ក្នុងរបាយការណ៍ថ្មីមួយ ដែលមានចំណងជើងថា «កុមារភាពត្រូវបានបំផ្លាញ» អង្គការ សង្គ្រោះកុមារ បានរកឃើញថា អត្រាមានផ្ទៃពោះរបស់កុមារជំទង់នៅកម្ពុជា កើនឡើងពាក់កណ្ដាល ក្នុងរយៈពេល ៤ឆ្នាំចុងក្រោយនេះ។
ក្នុងសេចក្ដីប្រកាសព័ត៌មាន អង្គការ សង្គ្រោះកុមារ ឲ្យដឹងថា ចន្លោះពីឆ្នាំ២០១០ និង ២០១៤ ការអង្កេតប្រជាសាស្ត្រសុខភាពកម្ពុជា បានរាយការណ៍អំពីការកើនឡើងនូវការមានផ្ទៃពោះរបស់កុមារីជំទង់ពី ៨% ទៅ ១២% គឺកើនឡើងពាក់កណ្ដាល (៥០%)។
បើតាមអង្គការ សង្គ្រោះកុមារ ដដែល ការមានផ្ទៃពោះរបស់កុមារីវ័យជំទង់នៅតំបន់ជនបទនៃប្រទេសកម្ពុជា មានអាត្រាបីដង លើសកុមារីជំទង់រស់នៅតំបន់ទីប្រជុំជន។
អត្ថបទគួរអានផ្សេងទៀត !!
លោកស្រី អេលីហ្សាបេត ភៀស (Elizabeth Pearce) នាយិកាអង្គការ សង្គ្រោះកុមារ មានប្រសាសន៍ថា៖ «កុមារគ្រប់រូបមានសិទ្ធិទទួលបានកុមារភាពប្រកបដោយសុវត្ថិភាព និងរីករាយ មិនថាកុមារនោះរស់នៅទីណាក្នុងពិភពលោកនេះក៏ដោយ។ កុមារគ្រប់រូបមានសិទ្ធិទទួលបានឱកាស ដើម្បីអភិវឌ្ឍសក្តានុពលនៅពេលធំ»។
លោកស្រី ភៀស បន្ថែមដូច្នេះថា ៖ «ប៉ុន្តែ សម្រាប់កុមារជំទង់ចំនួន ១២% នៅប្រទេសកម្ពុជាមិនទទួលបានសិទ្ធិទាំងនោះទេ។ ពួកគេបានក្លាយទៅជាម្តាយទាំងនៅកុមារ មុននឹងពួកគេក្លាយជាមនុស្សពេញវ័យ។ វាគឺជាទំនោរដែលរីករាលដាលមួយ ដែលបំផ្លាញកុមារភាពរបស់កុមារីយ៉ាងច្រើននៅក្នុងប្រទេសកម្ពុជា»។
👉 គួរអាន ! តួលេខសកលអំពីស្ថានភាពកុមារដែលអ្នកគួរយល់ដឹង !
ក្មេងស្រីជំទង់ដែលឆាប់រៀបការនិងមានផ្ទៃពោះប្រឈមនឹងផលវិបាកច្រើន
យោងតាមអង្គការសុខភាពពិភពលោក ភាពសាំញ៉ាំពីការមានផ្ទៃពោះនិងការសម្រាលកូនជាមូលហេតុចំបងទីពីរនៃការស្លាប់បាត់បង់ជីវិត សម្រាប់កុមារីវ័យជំទង់ អាយុចន្លោះពី ១៥ ទៅ ១៩ឆ្នាំ នៅលើពិភពលោក។
ហើយកុមារដែលកើតចេញពីម្តាយដែលមានវ័យជំទង់ ប្រឈមនឹងគ្រោះថ្នាក់នៃការបាត់បង់ជីវិតខ្ពស់ជាងកុមារដែលកើតចេញពីម្តាយដែលមានអាយុចន្លោះពី ២០ ទៅ ២៤ឆ្នាំ៕
