អ្នកនាំពាក្យក្រុមហ៊ុន ឆេវរ៉ន់ បាននិយាយកាលពីថ្ងៃចន្ទថា ភាគហ៊ុនជាង៤១% របស់ក្រុមហ៊ុន Chevron ក្នុងវិស័យឧស្ម័នមិនត្រូវបានលក់ទៅទៅម្ចាស់ភាគហ៊ុនពាក់ព័ន្ធគឺក្រុមហ៊ុនរុករក និងផលិតថាមពលរបស់ថៃ (PTTEP) និងសហគ្រាសប្រេងនិងឧស្ម័នរបស់រដ្ឋមីយ៉ាន់ម៉ា (MOGE) នោះទេ គឺក្រុមហ៊ុននេះបានប្រគល់ឱ្យគ្រប់គ្រងតែម្ដង។
ក្រុមហ៊ុន PTTEP ដែលជាប្រតិបត្តិករនៃវិស័យឧស្ម័ននៅមីយ៉ាន់ម៉ា បាននិយាយកាលពីថ្ងៃសុក្រសប្ដាហ៍មុនថា ភាគហ៊ុនរបស់ខ្លួននៅក្នុងតំបន់ Yadana បានកើនឡើងដល់ជិត៦៣%។ អ្នកនាំពាក្យក្រុមហ៊ុន ឆេវរ៉ន់ បាននិយាយថា ការដកខ្លួននេះបានឆ្លុះបញ្ចាំងពីចេតនារបស់ក្រុមហ៊ុននេះ ក្នុងការចាកចេញពីប្រទេសមីយ៉ាន់ម៉ា បន្ទាប់ពីរដ្ឋប្រហារនៅខែកុម្ភៈ ឆ្នាំ២០២១ បានបង្កឱ្យមានវិបត្តិមនុស្សធម៌ ដែលកំពុងបន្តកើតឡើងនៅក្នុងប្រទេសនេះ។
អត្តបទគួរអាន
ការដកខ្លួននេះបានធ្វើឡើងបន្ទាប់ពីក្រុមហ៊ុន ឆេវរ៉ន់ បាននិយាយនៅក្នុងខែមករា ឆ្នាំ២០២២ថា ខ្លួននឹងចាកចេញពីប្រទេសមីយ៉ាន់ម៉ា និងយល់ព្រមលក់ទ្រព្យសម្បត្តិរបស់ខ្លួននៅទីនោះរួមទាំងភាគហ៊ុនរបស់ខ្លួននៅក្នុងវិស័យឧស្ម័ននៅយ៉ាដាណាផងដែរ ប៉ុន្តែផ្ទុយទៅវិញក្រុមហ៊ុននេះបានដកខ្លួនចេញដោយប្រគល់ឱ្យភាគីពាក់ព័ន្ធជាអ្នកគ្រប់គ្រងទៅវិញ។
ដោយមានទីតាំងស្ថិតនៅឈូងសមុទ្រម៉ាតា អណ្ដូងឧស្ម័នយ៉ាដាណាផលិតឧស្ម័នបានប្រហែល៦ពាន់លានម៉ែត្រគូបក្នុងមួយឆ្នាំ ដោយក្នុងនោះចំនួន៧០ % ត្រូវបាននាំចេញទៅប្រទេសថៃ និងប្រហែល៣០%ទៀត បានផ្គត់ផ្គង់ដល់ក្រុមហ៊ុនឧស្សាហកម្ម MOGE សម្រាប់ប្រើប្រាស់ក្នុងស្រុក។ ហើយឧស្សាហកម្ម MOGE ត្រូវបានរឹបអូសដោយរបបយោធាតាមរយៈរដ្ឋប្រហារឆ្នាំ២០២១ តាមការប៉ុនប៉ុងរបស់ខ្លួន៕
អត្ថបទ៖ ព្រាប ស
None
