យោងតាមរបាយការណ៍របស់ការិយាល័យអង្គការសហប្រជាជាតិ ទទួលបន្ទុកផ្នែកគ្រឿងញៀន និងបទល្មើស បង្ហាញថា បទល្មើសប្រព្រឹត្តដោយក្រុមឧក្រិដ្ឋជនឆ្លងដែន ដែលមានការចាត់តាំងនៅអាស៊ីអាគ្នេយ៍ កំពុងបង្កការគំរាមកំហែងកាន់តែខ្លាំងឡើង និងរីករាលដាលកាន់តែឆាប់រហ័សមិនធ្លាប់ជួបក្នុងប្រវត្តិសាស្ត្រ។
សកម្មភាពខុសច្បាប់តាមបណ្ដាញអ៊ីនធឺណិត បានកើនឡើងយ៉ាងគំហុកចាប់តាំងពីផ្ទុះវិបត្តិកូវីដ-១៩ មក ដោយក្នុងនោះប្រទេសនានា នៅក្នុងតំបន់ទន្លេមេគង្គ រួមមានមីយ៉ាន់ម៉ា ឡាវ និងកម្ពុជា បានក្លាយជាទីតាំងឈរជើងដ៏សំខាន់សម្រាប់ក្រុមឧក្រិដ្ឋកម្មរៀបចំប្រតិបត្តិការខុសច្បាប់ រួមមានការឆបោកក្រោមរូបភាពបង្កើតទំនាក់ទំនងស្នេហាបោកប្រាស់ ការវិនិយោគបោកប្រាស់ ការលួចបន្លំរូបិយប័ណ្ណឌីជីថល ឬគ្រីបតូ ការលាងលុយកខ្វក់ និងល្បែងស៊ីសងខុសច្បាប់ជាដើម។
របាយការណ៍ដដែលបានបញ្ជាក់ថា ដោយសារតែបទល្មើសតាមបណ្ដាញអ៊ីនធឺណិតមានទ្រង់ទ្រាយធំ និងអាចកើបលុយបានច្រើនសន្ធឹកសន្ធាប់ និងងាយស្រួល បានជំរុញឱ្យក្រុមឧក្រិដ្ឋជនប្រើប្រាស់គំរូអាជីវកម្មដែលផ្អែកលើសេវាកម្ម និងបច្ចេកវិទ្យាថ្មីៗដើម្បីធ្វើសកម្មភាព។
ពេលនេះក្រុមឧក្រិដ្ឋជនកំពុងប្រើប្រាស់កម្មវិធីផ្ទុកមេរោគ Malware រួមជាមួយបច្ចេកវិទ្យាបញ្ញាសិប្បនិម្មិតជំនាន់ថ្មី Generative AI សម្រាប់បង្កើតរូបភាព ឬវីដេអូក្លែងក្លាយ ដើម្បីធ្វើសកម្មភាពឆបោក។ ទន្ទឹមនេះ ក្រុមឧក្រិដ្ឋជន ក៏បានបង្កើតទីផ្សារអនឡាញខុសច្បាប់ និងប្រើប្រាស់រូបិយប័ណ្ណឌីជីថល ឬគ្រីបតូដើម្បីលាងលុយកខ្វក់ផងដែរ។
របាយការណ៍នេះបានបញ្ជាក់ទៀតថា ជនរងគ្រោះរាប់សែននាក់ត្រូវបានក្រុមហ៊ុនសហគ្រាសរបស់ក្រុមឧក្រិដ្ឋជនជួញដូរទៅកាន់ប្រទេសនានា នៅក្នុងតំបន់ទន្លេមេគង្គ និងចាប់បង្ខំឱ្យធ្វើការនៅតាមទីតាំងប្រព្រឹត្តអំពើឆបោក និងសកម្មភាពខុសច្បាប់ផ្សេងៗ។ ជាទូទៅ ទីតាំងប្រព្រឹត្តអំពើឆបោក និងសកម្មភាពខុសច្បាប់ផ្សេងៗទាំងនេះ ស្ថិតនៅក្នុងកាស៊ីណូ សណ្ឋាគារ តំបន់សេដ្ឋកិច្ចពិសេស និងគម្រោងអភិវឌ្ឍន៍អចលនទ្រព្យជាដើម។
ជាលទ្ធផល ការឆបោកតាមប្រព័ន្ធអ៊ីនធឺណិតបានបន្តកើនឡើងយ៉ាងឆាប់រហ័ស ដែលធ្វើឱ្យជនរងគ្រោះនៅតំបន់អាស៊ីបូព៌ា និងអាស៊ីអាគ្នេយ៍ ខាតបង់ប្រាក់មហាសាលរហូតដល់ទៅ៣៧ពាន់លានដុល្លារអាម៉េរិក ក្នុងឆ្នាំ២០២៣៕
ដោយ: តែម សុខុម
