ប្រធានសភាជាន់ទាបរបស់រុស្ស៊ីកាលពីថ្ងៃទី ២៥ឧសភា បានថ្កោលទោសប្រទេសជប៉ុនថាជា ប្រទេសដែលប្រឆាំងនឹងទីក្រុងម៉ូស្គូ ទាំងដែលខ្លួនកំពុងទទួលបានផលប្រយោជន៍ពីរុស្ស៊ីនៅក្នុងគម្រោងទាញយកថាមពលអណ្ដូងប្រេងSakhalin2 នៅលើទឹកដីរុស្ស៊ី។
កាលពីពេលមុនលោក វីឆេសឡូវ វ៉ូឡូឌីន (Vyacheslav Volodin) ប្រធានសភាជាន់ទាប (Duma) របស់រុស្ស៊ី បានយល់ព្រមទទួលការវិនិយោគពីប្រទេសជប៉ុន ចក្រភពអង់គ្លេស និង ហូឡង់ ក្នុងគម្រោងទាញយក ប្រេង និង ឧស្ម័ន Sakhalin2 នៅតំបន់ចុងបូព៌ានៃប្រទេសរុស្ស៊ី ខណៈគម្រោងនេះទទួលបានប្រាក់ចំណេញដ៏ធំសម្បើម។ នេះបើយោងតាមការចុះផ្សាយគេហទំព័ររបស់សភាជាន់ទាបរុស្ស៊ី។
ថ្មីៗនេះលោក Volodin បានទទូចឲ្យក្រុមហ៊ុននៅក្នុងប្រទេសទាំង ៣ ដែលមានភាគហ៊ុននៅក្នុងគម្រោងថាមពល Sakhalin2 គួរតែលក់ចំណែកភាគហ៊ុនទាំងអស់របស់ខ្លួនទៅឱ្យក្រុមហ៊ុនថាមពលរដ្ឋរបស់រុស្ស៊ី Gazprom ឬលក់ទៅឱ្យសហគ្រាសសម្ព័នមិត្តរបស់ខ្លួនវិញទៅ ខណៈប្រទេសទាំងនេះបានប្រឆាំង និង បានសហការចូលរួមដាក់ទណ្ឌកម្មជាមួយសហភាពអឺរ៉ុបយ៉ាងចាស់ដៃ ទៅលើទីក្រុងម៉ូស្គូ ក្រោមហេតុផលថា ម៉ូស្គូបានចូលលុកលុយនៅអ៊ុយក្រែន។
អត្ថបទគួរអាន
គួរកត់សម្គាល់ថា ពាណិជ្ជករជប៉ុនរួមមានក្រុមហ៊ុន Mitsui &Co បានកាន់កាប់ភាគហ៊ុន ១២,៥% និង ក្រុមហ៊ុន Mitsubishi Corp កាន់កាប់ ១០% នៃគម្រោងថាមពល Sakhalin2។ ក្នុងនោះ ក្រុមហ៊ុន Gazprom កាន់កាប់ប្រហែល ៥០% ខណៈដែលក្រុមហ៊ុន Shell ដែលមានមូលដ្ឋាននៅចក្រភពអង់គ្លេសគ្រប់គ្រងប្រហែល ២៧,៥% ។
ទោះយ៉ាងណា ក្រុមហ៊ុន Shell របស់ចក្រភពអង់គ្លេសបានប្រកាសថា ខ្លួននឹងចាកចេញពីគម្រោង Sakhalin2 ហើយ ដោយសារតែការឈ្លានពានរបស់រុស្ស៊ីលើអ៊ុយក្រែន។ ក្រុមហ៊ុនថាមពលដ៏ធំនេះ ត្រូវបានគេរាយការណ៍ថា កំពុងពិភាក្សាអំពីការលក់ភាគហ៊ុនរបស់ខ្លួនទៅឱ្យសហគ្រាសចិន។
យ៉ាងណាមិញ ថ្វីបើប្រទេសជប៉ុនបានដាក់ទណ្ឌកម្មជាច្រើនទម្រង់ ទៅលើទីក្រុងម៉ូស្គូ ដូចជា ការកាត់ផ្តាច់ការនាំចូលប្រេងពីរុស្ស៊ីជាដើម ប៉ុន្តែប្រទេសនេះបានសម្រេចចិត្តរក្សាទុកផលប្រយោជន៍របស់ខ្លួននៅក្នុងគម្រោងថាមពលSakhalin2 ដើម្បីជៀសវាងការរំខានដែលអាចកើតមាននៅក្នុងការផ្គត់ផ្គង់ឧស្ម័នក្នុងប្រទេសរបស់ខ្លួន។
គួរបញ្ចាក់ថា គម្រោងថាមពល Sakhalin2 ផលិតបានឧស្ម័នធម្មជាតិរាវចំនួនជាង ១០ លានតោនក្នុងមួយឆ្នាំ ខណៈថាមពលដែលទាញយកបានប្រហែល ៥០% ទៅ ៦០% នៃបរិមាណដែលបញ្ជួនទៅផ្គត់ផ្គង់នៅប្រទេសជប៉ុន។ គម្រោងនេះ មានចំណែកស្ទើរតែអាចគ្របដណ្តប់បានទាំងស្រុងលើតម្រូវការផ្គត់ផ្គង់ឧស្ម័នធម្មជាតិរាវរបស់ប្រទេសជប៉ុន ខណៈខ្លួនបាននាំចូលបន្ថែម ប្រហែល ១០% ប៉ុណ្ណោះពីរុស្ស៊ី។
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
