តើភាគីពាក់ព័ន្ធគួរធ្វើបែបណា ដើម្បីជួយឱ្យស្រូវអាចរក្សាបានក្នុងតម្លៃសមរម្យក្នុងរយៈពេលវែង?
តម្លៃស្រូវនៅកម្ពុជា បានធ្លាក់ចុះគួរឱ្យកត់សម្គាល់នៅមួយរយៈចុងក្រោយនេះ ដោយភាគីពាក់ព័ន្ធកំពុងរកវិធីសាស្ត្រ ដើម្បីដោះស្រាយបញ្ហានេះ។ ជាក់ស្តែងក្រ…
ប្រធានាធិបតីអាម៉េរិក លោក ដូណាល់ ត្រាំ នឹងត្រូវចូលខ្លួនទៅបំភ្លឺនៅតុលាការកំពូលសហរដ្ឋអាម៉េរិក នៅថ្ងៃពុធ ទី៥ ខែវិច្ឆិកា សប្តាហ៍នេះ ដើម្បីការពារសំណុំរឿងពន្ធគយរបស់លោក ដែលដាក់ប្ដឹងដោយអាជីវកម្មខ្នាតតូច និងរដ្ឋតូចៗជាច្រើននៅសហរដ្ឋអាម៉េរិក ដែលអះអាងថា ពន្ធគយរបស់លោក ដូណាល់ ត្រាំ ខុសច្បាប់ ហើយគួរតែត្រូវបានលុបចោល។ នេះបើយោងតាមការចុះផ្សាយរបស់សារព័ត៌មាន BBC នៅថ្ងៃទី៣ ខែវិច្ឆិកា នេះ។
ប្រសិនបើតុលាការកំពូលចេញសាលដីកាប្រឆាំងនឹងរដ្ឋាភិបាលអាម៉េរិក គោលនយោបាយពាណិជ្ជកម្ម ដ៏ចម្រូងចម្រាសរបស់លោក ដូណាល់ ត្រាំ អាចនឹងត្រូវបានលុបចោល ហើយក្រុងវ៉ាស៊ីនតោន អាចនឹងត្រូវសងប្រាក់រាប់រយពាន់លានដុល្លារ ដែលខ្លួនប្រមូលបានពីពន្ធគយលើទំនិញនាំចូល។
សំណុំរឿងដ៏រសើបនេះកើតឡើងបន្ទាប់ពីការប្រកាសដាក់ពន្ធគយយ៉ាងទូលំទូលាយដោយលោក ដូណាល់ ត្រាំ កាលពីអំឡុងខែមេសា ដែលលោកនិយាយថា មានភាពចាំបាច់ដើម្បីការពារសន្តិសុខជាតិរបស់សហរដ្ឋអាម៉េរិក និងពង្រឹងឥទ្ធិពលពាណិជ្ជកម្មរបស់សហរដ្ឋ
អាម៉េរិក។ លោក ដូណាល់ ត្រាំ បានព្រមានថា ប្រសិនបើរដ្ឋបាលរបស់លោកចាញ់ក្តីនេះនឹងធ្វើឱ្យសហរដ្ឋអាម៉េរិកចុះខ្សោយ និងបណ្តាលឱ្យខូចខាតផ្នែកហិរញ្ញវត្ថុរយៈពេលវែង។ លោក ត្រាំ អះអាងថា លោកនឹងមិនចូលសវនាការឡើយនៅថ្ងៃទី៥ ខែវិច្ឆិកា សប្ដាហ៍នេះ ដោយលោកបានសង្កត់ធ្ងន់ថា សំណុំរឿងនេះ គឺជាសំណុំរឿងប្ដឹងសហរដ្ឋអាម៉េរិក គឺមិនមែនប្ដឹងរូបលោកជាបុគ្គលនោះឡើយ។
សូមបញ្ជាក់ថា អាជីវកម្មជាច្រើននៅសហរដ្ឋអាម៉េរិកបាននិងកំពុងត្រដាបត្រដួសខ្លាំងដោយសារពន្ធគយរបស់លោក ដូណាល់ ត្រាំ។ តួយ៉ាង ក្រុមហ៊ុន Learning Resources ដែលជាក្រុមហ៊ុនផលិតប្រដាប់ក្មេងលេងរបស់សហរដ្ឋអាម៉េរិកបាននិយាយថា ពន្ធរបស់លោក ដូណាល់ ត្រាំ នឹងធ្វើឱ្យខ្លួនខាតបង់១៤លានដុល្លារនៅឆ្នាំនេះ ដែលច្រើនជាង៧ដងបើធៀបនឹងឆ្នាំ២០២៤។ នាយកប្រតិបត្តិក្រុមហ៊ុនខាងលើនេះ គឺលោក Rick Woldenberg បាននិយាយថា គោលនយោបាយរបស់លោក ដូណាល់ ត្រាំ បានបង្កឱ្យមានការរអាក់រអួលពាណិជ្ជកម្មខ្លាំងស្ទើរមិនគួរឱ្យជឿ ដែលបង្ខំឱ្យមានការផ្លាស់ប្តូរផលិតកម្មយ៉ាងខ្លាំង។
ក្រុមហ៊ុនផ្សេងទៀតដូចជាក្រុមហ៊ុន Cooperative Coffees នៅរដ្ឋ Georgia ជាដើមបានបង់ពន្ធជាង១,៣លានដុល្លារ ចាប់តាំងពីខែមេសា មក។ ខណៈដែលម្ចាស់អាជីវកម្មសង្ឃឹមថា តុលាការនឹងចេញសាលដីកាប្រឆាំងនឹងពន្ធគយរបស់លោក ដូណាល់ ត្រាំ ហើយក្រុមហ៊ុនភាគច្រើនក៏កំពុងត្រៀមខ្លួនសម្រាប់ស្ថានភាពអាក្រក់បំផុតផងដែរ ប្រសិនបើគោលនយោបាយនេះនៅមានសុពលភាព៕
ដោយ: តែម សុខុម
