អ្នកជំនាញនៅក្នុងវិស័យអាកាសចរណ៍ បានអះអាងថា ការតភ្ជាប់ជើងហោះហើរត្រង់ពីទីក្រុងកូឡាឡាំពួរ មករាជធានីភ្នំពេញនេះ នឹងជួយជំរុញឲ្យវិស័យទេសចរណ៍កម្ពុជាមានការកើនឡើង និងបង្កើនការទាក់ទាញក្រុមហ៊ុនអាកាសចរណ៍ផ្សេងៗជាច្រើនទៀត ឲ្យបង្កើនជើងហោះហើរត្រង់របស់ខ្លួនមកកម្ពុជាផងដែរ។
ក្រុមហ៊ុនអាកាសចរណ៍ម៉ាឡេស៊ី Malindo Air ដែលទើបតែបានសម្រេចបើកជើងហោះហើរត្រង់ទៅមកពីទីក្រុងកូឡាឡាំពួរប្រទេសម៉ាឡេស៊ី មកកាន់រាជធានីភ្នំពេញនេះ បានអះអាងថា នឹងធ្វើការហោះហើរ១ថ្ងៃ១លើក ជារៀងរាល់ថ្ងៃ ជាមួយនឹងយន្ដហោះប្រភេទ Boeing 737-800 ដែលអាចផ្ទុកអ្នកដំណើរបានរហូតដល់១៨០នាក់។
នាយកផ្នែកទំនាក់ទំនងសារធារណៈ
នៃក្រុមហ៊ុន Malindo Air លោក Raja
Sa’adi Bin Raja Amrin បានលើកឡើងថា កម្ពុជា គឺជាប្រទេសទី១៧ហើយ
ដែលក្រុមហ៊ុនអាកាសចរណ៍មួយនេះ បានប្រតិបត្តិការជើងហោះហើររបស់ខ្លួន ដោយគិតមកទល់បច្ចុប្បន្ន
ក្រុមហ៊ុនអាកាសចរណ៍ម៉ាឡេស៊ីមួយនេះ មានអាយុកាលត្រឹមតែជិត៥ឆ្នាំប៉ុណ្ណោះ ប៉ុន្ដែមានយន្ដហោះសរុបរហូតដល់៤៥គ្រឿងសម្រាប់ដឹកអ្នកដំណើរទៅមកជិត២០ប្រទេស។
លោកបន្ថែមថា ក្រុមហ៊ុនបានសិក្សាពីទីផ្សារកម្ពុជាយូរមកហើយ
ហើយក៏ទន្ទឹងរង់ចាំការចូលទីផ្សារកម្ពុជានេះយូរហើយដែរ
ព្រោះ ទីផ្សារកម្ពុជា គឺមានភាពល្អប្រសើរយ៉ាងខ្លាំងសម្រាប់ក្រុមហ៊ុនអាកាសចរណ៍។
បើពិនិត្យមើលទៅលើស្ថិតិនៃអ្នកធ្វើដំណើរ ឃើញថា ប្រជាជនម៉ាឡេស៊ីបានធ្វើដំណើរកម្ពុជា ច្រើនជាងប្រជាជនកម្ពុជាធ្វើដំណើរទៅម៉ាឡេស៊ី ហើយភាគច្រើនពួកគាត់មកកម្ពុជាដើម្បីធ្វើការទិញទំនិញ និងដើរកម្សាន្ដជាដើម។
តើអ្នកបានអានអត្ថបទនេះ ហើយឬនៅ?
នាយកផ្នែកទំនាក់ទំនងសាធារណៈក្រុមហ៊ុន Malindo Air រូបនេះ បានបន្ថែមទៀតថា ត្បិតថាបច្ចុប្បន្នក្រុមហ៊ុន Malindo Air ទើបតែមានមានយន្ដហោះមួយគ្រឿងសម្រាប់ផ្ដល់ការហោះហើរទៅមករវាកម្ពុជា និងម៉ាឡេស៊ីក៏ដោយ ប៉ុន្ដែលោកក៏បាន និងកំពុងសំឡឹងឃើញពីសក្ដានុពលនៃការហោះហើរត្រង់ទៅកាន់ខេត្តសក្ដានុពលផ្សេងទៀតរបស់កម្ពុជា ដូចជាខេត្តសៀមរាប និងខេត្តព្រះសីហនុជាដើម។
ទោះយ៉ាងណាក៏ដោយ លោកថា ក្រុមហ៊ុននឹងតាមដានពីតម្រូវការជើងហោះហើរជាក់ស្ដែងជាមុនសិន ហើយប្រសិនបើមានតម្រូវការមានការកើនឡើង ស្របទៅតាមគោលដៅពង្រីកជើងហោះហើររបស់ក្រុមហ៊ុន នោះក្រុមហ៊ុនលោកនឹងពិចារណាពង្រីកជើងហោះហើរពីកូឡាឡាំពួរ ទៅខេត្តសក្ដានុពលផ្សេងទៀតរបស់កម្ពុជា។
លោក អេរិច ដឺឡូប៊ែល អគ្គនាយកអាកាសយាន្ដដ្ឋានកម្ពុជា
យ៉ាងណាក៏ដោយចុះ ក្រុមហ៊ុនអាកាសចរណ៍ម៉ាឡេស៊ីចាស់វស្សាមួយ
គឺ Air
Asia ដែលបានហោះហើរត្រង់មកកម្ពុជា ជាយូរឆ្នាំមកហើយនោះ ក៏បានពង្រីកជើងហោះហើរត្រង់ពីម៉ាឡេស៊ី
មកកាន់កម្ពុជាក្នុងទិសដៅជាច្រើនផ្សេងគ្នាផងដែរ ដូចជាការហោះត្រង់ទៅមកទីក្រុងកូឡាឡាំពួរ-ភ្នំពេញ កូឡាឡាំពួរ-សៀមរាប និងកាលពីប៉ុន្មានខែមុននេះ
ក៏ទើបតែបន្ថែមជើងហោះហើរត្រង់ទៅមកពីកូឡាំ-ខេត្តព្រះសីហនុផងដែរ។
ដោយក្នុងដំណាក់កាលដំបូង
ក្រុមហ៊ុន Air Asia នឹងធ្វើការហោះហើរត្រង់ទៅមកពីកូឡាឡាំពួរ
មកខេត្តព្រះសីហនុ ឲ្យបាន៤ដងក្នុង១សប្ដាហ៍ ហើយរំពឹងថានឹងអាចបន្ថែមជើងហោះហើរឲ្យបានរហូតដល់៧ដងក្នុង១សប្ដាហ៍នៅពេលខាងមុខ
ជាមួយនឹងក្ដីសង្ឃឹមទទួលបានភ្ញៀវធ្វើដំណើរប្រមាណ១០ម៉ឺននាក់ក្នុងមួយឆ្នាំ៕
ជាមួយគ្នានេះដែរ លោក អេរិច ដឺឡូប៊ែល
អគ្គនាយកអាកាសយាន្ដដ្ឋានកម្ពុជា បានលើកឡើងថា ការទទួលបានជើងហោះហើរត្រង់ទៅមកពីកូឡាឡាំពួរមករាជធានីភ្នំពេញរបស់ក្រុមហ៊ុន
Malido
Airនេះ គឺការផ្ដល់នូវជម្រើសកាន់តែប្រសើរឡើងសម្រាប់អ្នកធ្វើដំណើរ
ហើយក៏ជាការបង្ហាញពីចំណុចពិសេសរបស់កម្ពុជា ដើម្បីតភ្ជាប់ជើងហោះហើរកាន់តែច្រើនថែមទៀតទៅកាន់ពិភពលោកផងដែរ។
លោកបន្ថែមថា បើរាប់បញ្ចូលទាំងក្រុមហ៊ុនអាកាសចរណ៍ម៉ាឡេស៊ី Malindo Air ដែលទើបនឹងបានបើកជើងហោះហើរត្រង់ទៅមកភ្នំពេញ-កូឡាឡាំពួរនេះ
ជាសរុបជើងហោះហើរត្រង់ទៅមកកម្ពុជាម៉ាឡេស៊ី មានចំនួន៧លើកហើយក្នុងមួយថ្ងៃ។
ទន្ទឹមនឹងនេះ បើនិយាយពីចំនួនក្រុមហ៊ុនអាកាសចរណ៍ដែលបានប្រតិបត្តិការជើងហោះហើរ មកកាន់អាកាសយានដ្ឋានអន្តរជាតិភ្នំពេញ សរុប មានជាង៤០ក្រុមហ៊ុនហើយមកទល់ពេលនេះ ពោលគឺជាការតភ្ជាប់បណ្ដាញជើងហោះហើរ ប្រកបដោ ភាពធំទូលាយ។
លោក អេរិច បន្តែមទៀតថា តាមរយៈការទទួលបានជើងហោះហើរត្រង់របស់ Malindo Air អ្នកធ្វើដំណើរអាចហោះហើរទៅមកកូឡាឡាំពួរ-រាជធានីភ្នំពេញ បានរហូតដល់៧លើកក្នុងមួយថ្ងៃ។
ក្នុងនោះ បើតាមទិន្នន័យពីរបាយការណ៍ទាក់ទងនឹងចំនួនអ្នកធ្វើដំណើរអន្តរជាតិមកកាន់អាកាសយាន្ដដ្ឋានអន្តរជាតិភ្នំពេញ ឃើញថា ជនជាតិម៉ាឡេស៊ី គឺស្ថិតក្នុងចំណោមអ្នកធ្វើដំណើរអន្តរជាតិទាំង៥ ដែលធ្វើដំណើរឆ្លងកាត់អាកាសយាន្ដដ្ឋានអន្តរជាតិភ្នំពេញច្រើនជាងគេ។
សូមបញ្ជាក់ដែរថា កាលពីឆ្នាំ២០១៦កន្លងទៅ
អ្នកធ្វើដំណើរឆ្លងកាត់អាកាសយាន្ដដ្ឋានទាំងអស់នៅកម្ពុជាមានរហូតដល់៧លាននាក់។
ក្នុងនោះ អ្នកធ្វើដំណើរជាជនជាតិម៉ាឡេស៊ី ដែលបានធ្វើដំណើរឆ្លងកាត់អាកាសយានដ្ឋានអន្តរជាតិភ្នំពេញមានប្រមាណជាង១៥ម៉ឺននាក់។
ដោយឡែក នៅឆ្នាំ២០១៧នេះ អ្នកធ្វើដំណើរឆ្លងកាត់អាកាសយាន្ដដ្ឋាននៅកម្ពុជាត្រូវបានរំពឹងថា នឹងកើនដល់៨លាននាក់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
