សម្តេច ហ៊ុន ម៉ាណែត អះអាងថា កម្ពុជានឹងមានប្រជាជនវ័យចាស់ច្រើនជាងវ័យក្មេងនៅឆ្នាំ២០៥០

ថ្លែងនាពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារ ឆ្នាំ២០២៤ របស់ក្រសួងផែនការនៅព្រឹកថ្ងៃទី៩ ខែមេសា ឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានគូសបញ្ជាក់ថា កម្ពុជានឹងជួបប្រឈមនឹងបញ្ហាមានប្រជាជនវ័យចាស់ច្រើនជាងវ័យក្មេងនៅត្រឹមឆ្នាំ២០៥០ ដែលជាឆ្នាំគោលដៅប្រែក្លាយកម្ពុជាជាប្រទេសមានចំណូលខ្ពស់។ ប្រមុខរាជរដ្ឋាភិបាលកម្ពុជាបានគូសបញ្ជាក់ថា ផ្អែកតាមសេណារីយ៉ូនៃលទ្ធផលជំរឿននៅឆ្នាំ២០១៩ នៅឆ្នាំ២០៥០ ខាងមុខ កម្ពុជានឹងមានប្រជាជនអាយុក្រោម១៥ឆ្នាំប្រមាណ១៥,៥% និងអាយុចាប់ពី១៥-៦៥ឆ្នាំ មានប្រមាណ៦៧,៥%និងប្រជាជនមានអាយុ៦៥ឆ្នាំឡើងមានប្រមាណ១៧,១%។ ទោះបីនៅឆ្នាំ២០៥០ កម្ពុជាអាចមានប្រជាជនវ័យចាស់ច្រើនជាងវ័យក្មេងក៏ដោយ តែសម្តេចធិបតីអះអាងថា បញ្ហាកង្វះកម្លាំងពលកម្មនៅក្រោយឆ្នាំ២០៥០ មិនបានចោទជាបញ្ហាធ្ងន់ធ្ងរដល់កម្ពុជានោះទេ។

បើទោះបីទិន្នន័យជំរឿនបង្ហាញថាកម្ពុជានៅមិនទាន់មានបញ្ហាចោទរឿងខ្វះកម្លាំងពលកម្មក្តី ប៉ុន្តែសម្តេចធិបតី សង្កេតឃើញមានសញ្ញានៃការថយចុះរវាងគម្លាតអ្នកដែលមានអាយុចាស់ និងអ្នកដែលពេញកម្លាំង គឺចាប់ផ្តើមកើន ដូច្នេះហើយប្រសិនបើអត្រាកំណើតកាន់តែថយចុះនោះ កម្ពុជាអាចនឹងមានបញ្ហាប្រឈមផងដែរ។ ទន្ទឹមនឹងនេះ សម្ដេចធិបតី លើកទឹកចិត្តដល់គូរស្វាមីភរិយា ដែលមានលទ្ធភាពសេដ្ឋកិច្ច គួរយកកូនឱ្យបានច្រើនលើសពីចំនួនកំណត់ ដើម្បីជៀសវាងនូវហានិភ័យកង្វះពលកម្ម។

ដើម្បីទាញយកអត្ថប្រយោជន៍ពីភាគលាភប្រជាសាស្ត្រ និងភាគលាភយេនឌ័រឱ្យបានជាអតិបរមា និងបញ្ចៀសបញ្ហាកង្វះកម្លាំងពលកម្ម និងប្រជាជនវ័យចាស់មានចំនួនច្រើនជាងប្រជាជនវ័យ ក្មេងនៅកម្ពុជាក្រោយឆ្នាំ២០៥០ សម្តេចធិបតី ហ៊ុន ម៉ាណែត បានស្នើឱ្យក្រសួងផែនការ គិតគូរឱ្យបានល្អិតល្អន់ឡើងវិញអំពីនិន្នាការប្រជាសាស្ត្រ និងបម្រែបម្រួលរចនាសម្ព័ន្ធអាយុ ព្រមទាំងសេណារីយ៉ូ នៃយន្តការគាំទ្រសង្គមដល់យុវវយ និងគ្រួសារនៅពេលធ្វើបច្ចុប្បន្នភាពគោលនយោបាយជាតិប្រជាជន ២០១៦-២០៣០៕

អត្ថបត សោម ស្រីពេជ្រ