បច្ចុប្បន្ន អ្នកវិនិយោគមកពីសហគមអឺរ៉ុបកាន់តែច្រើនឡើងៗ បានមកបណ្តាក់ទុនវិនិយោគនៅក្នុងតំបន់អាស៊ីអាគ្នេយ៍ តំបន់អាស៊ាន រាប់ពាន់លានដុល្លារ ប៉ុន្តែ កម្ពុជាហាក់បីដូចជាទទួលបានផលប្រយោជន៍តិចតួចប៉ុណ្ណោះពីការវិនិយោគអឺរ៉ុប។
ក្រុមអ្នកជំនាញសេដ្ឋកិច្ច បានលើកឡើងថា ដើម្បីទាក់ទាញអ្នកវិនិយោគអឺរ៉ុបមកណ្តាក់ទុននៅកម្ពុជាឲ្យបានច្រើននិងស្ថិតស្ថេរយូរអង្វែង កម្ពុជាត្រូវតែពង្រឹងច្បាប់ឲ្យបានល្អប្រសើរថែមទៀត ពង្រីកហេដ្ឋារចនាសម្ព័ន្ធ ប្រព័ន្ធទឹក ភ្លើង ជាមួយនឹងតម្លៃសេវាកម្មល្អប្រសើរ ធៀបនឹងប្រទេសក្នុងតំបន់។
ហើយម្យ៉ាងវិញទៀត កម្ពុជាគួរតែពង្រឹងសមត្ថភាពរបស់ក្រុមហ៊ុនក្នុងស្រុក ជាពិសេសសហគ្រាសធុនតូចនិងមធ្យម ជាកត្តាសំខាន់សម្រាប់ទាក់ទាញវិនិយោគបរទេស ជាពិសេស វិនិយោជគិនពីអឺរ៉ុប។
លោក សុខ ចិន្តាសោភា អគ្គលេខាធិការ នៃក្រុមប្រឹក្សាអភិវឌ្ឍន៍កម្ពុជា ធ្លាប់បានលើកឡើងថាវិនិយោគអឺរ៉ុបមានការចាប់អារម្មណ៍ធ្វើការវិនិយោគនៅកម្ពុជាណាស់ ប៉ុន្តែ ពួកគេត្រូវធ្វើឲ្យប្រាកដថា វិស័យឯកជនក្នុងស្រុកមានសក្តានុពលគ្រប់គ្រាន់ជាមុនសិន មុននឹងធ្វើការធ្វើវិនិយោគ។
សហភាពអឺរ៉ុបជាវិនិយោគិនដ៏ធំនៅតំបន់អាស៊ីអាគ្នេយ៍ ប៉ុន្តែ កម្ពុជាហាក់ទទួលបានផលប្រយោជន៍តិចតួចណាស់ពីសហភាពអឺរ៉ុប។ យ៉ាងណា អឺរ៉ុបនៅតែចាប់អារម្មណ៍វិនិយោគនៅកម្ពុជា។
លោក តែ តាំងប៉ ប្រធានសម្ព័ន្ធសមាគមសហគ្រាសខ្នាតតូច មធ្យមកម្ពុជា មានប្រសាសន៍ថា កម្ពុជាបានត្រៀមខ្លូនជាស្រេចក្នុងការសហការវិនិយោគជាមួយវិនិយោគិនបរទេស នៅពេលកម្ពុជាបានចូលក្នុងសហគមន៍សេដ្ឋកិច្ចអាស៊ាន ដែលមានទីផ្សារធំ និងមានប្រជាជន ៦៣០លាននាក់។ អ្វីដែលសហគ្រាសធុនតូចនិងមធ្យមត្រូវការ គឺការមកដាក់ទុនវិនិយោគពីបរទេស ព្រោះកម្ពុជាមានវត្ថុធាតុដើម និងអាចជួយសម្រួលដល់វិនិយោគិនបរទេសក្នុងការធ្វើប្រតិបត្តិការ។
របាយការណ៍ស្ទាបស្ទង់មតិរបស់សភាពាណិជកម្ជកម្មអឺរ៉ុបនៅកម្ពុជា ស្តីពីបរិយាកាសធ្វើអាជីវកម្មកាលពីឆ្នាំ២០១៥ មានតំណាង៧២នាក់ ភាគច្រើនសុទ្ធសឹងជាសហគ្រាសធុនតូចនិងធម្យមក្នុងស្រុក គ្រប់គ្រងដោយវិនិយោគិនបរទេស កំពុងធ្វើប្រតិបត្តិការនៅកម្ពុជា ៧៩% លើកឡើងថា តម្លៃពលកម្មទាបគឺជាអត្ថប្រយោជន៍ដែលមានលក្ខណៈប្រកួតប្រជែងសម្រាប់កម្ពុជា បើប្រៀបនឹងប្រទេសក្នុងតំបន់អាស៊ាន។
ប៉ុន្តែ ៥៣% ត្រូវបានរកឃើញថា កង្វះខាតផ្នែកធនធានមនុស្សជាឧបសគ្គចម្បងសម្រាប់ការធ្វើពាណិជ្ជកម្មនៅកម្ពុជា។
យ៉ាងណាក៏ដោយ ៨១% នៃអ្នកត្រូវបានស្ទង់មតិ អះអាងពីការបង្កើនសកម្មភាពប្រតិបត្តិការនៅក្នុងឆ្នាំ២០១៦នេះ បើទោះបីជា ៥១% នៃអ្នកត្រូវបានស្ទាបស្ទង់គិតថា ស្ថានភាពការធ្វើអាជីវកម្មរបស់គេនឹងមានការប្រែប្រួល។
ទំហំពាណិជ្ជកម្មទ្វេភាគីរវាងកម្ពុជា និងអឺរ៉ុបមានជាង ៣ពាន់លានដុល្លារក្នុងឆ្នំា២០១៤។ វិនិយោគដោយផ្ទាល់របស់អឺរ៉ុបនៅកម្ពុជាក្នុងឆ្នាំ២០១៥ មានទំហំប្រមាណជិត ៨០លានដុល្លារអាមេរិក៕
