បើតាមក្រសួងរៀបចំដែនដី នគរូបនីយកម្ម និងសំណង់ គម្រោងស្នើសុំអភិវឌ្ឍវិស័យសំណង់ក្នុងរយៈពេល៤ខែដំបូងដើមឆ្នាំនេះ មានតម្លៃទឹកប្រាក់វិនិយោគប្រមាណជាង ៤ពាន់លានដុល្លារ ធៀបនឹងរយៈពេលដូចគ្នាកាលពីឆ្នាំ២០១៦ កើនជាង ៤៣ភាគរយ។
ប្រតិបត្តិការចុះបញ្ជីស្នើសុំលិខិតអនុញ្ញាតសាងសង់គិតចាប់ពីខែមករា ដល់ខែមេសា ឆ្នាំ២០១៧នេះ សមត្ថកិច្ចថ្នាក់ជាតិនិងសាលារាជធានីខេត្ត បានផ្តល់លិខិតអនុញ្ញាតសាងសង់សំណង់ប្រមាណ ១ពាន់២០គម្រោង ជាមួយនឹងផ្ទៃក្រឡាសំណង់ជាង ៥លាន៦សែនម៉ែត្រការ៉េ ធៀបនឹងរយៈពេលដូចគ្នាឆ្នាំ២០១៦ មាន ៧១២គម្រោង ស្មើនឹងផ្ទៃក្រឡា សំណង់ជាង ៥លាន៩សែនម៉ែត្រការ៉េ។
លោក ឡៅ ទិព្វសីហា មន្ត្រីជាន់ខ្ពស់នៃអគ្គនាយកដ្ឋានសំណង់បានអះអាងថា កំណើននេះគឺជាការឆ្លុះបញ្ចាំងពីទំនុកចិត្តអ្នកវិនិយោគជាតិ និងអន្តរជាតិលើការអភិវឌ្ឍវិស័យសំណង់នៅកម្ពុជា ដែលទាំងអស់នេះគឺជាកម្លាំងចលករជំរុញឲ្យវិស័យសំណង់ទទួលបានការវិនិយោគកើនឡើង។
លោកបញ្ជាក់ថា៖ «គម្រោងដែលបានអនុញ្ញាតនៅដើមឆ្នាំនេះភាគច្រើន ជាអគារស្នាក់នៅរួម សណ្ឋាគារ អគារការិយាល័យធ្វើការ ផ្សារទំនើប បុរី រោងចក្រ សហគ្រាសនានា និងមជ្ឈមណ្ឌលពាណិជ្ជកម្មផ្សេងៗ។ នេះជាការឆ្លុះបញ្ចាំងពីទស្សនវិស័យប្រកបដោយសុទិដ្ឋិនិយមនូវកំណើនសេដ្ឋកិច្ច ស្ថិរភាពនយោបាយ និងស្ថិរភាពសង្គមរបស់កម្ពុជា»។
អ្នកជំនាញផ្នែកអចលនទ្រព្យ ឧកញ៉ា នួន រិទ្ធី មើលឃើញថា សុខភាពវិស័យអចលនទ្រព្យនិងសំណង់មិនមានបញ្ហាទេ។
(រូបភាព៖ ហេង ភារម្យ)
ជុំវិញទៅនឹងការកើនឡើងនូវទំហំវិនិយោគសំណង់នេះ ត្រូវបានអ្នកជំនាញអចលនទ្រព្យលោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យ KFA បានបញ្ជាក់ថា ចាប់ពីដើមឆ្នាំ២០១៧ រហូតមកដល់ពេលនេះ លោកបានកត់សម្គាល់ឃើញថា មានការវិនិយោគគម្រោងសំណង់អគារខ្ពស់ទាបជាច្រើននៅក្នុងរាជធានីភ្នំពេញ និងជាយទីក្រុង ដែលសកម្មភាពនេះបង្ហាញឲ្យឃើញច្បាស់ថា សុខភាពវិស័យសំណង់មិនមានបញ្ហានោះឡើយ។
លោកឧកញ៉ា នួន រិទ្ធី អគ្គនាយកក្រុមហ៊ុនអលនទ្រព្យ KFA បានធ្វើការវាយតម្លៃឲ្យដឹងថា តាមរយៈគោលនយោបាយរបស់រាជរដ្ឋាភិបាលកម្ពុជា ក្នុងការអភិវឌ្ឍន៍ហេដ្ឋារចនាសម្ព័ន្ធស្ពាន ផ្លូវ និង ផ្លូវក្រវ៉ាត់ក្រុង បានធ្វើឲ្យរាជធានីភ្នំពេញ និងតំបន់ជាយក្រុង មានកំណើន ជាមួយនឹងការអភិវឌ្ឍន៍សំណង់គ្រប់ប្រភេទ។
យ៉ាងណាក៏ដោយ កំណើននេះមិនទាន់អាចវាយតម្លៃថាល្អ ១០០% សម្រាប់ឆ្នាំនេះនោះដែរ ព្រោះកាលពីពេលថ្មីៗនេះ ខាងក្រសួងសេដ្ឋកិច្ច និងហិរញ្ញវត្ថុ បានធ្វើការព្យាករណ៍ថា កម្ពុជានឹងមានកំណើនសេដ្ឋកិច្ច ៧ ភាគរយ នៅឆ្នាំនេះ គឺដូចគ្នាទៅនឹងអ្វីដែលកម្ពុជាទទួលបានកាលពីឆ្នាំ២០១៦ដែរ។ ប៉ុន្តែ វិស័យសំណង់ធ្លាប់តែមានកំណើនខ្ពស់ពី ១៦ភាគរយកាលពីឆ្នាំ២០១៦ បានថយមកនៅត្រឹម ១០ភាគរយនៅក្នុងឆ្នាំនេះ ខណៈដែលឧស្សាហកម្មកាត់ដេរ និងវាយនភណ្ឌនៅបន្តរីកចម្រើនក្នុងភាពរឹងមាំល្អ៕
