សោម ស្រីពេជ្រ

ក្រោយរដ្ឋាភិបាលកម្ពុជា និងចិន បានចុះហត្ថលេខាលើពិធីសារ ស្តីពីការនាំចេញផ្លែទុរេនស្រស់ទៅកាន់ទីផ្សារចិន ម្ចាស់ចម្ការ និងក្រុមហ៊ុនកែច្នៃ និងវេចខ្ចប់មួយចំនួនកំពុងមមាញឹកក្នុងការដាក់ពាក្យស្នើសុំបញ្ជីនៅអគ្គនាយកដ្ឋានកសិកម្ម ដើម្បីឈានទៅរកការនាំចេញទុរេនទៅកាន់ទីផ្សារចិន ជាផ្លូវការ។ ទោះបីមកទល់ពេលនេះ កម្ពុជា មិនទាន់អាចនាំចេញទុរេនទៅកាន់ទីផ្សារចិន ជាផ្លូវការក៏ដោយ តែយើងមានក្រុមហ៊ុនមួយចំនួនបានចុះមកប្រមូលទិញ និងសិក្សាលទ្ធភាពម៉ៅចម្ការទុរេននៅកម្ពុជា ដើម្បីនាំចេញទៅកាន់ទៅទីផ្សារជិតខាង និងបន្តនាំចេញទៅកាន់ទីផ្សារចិន។