ក្រសួងរ៉ែអះអាងថា រោងចក្រផលិតស៊ីម៉ង់ត៍ទាំង៥ របស់កម្ពុជាអាចបំពេញតម្រូវការក្នុងស្រុកស្ទើរតែ ១០០%ហើយ

ឯកឧត្តម យស មុនីរ៉ាត់ បានឲ្យដឹងថា សមត្ថភាព​រោងចក្រផលិត​ស៊ីម៉ង់ត៍​ចំនួន ៥នេះ អាចបំពេញ​សេចក្តីត្រូវការ​ក្នុងវិស័យ​សំណង់​បានគ្រប់គ្រាន់​ស្ទើរតែ​ទាំងអស់​ទៅហើយ ខណៈដែល​នៅអំឡុងឆ្នាំ ២០០៦​កម្ពុជា​បានាំចូល​ស៊ីម៉ង់ត៍​ទាំងស្រុង។

ឯកឧត្តមបានបន្ថែមថា« ផលិតផល​ស៊ីម៉ង់ត៍នេះ បើយើង​និយាយត្រលប់​ទៅកាល​ពីមុន មុនឆ្នាំ២០០៦ មុនឆ្នាំ២០០៧នេះ គឺយើង​ពឹងផ្អែក​ទៅលើការ​នាំចូល​ពីបរទេស​ទាំងស្រុង ១០០%។ យើងធ្លាប់មាន​រោងចក្រស៊ីម៉ង់ត៍​តូចមួយ ដែលជារោងចក្រ​ស៊ីម៉ង់ត៍​សល់ពីជំនាន់​សង្គម​រាស្រ្តនិយម​ដែរ ប៉ុន្តែវាចាស់​ទ្រុឌទ្រោម​គ្មាន​គ្រឿងបន្លាស់ យើងក៏​បានផ្អាក​ផលិតកម្ម​តាំងពី​ឆ្នាំ២០០១​អី​មកម្ល៉េះ ប៉ុន្តែឥឡូវនេះ យើងមាន​ផលិតផល​ស៊ីម៉ង់ត៍​យើងសម្រាប់​បម្រើសេចក្តី​ត្រូវការ​គ្រប់គ្រាន់​នៅក្នុង​ប្រទេស»។

សូមជម្រាបថា មកទល់ពេលនេះ​កម្ពុជាមាន​រោងចក្រ​ផលិតស៊ីម៉ង់ត៍​ចំនួន​៥ហើយ ក្នុងនោះ​នៅខេត្ត​កំពត​មាន​ចំនួន ៤ រោងចក្រ​បាត់ដំបងមាន​១រោងចក្រ​។ រោងចក្រទាំងនោះ​រួមមាន៖

• រោងចក្រទី១ គឺ រោងចក្រ​កំពតស៊ីមិន ខូអិលធីឌី (Kampot Cement Co,Ltd)មាន​សមត្ថភាព​ផលិត​ស៊ីម៉ង់ត៍​បាន២លាន​តោន​ក្នុងមួយឆ្នាំ។
• រោងចក្រទី២ គឺរោងចក្រ​ស៊ីម៉ង់ត៍​កម្ពុជា​ ចក្រីទីង(Cambodia Cememnt Chakreyting នៅក្នុង​ខេត្តកំពត អាចផលិត​ស៊ីម៉ង់ ១,១លាន​តោន​ក្នុងមួយឆ្នាំ។
• រោងចក្រទី៣ គឺរោងចក្រជីបម៉ុង អ៊ីនស៊ី ស៊ីមិន ខបភើរេសិន(Chip Mong Insee Cement Corporation) នៅខេត្តកំពត អាចផលិត​ស៊ីម៉ង់ត៍​បាន ២លានតោន​ក្នុងមួយឆ្នាំ។
• រោងចក្រទី៤ ស្ថិតនៅក្នុងខេត្ត​បាត់ដំបង មានឈ្មោះថា បាត់ដំបង ខនស៍ ស៊ីមិន លីមីតធីត (Batthambang Conch Cement limited) អាចផលិត​ស៊ីម៉ង់ត៍​បានជិត ២លានតោន​ក្នុងមួយឆ្នាំ
• រោងចក្រទី៥ គឺរោងចក្រផលិត​ស៊ីម៉ងត៍​ ថៃ ប៊ុនរ៉ុង នៅខេត្តកំពត អាចផលិតស៊ីម៉ង់ត៍​បានជិត​១លានតោន​ក្នុងមួយឆ្នាំ៕