សឿន វណ្ណឌេត

លោកជំទាវ ជា សិរី ទេសាភិបាលរងធនាគារជាតិនៃកម្ពុជាអះអាងថា ធនាគារជាតិពុំបានអនុញ្ញាតឲ្យជនជាតិចិន ចាយក្រដាសប្រាក់យ័នសម្រាប់ទូទាត់ថ្លៃទំនិញ ឬសេវាកម្មនៅកម្ពុជានោះទេ។ ការចេញមកអះអាងបែបនេះធ្វើឡើងក្រោយមានសារព័ត៌មានមួយចំនួនចុះផ្សាយថា កម្ពុជាអនុញ្ញាតឲ្យជនជាតិចិនអាចប្រើក្រដាសប្រាក់ ឬលុយយ័នរបស់ចិនដោយផ្ទាល់ក្នុងការទូទាត់ថ្លៃទំនិញ ឬសេវាកម្មនៅក្នុងទីផ្សារកម្ពុជា ហើយព័ត៌មាននេះត្រូវបានចែកចាយនៅលើបណ្តាញសង្គមនានា ដែលធ្វើឲ្យមហាជនមួយចំនួនមានការយល់ច្រឡំ។