បណ្ដាមេដឹកនាំបរិស្ថាននៅអាស៊ាន បារម្ភពីកង្វះភាពជាអ្នកដឹកនាំផ្នែកអាកាសធាតុរបស់អាម៉េរិក

ស្របពេលមានការព្រួយបារម្ភខ្លាចសហរដ្ឋអាម៉េរិក ដើរថយក្រោយចេញពីភាពជាអ្នកដឹកនាំអាកាសធាតុពិភពលោក ក្រោមការដឹកនាំរបស់ប្រធានាធិបតីទើបជាប់ឆ្នោត លោក ដូណាល់ ត្រាំ ក្រុមមន្ត្រីបរិស្ថានកំពូលៗអះអាងថា កិច្ចខិតខំប្រឹងប្រែងរបស់ពិភពលោកក្នុងការប្រយុទ្ធប្រឆាំងនឹងបម្រែបម្រួលអាកាសធាតុនឹងនៅតែបន្ត បើទោះបីមាន ឬគ្មានការចូលរួមពីភាគីអាម៉េរិក ក៏ដោយ។

លោក ដូណាល់ ត្រាំ បានឈ្នះការបោះឆ្នោតក្លាយជាប្រធានាធិបតីទី៤៧ របស់សហរដ្ឋអាម៉េរិក កាលពីថ្ងៃទី៦ ខែវិច្ឆិកា កន្លងទៅថ្មីៗនេះ ដោយផ្តួលអនុប្រធានាធិបតីលោកស្រី កាម៉ាឡា ហារីស ហើយលោកនឹងស្បថចូលកាន់តំណែងជាផ្លូវការនៅខែមករា ឆ្នាំ២០២៥ ខាងមុខនេះ។

រដ្ឋមន្ត្រីក្រសួងបរិស្ថានម៉ាឡេស៊ី លោក នីក ណាស់មី (Nik Nazmi) បានលើកឡើងថា ការបោះឆ្នោតនៅសហរដ្ឋអាម៉េរិក បានបន្សល់នូវភាពមិនប្រាកដប្រជាជុំវិញកិច្ចការដោះស្រាយបញ្ហាបម្រែបម្រួលអាកាសធាតុ ប៉ុន្តែពិភពលោកត្រូវតែបន្តបោះជំហ៊ានឆ្ពោះទៅមុខដោយឥតរាថយ។ លោកបានបន្តថា ការបោះឆ្នោតគ្រាន់តែជារឿងបណ្ដោះអាសន្ន ប៉ុន្តែកិច្ចសហប្រតិបត្តិការរបស់ពិភពលោកលើកិច្ចការបម្រែបម្រួលអាកាសធាតុនៅតែជាកិច្ចការដ៏មានសារសំខាន់ខ្លាំង។

កិច្ចប្រជុំកំពូលស្តីពីអាកាសធាតុ COP29 ឆ្នាំ២០២៤ របស់អង្គការសហប្រជាជាតិ ដែលបញ្ចប់នៅថ្ងៃទី២២ ខែវិច្ឆិកា នេះ ផ្តោតលើការធានាបាននូវការប្តេជ្ញាចិត្តផ្ដល់ជំនួយហិរញ្ញវត្ថុថ្មីៗសម្រាប់បណ្ដាប្រទេសដែលងាយរងគ្រោះដោយសារអាកាសធាតុ រួមទាំងអាស៊ីអាគ្នេយ៍ផងដែរ។

ប្រទេសងាយរងគ្រោះទាំងនេះនឹងស្វះស្វែងរកមូលនិធិឱ្យបានលើស១ពាន់លានដុល្លារ ជារៀងរាល់ឆ្នាំនៅត្រឹមឆ្នាំ២០៣០ ដែលខុសគ្នាដូចមេឃ និងដី បើធៀបទៅនឹងការសន្យាផ្ដល់មូលនិធិបច្ចុប្បន្នដែលមានទំហំត្រឹមតែ១០០ពាន់លានដុល្លារ។ តែអ្វីដែលគួរឱ្យកត់សម្គាល់នោះ គឺប្រទេសដែនកោះដ៏តូចសិង្ហបុរីបានសន្យាផ្តល់មូលនិធិរហូតដល់ទៅ៥០០លានដុល្លារ ដើម្បីគាំទ្រដល់គម្រោងបៃតង និងគម្រោងអន្តរកាលឆ្ពោះទៅរកការកាត់បន្ថយការបំភាយឧស្ម័នកាបូនិចចូលទៅក្នុងបរិយាកាសរនៅក្នុងតំបន់អាស៊ី។

គួរបញ្ជាក់ថា លោក ដូណាល់ ត្រាំ ធ្លាប់បានហៅកិច្ចការដោះស្រាយបម្រែបម្រួលអាកាសធាតុថា ជាការបោកបញ្ឆោត និងជាការបោកប្រាស់ ហើយលោកបានដកសហរដ្ឋអាម៉េរិក ចេញពីកិច្ចព្រមព្រៀងទីក្រុងប៉ារីស មុនពេលលោកឡើងកាន់តំណែងជាប្រធានាធិបតីអាម៉េរិក ក្នុងអាណត្តិទី១ ក្នុងឆ្នាំ២០១៧ ហើយលោកបានសន្យាថា លោកនឹងធ្វើបែបនេះនៅពេលលោកឡើងកាន់អំណាចឡើងវិញជាផ្លូវការ៕

ដោយ: តែម សុខុម