អ្នកឧកញ៉ា សៀ ឬទ្ធី ប្រធានក្រុមប្រឹក្សាភិបាលក្រុមហ៊ុនវើលដ៍ប៊្រីដ គ្រុបបានវាយតម្លៃថា វិស័យអចលនទ្រព្យនៅកម្ពុជានឹងចាប់ផ្តើមងើបឡើងវិញនៅក្នុងឆ្នាំ២០២៦ ខាងមុខនេះ តែឱកាសនៃភាពរីកចម្រើនរបស់វិស័យនេះទំនងជាមិនអាចវិលទៅរកស្ថានភាពដូចមុនពេលមិនទាន់មានការផ្ទុះវិបត្តិជំងឺកូវីដ-១៩នោះទេ។ ការអះអាងបែបនេះធ្វើឡើងក្រោយអ្នកឧកញ៉ាសង្កេតឃើញថា នៅក្នុងរយៈពេល៣ឆ្នាំចុងក្រោយនេះការអភិវឌ្ឍគម្រោងថ្មីៗនៅក្នុងវិស័យនេះពុំមាននោះទេ ពោលគឺចន្តរទិញលក់កើតឡើងតែក្នុងគម្រោងដែលមានស្រាប់ប៉ុណ្ណោះ ដូច្នេះវិស័យនេះអាចនឹងមានការអភិវឌ្ឍគម្រោងថ្មីៗឡើងវិញនៅឆ្នាំ២០២៦។ ម្យ៉ាងទៀតសេដ្ឋកិច្ចលើពិភពលោកនៅឆ្នាំ២០២៥ នេះ ត្រូវបានព្យាករថា នឹងមានការរីកចម្រើនឡើងវិញ ដូច្នេះកាលណាសេដ្ឋកិច្ចមានរីកចម្រើន នោះវានឹងជះឥទ្ធិពលមុនគេទៅដល់ការរីកចម្រើនរបស់វិស័យអចលនទ្រព្យ។
ជាមួយគ្នានេះលោក សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានគូសបញ្ជាក់ដែរថា ភាពរីកចម្រើន ឬអន់ថយរបស់វិស័យអចលនទ្រព្យ គឺដើរទន្ទឹមគ្នាជាមួយនឹងស្ថានភាពសេដ្ឋកិច្ច។ ដូច្នេះស្របពេលស្ថានប័នជាតិ និងអន្តរជាតិធំៗព្យាករថា សេដ្ឋកិច្ចកម្ពុជានៅឆ្នាំ២០២៥នេះ នឹងមានកំណើនល្អក្នុងរង្វង់៦% នោះលោកជឿជាក់ថា វិស័យអចលនទ្រព្យកម្ពុជាក៏នឹងមានកំណើនដូចគ្នាផងដែរ។
បើតាមការវាយតម្លៃរបស់អ្នកឧកញ៉ា សៀ ឬទ្ធី តម្លៃអចលនទ្រព្យដែលអាចបន្តមានកំណើននៅឆ្នាំនេះរួមមានអចលនទ្រព្យដែលបម្រើឱ្យវិស័យឧស្សាហកម្ម ព្រោះនៅឆ្នាំនេះអាចមានតម្រូវការខ្ពស់លើការសាងសង់រោងចក្រ សហគ្រាស និងឃ្លាំងស្តុកទំនិញជាដើម។ ហើយភាពល្អប្រសើររបស់អចលនទ្រព្យប្រភេទនេះ វាក៏នឹងរួមចំណែកជួយជំរុញឱ្យវិស័យអចលនទ្រព្យកម្ពុជាជារួមមានភាពប្រសើរឡើងវិញនាពេលខាងមុខផងដែរ៕
