ឯកឧត្តមឧបនាយករដ្ឋមន្រ្តី ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា នៅក្នុងបទសម្ភាសជាមួយអ្នកសារព័ត៌មាននៅសហរដ្ឋអាម៉េរិក បានអះអាងថា ការដកប្រព័ន្ធអនុគ្រោះពន្ធទូទៅ GSP របស់អាម៉េរិកកាលពីកន្លងទៅមិនមែនមានតែកម្ពុជានោះទេ ពោលគឺមានប្រទេសជាច្រើនទៀត ក៏ត្រូវបានអាម៉េរិកដកចេញផងដែរ។
ទោះបីមកទល់ពេលនេះពុំទាន់មានពន្លឺនៃការទទួលបានប្រព័ន្ធអនុគ្រោះពន្ធនេះត្រឡប់មកវិញក៏ដោយ តែថ្នាក់ដឹកនាំរូបនេះ រំពឹងថា សហរដ្ឋអាម៉េរិកនឹងពិចារណាផ្តល់ប្រព័ន្ធអនុគ្រោះពន្ធនេះដល់កម្ពុជា និងប្រទេសផ្សេងៗឡើងវិញនាពេលអនាគតដ៏ខ្លីខាងមុខ។
បើតាមការអះអាងរបស់អនុប្រធានទី១ក្រុមប្រឹក្សាអភិវឌ្ឍន៍កម្ពុជា រូបនេះ ច្បាប់វិនិយោគរបស់កម្ពុជា មិនតម្រូវ ឬបដិសេធការវិនិយោគរបស់ក្រុមហ៊ុនមកពីសហរដ្ឋអាម៉េរិក ឬប្រទេសណាមួយឡើយ ផ្ទុយទៅវិញកម្ពុជា ចង់បានក្រុមហ៊ុនមកពីអាម៉េរិក និងអឺរ៉ុបជាច្រើន ដើម្បីមកបណ្ដាក់ទុន និងចែករំលែកបទពិសោធន៍នៅកម្ពុជា ដោយឈរលើគោលការណ៍ច្បាប់។
សូមរំលឹកថា ប្រព័ន្ធអនុគ្រោះពន្ធទូទៅ GSP របស់សហរដ្ឋអាម៉េរិក បានផុតសុពលភាពកាលពីដំណាច់ឆ្នាំ២០២០ ហើយមកទល់ពេលនេះ មិនទាន់មានសញ្ញាណាមួយបង្ហាញថា សហរដ្ឋអាម៉េរិកនឹងបន្តសុពលភាពប្រព័ន្ធអនុគ្រោះពន្ធនេះដល់កម្ពុជា បន្តទៀតនោះទេ បើទោះបីមានការចរចា និងស្នើសុំពីភាគីកម្ពុជា ក៏ដោយ។
សហរដ្ឋអាម៉េរិក ជាទីផ្សារនាំចេញធំជាងគេរបស់កម្ពុជា ហើយទោះបីកម្ពុជា មិនមានប្រព័ន្ធអនុគ្រោះពន្ធ GSP ក៏ដោយ តែការធ្វើពាណិជ្ជកម្មរវាងប្រទេសទាំងពីរមានការកើនឡើងជាលំដាប់។ ជាក់ស្តែងនៅក្នុងរយៈពេល៨ខែ ឆ្នាំ២០២៤ ការដោះដូរពាណិជ្ជកម្មរបស់កម្ពុជា ជាមួយសហរដ្ឋអាម៉េរិក មានទំហំជិត៧ពាន់លានដុល្លារ មានការកើនឡើងជាង១០% បើធៀបនឹងរយៈពេលដូចគ្នាកាលពីឆ្នាំ២០២៣។ នេះបើយោងតាមទិនិ្នន័យរបស់អគ្គនាយកដ្ឋានគយ និងរដ្ឋាករកម្ពុជា៕
អត្ថបទ៖ បូ ដូឡា ,រូបភាព ឯកសារ
