ការចង់យកពន្ធរបស់សហភាពអឺរ៉ុបលើការបំភាយកាបូនពីប្រទេសនាំចូល បង្កការខឹងសម្បារពីចិន និងឥណ្ឌា

តាមរយៈពន្ធខាងលើ សហភាពអឺរ៉ុប សង្ឃឹមថា នឹងធ្វើឱ្យមានការកំណត់តម្លៃលើទំនិញ ដែលបញ្ចេញកាបូនក្នុងផលិតកម្មផលិតតាមរយៈការប្រើប្រាស់ថាមពលមួយចំនួន ដូចជាដែក ដែកថែប ស៊ីម៉ងត៍ ជី និងអាលុយមីញ៉ូម នៅតាមប្រទេសផ្សេងៗ។ គោលបំណងសំខាន់នៃគម្រោងនេះ គឺដើម្បីកាត់បន្ថយការបំភាយឧស្ម័ន និងបង្កើតទីលានប្រកួតប្រជែងស្មើភាពគ្នាមួយសម្រាប់ទំនិញដែលផលិតនៅក្នុងប្លុក អ៊ឺរ៉ុប ដែលបានបំពេញតាមស្តង់ដារបៃតងយ៉ាងតឹងរ៉ឹង។

ជុំវិញគម្រោងចង់យកពន្ធរបស់សហភាពអឺរ៉ុបនេះ បានបង្កឱ្យមានការជជែកដេញដោលគ្នាយ៉ាងខ្លាំងនៅឯសន្និសីទអាកាសធាតុ COP28 នៅទីក្រុងឌូបៃ កាលពីពេលថ្មីៗ ដោយក្រុមអ្នកបង្កើតគោលនយោបាយកំពុងដោះស្រាយធ្វើយ៉ាងណាឱ្យពិភពលោកកាន់តែបៃតងដោយមិនធ្វើឱ្យប៉ះពាល់ដល់សេដ្ឋកិច្ច ដែលកំពុងស្ថិតក្នុងស្ថានភាពដ៏ផុយស្រួយ។

ប្រទេសកំពុងអភិវឌ្ឍន៍មួយចំនួនមានការព្រួយបារម្ភថា ពន្ធស្ថិតនៅក្រោមយន្តការកែតម្រូវព្រំដែនកាបូន (CBAM) តាមផែនការបស់សហភាពអឺរ៉ុបនេះ នឹងធ្វើឱ្យប៉ះពាល់ដល់សេដ្ឋកិច្ច និងជីវភាពរបស់ប្រជាពលរដ្ឋរបស់ពួកគេ។

ស្នងការអឺរ៉ុបសម្រាប់សកម្មភាពអាកាសធាតុ លោក វ៉ូបកេ ហូកស្ត្រា (Wopke Hoekstra) បានប្រាប់អ្នកយកព័ត៌មាននៅឯសន្និសីទ COP28 ថា គម្រោង CBAM នេះមានគោលបំណងតែមួយគត់ គឺដើម្បីការពារការលេចធ្លាយកាបូននៅកន្លែងផ្សេងទៀតនៅក្នុងខ្សែច្រវាក់ផ្គត់ផ្គង់ ហើយថា ពន្ធនេះមានសារសំខាន់សម្រាប់ការផ្តល់មូលនិធិ និងការសម្រេចបាននូវគោលដៅអាកាសធាតុរបស់សហភាពអឺរ៉ុបក្នុងការកាត់បន្ថយការបំភាយឧស្ម័នចំនួន៥៥% នៅត្រឹមឆ្នាំ២០៣០។

ការសិក្សាថ្មីមួយរបស់អង្គការសហប្រជាជាតិ ស្តីពីពាណិជ្ជកម្ម និងការអភិវឌ្ឍបានរកឃើញថា ការយកពន្ធចំនួន៤៤ដុល្លារក្នុងមួយតោននៃការបំភាយកាបូននឹងជួយកាត់បន្ថយការបំពុលពីខ្សែច្រវាក់ផ្គត់ផ្គង់បានពាក់កណ្តាល។ គេបានប៉ាន់ប្រមាណថា ប្រទេសអ្នកមាននឹងរកបាន២,៥ពាន់លានដុល្លារពីពន្ធនេះ ប៉ុន្តែប្រទេសក្រីក្រអាចនឹងខាតបង់រហូតដល់ជិត៦ពាន់លានដុល្លារ។

ប្រទេសអ្នកមានជាច្រើនរួមមានអង់គ្លេស កាណាដា និងសហរដ្ឋអាម៉េរិក បានគាំទ្រគម្រោងការណ៍របស់សហភាពអឺរ៉ុបនេះ ហើយពួកគេ ក៏កំពុងសម្លឹងធ្វើតាមបែបនេះដែរ។ មន្ត្រីសេតវិមានបាននិយាយនៅព្រឹត្តិការណ៍អាកាសធាតុ COP28 ដោយសរសើរគម្រោង CBAM នេះថា ជាការចាប់ផ្ដើមដ៏ភ្លឺស្វាងបំផុតពាក់ព័ន្ធនឹងការកាត់បន្ថយការបំភាយកាបូន។

ចំណែកឥណ្ឌា និងចិនវិញមិនបានគាំទ្រចំពោះផែនការនេះនោះទេ។ រដ្ឋាភិបាលឥណ្ឌា គឺជាអ្នកប្រឆាំងយ៉ាងខ្លាំងចំពោះគំនិតនេះ ហើយអតីតរដ្ឋមន្ត្រីក្រសួងរ៉ែ លោក អារូណា សាម៉ា (Aruna Sharma) បានជំរុញឱ្យរដ្ឋាភិបាលឥណ្ឌាបន្តប្រឆាំងនឹងការយកពន្ធនេះ ប៉ុន្តែលោក ក៏បានជំរុញឱ្យឧស្សាហកម្មត្រូវតែកាត់បន្ថយកម្រិតកាបូនសម្រាប់ទាំងការនាំចេញ និងការផលិតទំនិញក្នុងស្រុកផងដែរ។

ចំណែកមន្ត្រីចិនវិញ គឺលោក លី សួ (Li Shuo) នាយកមជ្ឈមណ្ឌលអាកាសធាតុរបស់ចិននៅវិទ្យាស្ថានគោលនយោបាយសង្គមអាស៊ី បាននិយាយថា បញ្ហានេះ គឺជាការព្រួយបារម្ភយ៉ាងខ្លាំងនៅក្នុងនយោបាយអាកាសធាតុអន្តរជាតិ ហើយថា វាមិនទៅណាឆ្ងាយឡើយ ហើយជីវិតក៏ត្រូវប្រឈមនឹងបញ្ហាដែរ៕

អត្ថបទ៖ សុខ ជា