរដោយធ្យូងថ្ម និងប្រេងឥន្ធនៈឡើងថ្លៃបន្តិចបបន្តួចតែប៉ុណ្ណោះ។ ទោះបីយ៉ាងនេះក្តី ឯកឧត្តម សង្កត់ធ្ងន់ថា អគ្គសនីកម្ពុជាមិនបានដំឡើងថ្លៃអគ្គិសនី សម្រាប់អ្នកប្រើប្រាស់ចុងក្រោយនោះទេ។
តាមរបាយការរបស់ក្រសួងរ៉ែ និងថាមពល នៅឆ្នាំ២០២១ រោងចក្រថាមពលអគ្គិសនីនៅកម្ពុជាអាចផលិតថាមពលបានចំនួនជាង៣ពាន់មេកាវ៉ាត់ និងគ្រោងនាំចូលពីក្រៅប្រទេសជិត១ពាន់មេកាវ៉ាត់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
