មហាសេដ្ឋីពិភពលោក ប៊ីល ហ្គេត រក​បាន​ចំណូល​បន្ថែម​២៥​ពាន់​លាន​ដុល្លារ​ក្រោយ​ចាក​ចេញ​ពី Microsoft ១០​ឆ្នាំ

នេះបើយោងតាមរបាយការណ៍មួយមានចំណងជើងថា «សេដ្ឋកិច្ចសម្រាប់មនុស្ស ៩៩ភាគរយ» ឬ “An Economy for the 99 percent” ដែលចេញផ្សាយកាលពីពេលថ្មីៗ ដោយអង្គការ Oxfam។

មួយទសវត្សរ៍ក្រោយការចាកចេញពី Microsoft ទ្រព្យសម្បត្តិលោក ប៊ីល ហ្គេត បានកើនឡើងដល់ ៧៥ពាន់លានដុល្លារ គឺកើនឡើង ៥០% បើទោះបីជាលោកបានបរិច្ចាគប្រាក់ច្រើនសន្ធឹកសន្ធាប់តាមរយៈមូលនិធិរបស់លោកក្ដី។

របាយការណ៍សរសេរដែរថា មហាសេដ្ឋីពិភពលោកមានទ្រព្យសម្បត្តិកើនឡើងក្នុងល្បឿនលឿនយ៉ាងគំហុក និងថា ពិភពលោកអាចនឹងឃើញមហាសេដ្ឋីដែលមានប្រាក់ខ្ទង់សែនលានដុល្លារ (trillionnaire) ក្នុងរយៈពេល ២៥ឆ្នាំខាងមុខ។ 

របាយការណ៍របស់អង្គការ Oxfam ដដែល ឲ្យដឹងថា មហាសេដ្ឋីពិភពលោក ៨រូប មានទ្រព្យសម្បត្តិស្មើនឹងប្រជាជន ៣ពាន់ ៦រយលាននាក់ ឬស្មើនឹងមួយចំហៀងពិភពលោក។ មហាសេដ្ឋីទាំង៨រូបនោះ រួមមាន Bill Gates, Amancio Ortega, Warren Buffett, Carlos Slim Helu, Jeff Bezos, Mark Zuckerberg, Larry Ellison និង Michael Bloomberg៕