ការប្រើប្រាស់បារកូដ (Barcodes) បិទភ្ជាប់ជាមួយនឹងផលិតផលសម្រាប់បញ្ជាក់ពីប្រភពដើមទំនិញ ក៏ដូចជាផ្ដល់នូវភាពលឿនរហ័សសម្រាប់ការទូទាត់គិតប្រាក់នៅពេលទិញផលិតផលនោះ បច្ចុប្បន្នកំពុងមានការយល់ដឹងច្រើនគួរឲ្យកត់សម្គាល់ពីម្ចាស់ក្រុមហ៊ុន និងសហគ្រាសនានា។
ជាក់ស្ដែង បើតាមការលើកឡើងពី លោក ឡូញ គឹមអៀន នាយកប្រតិបត្តិ GS1 Cambodia ដែលជាស្ថាប័នតែ១គត់ ផ្ដល់បាកូដ សម្រាប់មុខទំនិញផលិតនៅកម្ពុជា បានលើកឡើងថា បច្ចុប្បន្ននេះ អ្នកដែលមកទទួលយកបារកូដសម្រាប់យកទៅប្រើប្រាស់បិទលើផលិតផល ឬទំនិញរបស់ខ្លួន ហាក់មានការយល់ដឹងច្រើនជាងមុន។
តួយ៉ាង គិតត្រឹមឆ្នាំ២០០៣ មកទល់ដើមឆ្នាំនេះ អ្នកដែលបានស្នើសុំលេខបាកូដយកទៅប្រើប្រាស់ មានរហូតដល់ជាង ១ពាន់សមាជិកហើយ។ ក្នុងនោះ ភាគច្រើន គឺយកទៅប្រើប្រាស់លើផលិតផលចំណីអាហារ ហើយពេលថ្មីៗនេះទៀតសោត ក៏មានផលិតកសិកម្មជាច្រើន បានមកស្នើសុំលេខបារកូដនេះ យកទៅប្រើប្រាស់ដែរ។
អត្ថបទគួរឲ្យចាប់អារម្មណ៍!
លោ ឡូញ គឹមអៀន បានបន្ថែមទៀតថា បារកូដមិនត្រឹមតែមានមុខងារសម្រាប់បញ្ជាក់ពីប្រភពដើមទំនិញដែលផលិតនៅក្នុងស្រុកប៉ុណ្ណោះទេ ប៉ុន្ដែ វាក៏មានផ្ដល់អត្ថប្រយោជន៍ជាច្រើនទៀតសម្រាប់ការងារគ្រប់គ្រងស្តុកផងដែរ ហើយបច្ចុប្បន្នខាង GS1 Cambodia ក៏បាននិងកំពុងសហការជាមួយក្រសួងពាក់ព័ន្ធ ដូចជាក្រសួងពាណិជ្ជកម្ម ក្រសួងកសិកម្ម រុក្ខាប្រមាញ់ និងនេសាទ និងក្រសួងសិប្បកម្មជាដើម ដើម្បីពង្រីកការប្រើប្រាស់បារកូដនេះឲ្យមានកាន់តែច្រើនឡើងផងដែរ។
លេខបារកូដ សម្គាល់ប្រភពដើមទំនិញរបស់កម្ពុជា
បើតាមការគូសបញ្ជាក់ពី នាយកប្រតិបត្តិ GS1 Cambodia បានឲ្យដឹងថា ការប្រើប្រាស់បារកូដនេះ ក៏ជាការធ្វើទំនើបកម្មមួយ សម្រាប់ការទិញលក់ទំនិញផងដែរ ខណៈដែលវាក៏មានដំណើរការ បែបពាណិជ្ជកម្មអេឡិចត្រូនិកដែរ (E-Business)។ មិនតែប៉ុណ្ណោះ តាមរយៈការកើនឡើងនៃផ្សារទំនើប និងហាងលក់ទំនិញ ម៉ាត កាន់តែច្រើនឡើងនាពេលបច្ចុប្បន្ន ក៏នឹងជំរុញឲ្យការប្រើប្រាស់បារកូដលើមុខទំនិញកាន់តែមានកើនឡើងច្រើនជាងមុនផងដែរ។
យ៉ាងណាក៏ដោយចុះ បារកូដគ្រាន់តែជាសញ្ញាបញ្ជាក់ប្រភពដើមទំនិញ និងជាមធ្យោបាយមួយក្នុងការគ្រប់គ្រងការលក់ និងត្រួតពនិត្យស្តុកប៉ុណ្ណោះ ប៉ុន្ដែមិនមែនជាសញ្ញាបញ្ជាក់ពីស្ដង់ដារគុណភាពទំនិញនោះឡើយ។ ប៉ុន្ដែ បើតាមការលើកឡើងពីមន្ត្រីជាន់ខ្ពស់សភាពាណិជ្ជកម្ម រាល់មុខទំនិញទាំងឡាយណាដែលមិនមានបារកូដ គឺត្រូវបានចាត់ទុកថា ជាទំនិញមិនស្របច្បាប់នោះឡើយ។
សូមបញ្ជាក់ថា លេខបារកូដសម្គាល់មុខទំនិញ ដែលផលិតនៅក្នុងប្រទេសកម្ពុជា គឺមានលេខសម្គាល់ក្បាលខាងដើម ៨៨៤ ខណៈដែលទំនិញមកពីប្រទេសថៃមានលេខ ៨៨៥ និងវៀតណាមមានលេខ ៨៩៣ ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
