ដើមឈើនៅតាមសួនក្នុងទីក្រុងញ៉ូដេលី នឹងត្រូវកាប់ទុកធ្វើឧស បូជាសពអ្នកកើតកូវីដ-១៩

នៅក្នុងប្រទេសឥណ្ឌាឈើ ឬ អុស ត្រូវបានគេយកមកប្រើប្រាស់សម្រាប់ការបូជាសព ហើយនៅអំឡុងពេលនៃការផ្ទុះរីគរាលដាលនៃកូវីដ-១៩ នៅក្នុងប្រទេសឥណ្ឌា ការបូជាសាកសពមនុស្សរាប់ពាន់នាក់ គឺត្រូវធ្វើឡើងជារៀងរាល់ថ្ងៃ ដែលវាកំពុងត្រូវការអុសជាច្រើនបន្ថែមទៀតសម្រាប់ការបូជាសពដែលបានស្លាប់ដោយសារកូវីដ១៩។ តាមប្រព័ន្ធសារព័ត៌មានអន្តរជាតិជាច្រើនដែលបានចុះផ្សាយ បានឲ្យដឹងថា ការបូជាសាកសពអ្នកស្លាប់ដោយសារតែកូវីដ-១៩ គឺវាមានចំនួនច្រើនពេក ម្យ៉ាងទៀតគេមិនមានការរៀបចំបូជាសពដាក់ក្នុងឡត្រឹមត្រូវនោះទេ ពោលគឺគេយកសពមកតម្រៀបក្បែរៗគ្នានៅកន្លែងទីវាល ហើយដាក់អុស និងភ្លើងដុតយកតែម្ដង។ តួលេខ ដែលបានបង្ហាញកាលពីថ្ងៃអង្គារទី ២៧ មេសា បានឲ្យដឹងថា ប្រទេសឥណ្ឌាមានអ្នកឆ្លងកូវីដ-១៩ ករណីថ្មីចំនួន ជាង៣២ម៉ឺននាក់ ខណៈដែលអ្នកស្លាប់មានជាង២ពាន់៧រយនាក់ក្នុង១ថ្ងៃ។ សរុបគិតរហូតមកទល់ពេលនេះ អ្នកស្លាប់ដោយសារកូវីដ-១៩ នៅឥណ្ឌាកើនឡើងដល់ទៅ ២០ម៉ឺននាក់ហើយ ខណៈអ្នកឆ្លងសរុបមានជាង១៧លាននាក់។

មានប្រទេសធំជាច្រើនដូចជា អាមេរិក សហភាពអឺរ៉ុប អង់គ្លេស និង ចិនជាដើម បានប្រកាសថានឹងជួយឥណ្ឌាក្នុងការប្រយុទ្ធប្រឆាំងនឹងព្យុះកូវីដ-១៩ ដែលកំពុងវាយប្រហារយ៉ាងខ្លាំងនៅក្នុងប្រទេសឥណ្ឌាពេលនេះ។

ជាក់ស្ដែង ជំនួយពីប្រទេសអង់គ្លេស ដែលជាការផ្គត់ផ្គង់សម្ភារសុខាភិបាល រួមមាន ម៉ាស៊ីជំនួយដង្ហើមចំនួន១០០គ្រឿង ឧបករណ៍អុកស៊ីហ្សែន ៩៥គ្រឿង បានដឹកទៅដល់ប្រទេសឥណ្ឌាហើយ នៅថ្ងៃទី ២៧ ខែមេសា។ ខណៈដែលប្រទេសបារាំងវិញក៏កំពុងបញ្ជូនឧបករណ៍ផលិតអុកស៊ីហ្សែន ដែលអាចប្រើប្រាស់សម្រាប់គ្រែអ្នកជំងឺ ២៥០គ្រែផងដែរ។

ប្រទេសឥណ្ឌា មានផែនការនឹងបើកយុទ្ធនាការចាក់វ៉ាក់សាំងសម្រាប់មនុស្សពេញវ័យទាំងអស់ចាប់ពីថ្ងៃទី ០១ ខែឧសភាតទៅ ហើយប្រទេសនេះ ក៏កំពុងចរចាជាមួយនឹងអាមេរិកដែរ ដែលអាមេរិកបាននិយាយថា នឹងចែករំលែកវ៉ាក់សាំង AstraZeneca ចំនួន៦០លានដូសមកឲ្យបណ្ដាប្រទេសដទៃទៀត ដែលកំពុងខ្វះខាត។

សូមបញ្ជាក់ថា ប្រទេសឥណ្ឌាក៏ជាប្រទេសមានការផលិតវ៉ាក់សាំងកូវីដ-១៩ដែរ ប៉ុន្ដែ ដោយសារតែតម្រូវការវ៉ាក់សាំងមានច្រើនពេក ហើយដោយសារតែការផលិតបានជួបបញ្ហាកង្វះវត្ថុធាតុដើម ទើបធ្វើឲ្យការផលិតវ៉ាក់សាំងរបស់ប្រទេសនេះ ជួបបញ្ហា៕