ចំណែកឯផ្ទះប្រភេទ Cluster House (C1& C1A) និង ប្រភេទេ Cluster House (C2 & C2A) ក៏ត្រូវបានអតិថិជនកក់អស់ជាច្រើនខ្នងផងដែរ ដែលតម្លៃចន្លោះពី ៣៩៩,៩៩៩ ដុល្លារ រហូតដល់ ៤៤៥,៩៩៩ ដុល្លារអាមេរិក។
តម្លៃថ្លៃពិតជាមិនធម្មតានេះ វាថ្លៃព្រោះវាស័ក្តិសមទៅនឹងលំនៅដ្ឋានបែប resort ប្រណីត មិនធ្លាប់មាននោះទេ នៅក្នុងប្រទេសកម្ពុជា ដោយសារតែគម្រោងនេះមានលក្ខណៈពិសេសដូចគ្នាទៅនឹងគម្រោង ឌឹ ផាម (The Palms) នៅប្រទេសកាតា និងសិង្ហបុរី អ៊ីចឹងដែរ ដែលសាងសង់មានសណ្ឋានរូបរាងដូចជាដើមត្នោត។ ក្រុមហ៊ុននឹងរៀបចំពិធីបើកលក់ជាផ្លូវការដល់សាធារណៈជននៅពាក់កណ្តាលខែធ្នូ ឆ្នាំនេះ។
លោកឧកញ៉ាសៀ ឫទ្ធី (ខាងឆ្វេងគេ) កំពុងឈរបង្ហាញពីគម្រោងលំនៅដ្ឋាន The Palms ទៅកាន់អ្នកចូលរួម
ថ្លែងនៅក្នុងកម្មវិធីធ្វើបទបង្ហាញណែនាំគម្រោងលំនៅដ្ឋានប្រណីត The Palms លោកឧកញ៉ា សៀ ឫទ្ធី ប្រធានក្រុមប្រឹក្សាភិបាលក្រុមហ៊ុន វើលប្រ៊ីដ គ្រុប និងជាម្ចាស់គម្រោងលំនៅដ្ឋានដ៏ប្រណីតបានមានប្រសាសន៍ថា នេះគឺជាគម្រោងលំនៅដ្ឋានដ៏ប្រណីតមិនធ្លាប់មាននៅស្រុកខ្មែរ ដែលមានការខុសប្លែកពីគម្រោងទី១ និង គម្រោងទី២ ដែលក្រុមហ៊ុន វើល ប្រ៊ីដ ធ្លាប់បានអភិវឌ្ឍសាងសង់រួចមកហើយ ដូចជា គម្រោងអគារពាណិជ្ជកម្ម និងលំនៅដ្ឋានកម្ពស់ ៤៥ជាន់ The Bridge និងអគារពាណិជ្ជកម្មលំនៅដ្ឋាន សណ្ឋាគារ ដែលមានឈ្មោះថា The Peak។ ហើយគម្រោងទាំងពីរនេះ ទទួលបានការគាំទ្រ និងមានភាពជោគជ័យយ៉ាងខ្លាំង។
លោកឧកញ៉ាបន្តថា គម្រោងអភិវឌ្ឍន៍បុរីលំនៅដ្ឋានដ៏ប្រណីត The Palms មួយនេះសាងសង់ នៅតាមមាត់ទន្លេស្ថិតនៅលើផ្ទៃដីចំនួន ៣,៧ហិកតា។
គម្រោងបុរីលំនៅដ្ឋាន The Palms ស្ថិតនៅតាមបណ្តោយផ្លូវជាតិលេខ១ ចម្ងាយប្រមាណ ៤គីឡូម៉ែត្រ ពីគល់ស្ពានព្រះមុនីវង្ស ដែលតភ្ជាប់រហូតដល់មាត់ទន្លេ ក្នុងភូមិក្តីតាកុយ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ និងជាគម្រោងអភិវឌ្ឍន៍លំនៅដ្ឋានដ៏ប្រណីតប្លែកពីគេ មិនធ្លាប់មាននៅកម្ពុជា ដោយមានការសហការជាមួយដៃគូវិនិយោគមកពីប្រទេសសិង្ហបុរី។
មូលហេតុដែលឧកញ៉ា សៀ ឫទ្ធី សម្រេចចិត្តអភិវឌ្ឍបុរីលំនៅដ្ឋាន The Palms នៅតំបន់នោះ ដោយសារតែមើលឃើញថា តំបន់នោះមានប្រព័ន្ធហេដ្ឋារចនាសម័្ពន្ធល្អ ផ្លូវជាតិធំទូលាយ មានស្ពានពីរតភា្ជប់ និងទីតាំងអភិវឌ្ឍន៍នៅជិតមាត់ទន្លេ ដែលបង្កលក្ខណៈពិសេសសម្រាប់ការអភិវឌ្ឍគម្រោងលំនៅដ្ឋាន The Palms នេះ ឲ្យក្លាយជា រីស៊ត ដ៏ប្រណីត។
រូបប្លង់គំរូនៃលំនៅដ្ឋានដ៏ប្រណីត The Palms
គម្រោងនេះនឹងចាប់ផ្តើមដំណើរការសាងសង់ជាផ្លូវការនៅចុងឆ្នាំនេះហើយ ដែលនឹងចំណាយទុនវិនិយោគសាងសង់ប្រមាណ ១១០លានដុល្លារអាមេរិក។ គម្រោងអភិវឌ្ឍន៍ បុរី ឌឹ ផាម នឹងមានការសាងសង់វីឡាកូនកាត់ចំនួន ២០៤វីឡា ជាលក្ខណៈបឹងកាឡូ ១៦វីឡា និងមានកន្លែងចតអូប័រ ជាពិសេស សម្រាប់អ្នកដែលទិញវីឡាបឹងកាឡូ។ ហើយវីឡាទាំងអស់សុទ្ធតែអាចមើលឃើញផ្ទៃទន្លេ ហើយផ្ទះមានជណ្តើរយន្តសម្រាប់មនុស្សចាស់ផងដែរ។
តើអ្នកបានអានអត្ថបទនេះហើយ ឬនៅ?
តម្លៃលំនៅដ្ឋានប្រណីត ចែកទៅតាមលំដាប់ថ្នាក់ ទំហំ និងប្រភេទ ដូចខាងក្រោមនេះ៖
- ប្រភេទ Cluster House (C1& C1A) មានទំហំ ៣១៥ម៉ែត្រការ៉េ តម្លៃចំនួន ៣៩៩,៩៩៩ ដុល្លារអាមេរិក
- ប្រភេទេ Cluster House (C2 & C2A) មានទំហំ ៣៧៧ ម៉ែត្រការ៉េ តម្លៃចំនួន ៤៤៥,៩៩៩ ដុល្លារអាមេរិក
- ប្រភេទ វីឡា (V1) មានទំហំ ៦៧៧ ម៉ែត្រការ៉េ តម្លៃចំនួន ១,១២០,០០០ ដុល្លារអាមេរិក
- ប្រភេទវីឡា (V2) មានទំហំ ៩៦៥ ម៉ែត្រការ៉េ តម្លៃចំនួន ១,២៥០,៩៩៩ ដុល្លារអាមេរិក
- ប្រភេទវីឡា (V3) មានទំហំ ១០៤៣ ម៉ែត្រការ៉េ តម្លៃចំនួន ១,២៨៧,០៦២ ដុល្លារអាមេរិក
- ប្រភេទវីឡា (V4) មានទំហំ ១០៨៦ ម៉ែត្រការ៉េ តម្លៃចំនួន ១,៣៣៩,៩៩៩ ដុល្លារអាមេរិក។
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
