លោកឧកញ៉ា ចេង ខេង អគ្គនាយកនៃក្រុមហ៊ុនអចលនទ្រព្យCPL បានឲ្យដឹងថា នៅក្នុងអំឡុងពេលវិបត្តិកូវីដ១៩នេះ សម្រាប់រាជធានីភ្នំពេញ ការទិញដូរអចលនទ្រព្យនៅតែមានសកម្មភាពជាធម្មតា នៅទូទាំងខណ្ឌទាំង១៤ តែមានខណ្ឌ៣ ហាក់មមាញឹកជាងគេបន្តិច។
យ៉ាងណាមិញ លោកឧកញ៉ា ចេង ខេង បានបញ្ជាក់ថា ថ្វីត្បិតតែ នៅតែក្នុងអំឡុងពេលនេះ ជាឱកាសល្អសម្រាប់ទិញដូរអចលនវត្ថុ ដោយសារមានតម្លៃធូរថ្លៃបន្តិចមែន តែអ្នកទិញទាំងអស់ត្រូវតែចេះពិនិត្យមើលឲ្យបានល្អិតល្អន់មុននឹងសម្រេចចិត្តទិញ ព្រោះថាអាចទិញក្នុងតម្លៃថ្លៃជាងទីផ្សារ។លោកឧកញ៉ាថា «យើងជួបហើយមនុស្សជាច្រើន ពេលខ្លះគាត់ទៅមើកគាត់ស្រលាញ់ ហើយគាត់គិតថា អាហ្នឹងវាជាក្តីសុបិនរបស់គាត់ ហើយគាត់បានរាងអញ្ចឹងយូរហើយ គាត់មានលុយគាត់ទៅទិញប្រឹប ប៉ុន្តែគាត់ទិញបានដឹងថា តម្លៃដែលគាត់ទិញហ្នឹងវាថ្លៃជាងទីផ្សារអ៊ីចឹងទៅ»។
អត្ថបទគួរអាន
ហេតុដូចនេះ លោកឧកញ៉ា ចេង ខេង តែងតែផ្តល់យោបល់ដល់ពលរដ្ឋដែលចង់ទិញដូរអចលនទ្រព្យ ត្រូវតែមានការពិភាក្សា និងប្រឹក្សាយោបល់ជាមួយអ្នកជំនាញវាយតម្លៃអចលនវត្ថុ ឲ្យបានច្បាស់លាស់គ្រប់ជ្រុងជ្រោយជាមុនសិន មុននឹងសម្រេចចិត្តវិនិយោគទៅអចលនវត្ថុទាំងនោះ ខណៈដែលភ្នាក់ងារវាយតម្លៃអចនវត្ថុ ត្រូវតែប្រើជំនាញរបស់ខ្លួនឲ្យបានត្រឹមត្រូវ ដើម្បីរក្សាគុណតម្លៃរបស់ខ្លួនក្នុងវិស័យនេះ។
យោងតាមរបាយការណ៍ ពីក្រសួងរៀបចំដែនដីនគររូបនីយកម្មនិងសំណង់បានបង្ហាញថា ការវិនិយោគក្នុងវិស័យសំណង់នៅទូទាំងប្រទេស នៅក្នុងរយៈពេលត្រីមាសទី១ឆ្នាំ២០២០ នេះ មានចំនួន១.១១៦គម្រោង ដែលមានតម្លៃទុនវិនិយោគប្រមាណជិត២៦០០លានដុល្លារ ខណៈដែលឆ្នាំ២០១៩ មាន១.០៩៩គម្រោង មានទុនវិនិយោគប្រមាណជាង១៧០០លានដុល្លារ មានការកើនឡើងប្រមាណជាង៥១%៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
