ទ្វីបអាហ្រ្វិក នៅពេលនេះឡើងកូតក្លាយទៅជាទីផ្សារមួយក្នុងចំណោមទីផ្សារដែលរីកលូតលាស់លឿនបំផុតសម្រាប់ការនាំចេញរបស់មហាយក្សចិន ខណៈដែលក្រុងប៉េកាំង ទាញយកអត្ថប្រយោជន៍ពីការប្រែប្រួល នៃពាណិជ្ជកម្មពិភពលោក ដែលបណ្តាលមកពីពន្ធគយដ៏ចម្រូងសម្រាសរបស់សហរដ្ឋអាម៉េរិក ក្រោមការដឹកនាំរបស់ប្រធានាធិបតី ដូណាល់ ត្រាំ។
ទិន្នន័យបង្ហាញថា ការនាំចេញរបស់មហាយក្សចិន ទៅកាន់ទ្វីបអាហ្រ្វិក បានកើនឡើង២៥% ឈានដល់១២២ពាន់លានដុល្លារនៅឆមាសទី១ ដើមឆ្នាំ២០២៥ ដែលតួលេខនេះខ្ពស់ជាងទំហំនាំចេញសរុបនៅពេញមួយឆ្នាំ២០២០ទៅទៀត។ តាមការព្យាករថា កំណើននាំចេញរបស់មហាយក្សចិន ទៅកាន់ទ្វីបអាហ្រ្វិកអាចនឹងកើនលើស២០០ពាន់លានដុល្លារជាលើកដំបូងមិនធ្លាប់មានជាប្រវត្តិសាស្ត្រនៅត្រឹមដំណាច់ឆ្នាំ២០២៥។
បណ្ដាប្រទេសនៅទ្វីបអាហ្វ្រិក ដែលទិញទំនិញចិនច្រើនជាងគេបំផុត រួមមាន ប្រទេសនីហ្សេរីយ៉ា អាហ្វ្រិកខាងត្បូង និងអេហ្ស៊ីប ដែលមានភូមិសាស្ត្រមួយផ្នែកលយចូលទ្វីបអាហ្វ្រិក ហើយមួយផ្នែកលយចូលតំបន់មជ្ឈិមបូព៌ា។ ទិន្នន័យបង្ហាញថា ការនាំចេញគ្រឿងចក្រសំណង់ទៅកាន់ប្រទេសទាំង៣នេះ បានកើនឡើងជាង៦៣% ហើយការនាំចេញរថយន្តបានកើនឡើងលើសទ្វេដង ចំណែកឯផលិតផលដែកក៏ស្ទុះកើនឡើងខ្លាំងផងដែរ៕
ដោយ: តែម សុខុម
