ជាក់ស្តែង នៅក្នុងឆ្នាំ២០១៦ កន្លងមកនេះ ការបង់រំលោះមានការកើនឡើងប្រមាណជាង ៥០ភាគរយ។ ការកើនឡើងនេះ ត្រូវបានធនាគារជាតិនៃកម្ពុជារកឃើញថា ដោយសារប្រាក់ចំណូលប្រជាជន និង កំណើនសេដ្ឋកិច្ចជាតិមានភាពល្អប្រសើរ។
បើយោងតាមរបាយការណ៍ប្រចាំឆ្នាំ២០១៦ ដែលចេញផ្សាយដោយធនាគារជាតិនៃកម្ពុជា កាលពីពេលកន្លងទៅ បានបង្ហាញថា ទីផ្សារបង់រំលោះក្នុងឆ្នាំ២០១៦ មានការកើនឡើងយ៉ាងខ្លាំង ដោយបានពង្រីកសេវាភិតសន្យាហិរញ្ញវត្ថុ ឬការបង់រំលោះ ដូចជា ម៉ូតូ រថយន្ត គ្រឿងប្រើប្រាស់ក្នុងវិស័យសំណង់ គ្រឿងអេឡិចត្រូនិច និងសម្ភារៈប្រើប្រាស់សម្រាប់គ្រួសារជាដើម។
👓 អត្ថបទគួរអាន !
✌️ បើចង់ស្រណុកខ្លួននៅពេលចាស់ ត្រូវអនុវត្តវិធី៤យ៉ាងដើម្បី«សេរីភាពហិរញ្ញវត្ថុ»
✌️ អ្នកសេដ្ឋកិច្ចប្រាប់ពីរូបមន្តក្នុងការចាត់ចែងលុយកាក់មានប្រសិទ្ធភាព
របាយការណ៍ដដែល បានបន្ថែមថា គិតមកត្រឹមដំណាច់ឆ្នាំ២០១៦ ក្រុមហ៊ុនដែលបានផ្តល់សេវាកម្មបង់រំលោះចំនួន១២ ក្រុមហ៊ុន មានទ្រព្យសកម្មសរុបកើនឡើងប្រមាណ៥២,៣% មានទឹកប្រាក់ប្រមាណ ១៥៥លានដុល្លារអាមេរិក និងមានប្រាក់កម្ចីកើនឡើងដល់ ៤១% ដែលមានទឹកប្រាក់ប្រមាណ១២០លានដុល្លារអាមេរិក។
ប្រាក់កម្ចីនៃការបង់រំលោះនោះ ត្រូវបានបែងចែកទៅតាមវិស័យសំខាន់ៗដូចជា វិស័យកសិកម្មដែលមាន ២៣% ក្រុមគ្រួសារ ២៨% វិស័យសំណង់ ១៣%។ វិស័យនេះត្រូវបានផ្តល់ជូនដល់អតិថិជនប្រមាណ ៦ម៉ឺន ១ពាន់នាក់៕
