ក្រោយចាកចេញជិត៩ឆ្នាំ អង់គ្លេស កំពុងផ្សះផ្សារទំនាក់ទំនងពាណិជ្ជកម្ម និងការពារជាតិជាមួយអឺរ៉ុបឡើងវិញ

ចក្រភពអង់គ្លេស បានយល់ព្រមចុះកតិការសញ្ញាលើទំនាក់ទំនងផ្នែកការពារជាតិ និងពាណិជ្ជកម្មដ៏សំខាន់បំផុតជាមួយសហភាពអឺរ៉ុបឡើងវិញ កាលពីថ្ងៃចន្ទ ដើមសប្តាហ៍នេះ។ នេះជាកតិកាសញ្ញាដ៏ទូលំទូលាយមួយដែលចក្រភពអង់គ្លេសបានចុះជាមួយនឹងសហភាពអឺរ៉ុប បន្ទាប់ពីពលរដ្ឋអង់គ្លេស បានបោះឆ្នោតសម្រេចចិត្តចាកចេញពីសហភាពអឺរ៉ុប កាលពីជិត៩ឆ្នាំមុន។ កតិកាសញ្ញា ដែលភាគីទាំងពីរបានចុះហត្ថលេខានេះ គឺពាក់ព័ន្ធនឹងបញ្ហាសន្តិសុខ ការការពារជាតិ ការនាំចេញផលិតផលជាស្បៀងអាហារ ទេសចរណ៍ និងជលផល។

អ្នកវិភាគបានអះអាងថា គោលនយោបាយកំណត់ពន្ធគយដែលរដ្ឋបាលលោក ដូណាល់ ត្រាំ បានដាក់លើប្រទេសនានាស្ទើរពេញពិភពលោក គឺជាចំណុចគោលមួយដែលជំរុញរដ្ឋាភិបាលអង់គ្លេសក្រោមការដឹកនាំរបស់លោកនាយករដ្ឋមន្រ្តី គែ ស្តេម័រ (Keir Starmer) បោះជំហានកាន់តែគៀកទៅរកមេដឹកនាំអឺរ៉ុប។

លោកស្រី យូស៊ូឡា វ័នឌ័រ ឡេយេន (Ursula von der Leyen) ប្រធានគណៈកម្មការសហភាពអឺរ៉ុប បានចាត់ទុកកតិកាសញ្ញាដែលបានចុះជាមួយចក្រភពអង់គ្លេស គឺជាយុគសម័យថ្មីក្នុងទំនាក់ទំនងរបស់រវាងប្រទេសទាំងពីរ។ ដោយឡែក លោក ស្តេម័រ បាននិយាយថា អ្វីដែលចក្រភពអង់គ្លេសសម្រេចបានជាមួយនឹងសហភាពអឺរ៉ុប នៅពេលនេះ អាចនឹងធានាសន្តិសុខថាមពល និងស្បៀងអាហារនៅអឺរ៉ុប។

តាមអ្វីដែលបានព្រមព្រៀងគ្នាខាងលើ ភាគីទាំងពីរបានប្តេជ្ញាទំហំពាណិជ្ជកម្មរវាងចក្រភពអង់គ្លេស និងសហភាពអឺរ៉ុប ឱ្យឈានដល់៣ទ្រីលានដុល្លារនៅត្រឹមឆ្នាំ២០៤០៕

ដោយៈ សរ សុជាតិ