ការបើកជើងហោះហើរបន្ថែមនៅមានសញ្ញាតិចតួចនៅឡើយ ខណៈតម្លៃសំបុត្រទៅមកកម្ពុជា-ចិននៅតែកើនខ្ពស់ដដែល

នៅសល់តែជាង១០ថ្ងៃទៀតប៉ុណ្ណោះគម្រោងបើកទទួលភ្ញៀវទេសចរបរទេស ដែលបានចាក់វ៉ាក់សាំងកូវីដ-១៩ រួចរបស់រាជរដ្ឋាភិបាល នឹងឈានចូលមកដល់។ ប៉ុន្តែ បច្ចុប្បន្នពុំទាន់មានក្រុមហ៊ុនអាកាសចរណ៍ណាមួយ ប្រកាសពីការបើកជើងហោះហើរពីកម្ពុជាទៅកាន់បណ្តាប្រទេសក្នុងតំបន់ និងលើពិភពលោកគួរឲ្យកត់សម្គាល់ ដូចបណ្តាប្រទេសផ្សេងៗនោះទេ។ អ្នកនាំពាក្យរូបនេះ បានបន្ថែមថា បច្ចុប្បន្នការដឹកជញ្ជូនអ្នកដំណើរតាមជើងយន្តហោះនៅមានចំនួនតិចតួចនៅឡើយ បើធៀបនឹងពេលកន្លងមកដែលមិនទាន់មានការរំខានពីជំងឺកូវីដ-១៩ គឺធ្លាប់មានជាង២០០ជើងឯណោះក្នុង១ថ្ងៃ ។

អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលឯកឧត្តម ស៊ីន ចាន់សិរីវុត្ថា បានបញ្ជាក់ប្រាប់ខេមបូណូមីសថា ដំណឹងនៃការបើកជើងហោះហើរទៅមកកម្ពុជា ពីសំណាក់ក្រុមហ៊ុនអាកាសចរណ៍នៅកម្ពុជា ហាក់នៅមានសញ្ញាតិចតួចនៅឡើយទេ។ ទោះជាយ៉ាងនេះក្តី ឯកឧត្តម អាចនឹងមានជើងហោះហើរទៅមកកម្ពុជាច្រើននៅអំឡុងខែធ្នូ ខាងមុខនេះ។ 

ដោយឡែកពាក់ព័ន្ធតម្លៃសំបុត្រយន្តហោះទៅមកកម្ពុជា-ចិន ត្រូវបានឯកឧត្តម ស៊ីន ចាន់សិរីវុត្ថា អះអាងមកទល់ពេលនេះមិនទាន់មានការថយចុះនៅឡើយទេ ពោលគឺនៅចន្លោះពី៥ពាន់ដុល្លារទៅ១ម៉ឺនដុល្លារក្នុងមួយជើងដដែល។ ឯកឧត្តម បានបន្ថែមថា មូលហេតុដែលធ្វើឲ្យតម្លៃសំបុត្រទៅមកកម្ពុជា-ចិន ឡើងថ្លៃខ្ពស់កប់ពពកនេះ គឺដោយសារតម្រូវការកើនឡើងខ្ពស់ និងការផ្គត់ផ្គង់ធ្លាក់ចុះ បន្ទាប់ពីរដ្ឋាភិបាលចិនដាក់ចេញវិធានការគ្មានកូវីដ។ ឯកឧត្តម គូសបញ្ជាក់ថា កន្លងមក ក្រុមជនជាតិចិន ដែលចង់ចាកចេញពីកម្ពុជា បាននាំគ្នាទៅតវ៉ាមុខស្ថានទូតចិនប្រចាំនៅកម្ពុជា ដើម្បីសុំការអន្តរាគមន៍លើបញ្ហានេះ តែពុំទទួលបានផលនោះទេ។

គួររំលឹកថា នៅថ្ងៃទី៣០ ខែវិច្ឆិកា ខាងមុខនេះរាជរដ្ឋាភិបាលកម្ពុជានឹងទទួលភ្ញៀវទេសចរបរទេស ដែលបានចាក់វ៉ាក់កូវីដ-១៩ រួចមកពីបណ្តាប្រទេសផ្សេងៗ ដើម្បីជួយស្តារ និងជំរុញកំណើនវិស័យទេសចរណ៍ និងសេដ្ឋកិច្ចរបស់កម្ពុជាដែលរងផលប៉ះពាល់ដោយសារវិបត្តិកូវីដ-១៩។ សម្រាប់គម្រោងបើកនេះ រាជរដ្ឋាភិបាលបានជ្រើសរើសយកខេត្តចំនួនពីរ គឺខេត្តព្រះសីហនុ និងខេត្តកោះកុង ខណៈខេត្តសៀមរាបជាគោលដៅបន្ទាប់៕