ក្រុមប្រឹក្សារដ្ឋរបស់ប្រទេសចិន បានបើកកិច្ចប្រជុំមួយកាលពីខែមុន ដោយបានអនុម័តផែនការសាងសង់ម៉ាស៊ីនរ៉េអាក់ទ័រចំនួន១០ ដែលគេរំពឹងថា នឹងមានសមត្ថភាពផលិតថាមពលសរុបប្រហែល១ម៉ឺន២ពាន់មេហ្គាវ៉ាត់។ ម៉ាស៊ីនរ៉េអាក់ទ័រទាំងនេះនឹងត្រូវគ្រប់គ្រងដោយក្រុមហ៊ុនថាមពលនុយក្លេអ៊ែ របស់រដ្ឋទាំងពីរគឺក្រុមហ៊ុន China National Nuclear Corp.
និងក្រុមហ៊ុន China General Nuclear Power Group ព្រមទាំងក្រុមហ៊ុនសាជីវកម្មរបស់រដ្ឋផ្សេងៗទៀតផងដែរ ហើយនឹងត្រូវសាងសង់នៅក្នុងខេត្តសានទុង ស៊ិនជាំង ហ្វូជៀន ក្វាងទុង និងតំបន់ស្វយ័តហ្គ័ងស៊ីហ្សួង ដោយមានទីតាំងស្ថិតនៅតាមបណ្តោយឆ្នេរសមុទ្រទាំងអស់។
បើតាមរបាយការណ៍ប្រចាំខែមេសា របស់ក្រុមឧស្សាហកម្មថាមពលនុយក្លេអ៊ែររបស់រដ្ឋាភិបាលចិន ម៉ាស៊ីនរ៉េអាក់ទ័រនុយក្លេអ៊ែ ចំនួន៥៧ កំពុងដំណើរការនៅក្នុងប្រទេសចិន នៅចុងឆ្នាំ២០២៤ ដែលមានសមត្ថភាពផលិតថាមពលសរុបជិត៦ម៉ឺនមេហ្គាវ៉ាត់ ហើយបើនិយាយអំពីសមត្ថភាព ប្រទេសចិន ជាប់លំដាប់ទី៣ ក្នុងពិភពលោកបន្ទាប់ពីអាម៉េរិក និងបារាំង។
បើតាមការព្យាករណ៍នៅក្នុងរបាយការណ៍នេះ សមត្ថភាពនៃការផលិតថាមពលនុយក្លេអ៊ែ របស់ចិន នឹងកើនឡើងដល់១១ម៉ឺនមេហ្កាវ៉ាត់ នៅត្រឹមឆ្នាំ២០៣០ ហើយថា ប្រសិនបើល្បឿននៃការសាងសង់នៅជុំវិញពិភពលោកគ្មានអ្វីប្រែប្រួលទេ ប្រទេសចិននឹងវ៉ាដាច់សហរដ្ឋអាម៉េរិក និងបារាំងក្លាយជាអ្នកនាំមុខគេខាងផលិតថាមពលនុយក្លេអ៊ែ នៅត្រឹមឆ្នាំនោះ។
បើតាមស្ថិតិរបស់រដ្ឋាភិបាលចិន ការផលិតថាមពលនុយក្លេអ៊ែ មានចំនួនជិត៥% នៃថាមពលសរុបរបស់ប្រទេសចិន គិតត្រឹមឆ្នាំ២០២៤ ហើយការផលិតថាមពលធម្មតាភាគច្រើនបានមកពីការប្រើធ្យូងថ្ម និងឥន្ធនៈហ្វូស៊ីលផ្សេងទៀត មានកម្រិតរហូតដល់ជាង៦៧%ឯណោះ៕
ដោយ៖ សុខ មង្គល
