ថៃក្លាយជាប្រទេសទី២ នៅអាស៊ាន ដែលបានរកឃើញអ្នកវិជ្ជមានកូវីដ១៩ បំប្លែងថ្មី អូមីក្រុង

អគ្គនាយកនៃនាយកដ្ឋានវិទ្យាសាស្ត្រ និងវេជ្ជសាស្ត្រថៃ លោក ស៊ូផាឃីត ស៊ីរីឡាក់ (Supakit Sirilak) បាននិយាយថា បុរសរូបនេះបានចូលមកដល់ប្រទេសថៃ នៅថ្ងៃទី៣០ខែវិច្ឆិកា ហើយត្រូវបានយកសំណាក និង រង់ចាំទទួលលទ្ធផល ដោយការធ្វើតេស្តពីម៉ាស៊ីន RT-PCR។

ក្រោយពីបានរកឃើញមេរោគកូវីដ១៩ប្រភេទបំប្លែងខ្លួនថ្មីអូមីក្រុង ដោយម៉ាស៊ីន RT-PCR អាជ្ញាធរថៃបានប្រមូលយកសំណាករបស់ បុរសអ្នកជំនួញរូបនេះ មកធ្វើការពិសោធរកទិន្នន័យបន្ថែមទៀតនៅនាយកដ្ឋានវិទ្យាសាស្ត្រ និងវេជ្ជសាស្ត្រថៃ មុននឹងបញ្ជូនទៅព្យាបាលនៅមន្ទីរពេទ្យ។

បើតាមលោក ស៊ូផាឃីត ស៊ីរីឡាក់ដដែល លទ្ធផលដែលចេញដោយម៉ាស៊ីន RT-PCR បង្ហាញថា អ្នកដែលមានផ្ទុកកូវីដ១៩អូមីក្រុងខាងលើ គឺមានអត្រាច្បាស់លាស់ដល់ ៩៩,៩២% ឯណោះ។ ដូច្នេះ លោកកំពុង ស្នើសុំនៅរាជរដ្ឋាភិបាលថៃ កុំឲ្យជំនួសការធ្វើតេស្តអ្នកដំណើរដោយម៉ាស៊ីន RT-PCR មកជាការធ្វើតេស្តរហ័សនៅពេលនេះ ព្រោះលោករំពឹងថា ប្រទេសថៃប្រាកដជានឹងរកឃើញករណីមេរោគបំប្លែងថ្មី អូមីក្រុងជាបន្តបន្ទាប់ទៀត។ 

គួរជម្រាបថា បុរសអ្នកជំនួញថៃដែលមានផ្ទុកកូវីដ១៩អូមីក្រុងរូបនេះ បានប៉ះពាល់ផ្ទាល់ជាមួយបុគ្គលិកអាកាសយាន្តដ្ឋានចំនួនពីរនាក់ និងបុគ្គលិកសណ្ឋាគារចំនួន១៧នាក់។ បច្ចុប្បន្ន អ្នកទាំងនោះត្រូវបានអាជ្ញាធរថៃប្រមូលយកសំណាកមកពិនិត្យនឹងកំពុងរង់ចាំលទ្ធផលផ្លូវការ។

សូមបញ្ជាក់ថា កូវីដ១៩បំប្លែងថ្មីអូមីក្រុង បានរាលដាលទៅដល់ជាង ៤០ប្រទេសជុំវិញពិភពលោកហើយ ខណៈដែលបច្ចុប្បន្ន មានប្រទេសចំនួន២ នៅតំបន់អាស៊ានដែលបានរកឃើញមេរោគប្រភេទថ្មីនេះ ក្នុងនោះមាន ម៉ាឡេស៊ីរកឃើញដំបូងគេ បន្ទាប់មកគឺប្រទេសថៃតែម្តង។

គិតត្រឹមថ្ងៃទី០៦ ខែធ្នូ ឆ្នាំ២០២១ ថៃមានអ្នកឆ្លងកូវីដ១៩សរុប ជាង២លាន១សែននាក់ រីឯអ្នកស្លាប់មានជាង ២ម៉ឺននាក់ ហើយក្នុងនោះអត្រាឆ្លងជាមធ្យមមានជិត ៥ពាន់នាក់ក្នុងមួយថ្ងៃៗ។ នេះបើតាមទិន្នន័យដែលកត់ត្រាដោយទីភ្នាក់ងារសារព័ត៌មានរ៉យទ័រ៕