ឧស្សាហកម្មផលិតយន្តហោះនៅចិន កំពុងរងគ្រោះដោយសារជម្លោះពាណិជ្ជកម្មរវាងចិន និងអាម៉េរិក

មហិច្ឆតារបស់ចិន ក្នុងការយកយន្តហោះពាណិជ្ជកម្មផលិតក្នុងស្រុក C919 មកប្រជែងជាមួយយន្តហោះ ប៊ូអ៊ីង និង អ៊ែរប៊ឺស កំពុងជួបបញ្ហា ក្រោយការផលិតមិនអាចឆ្លើយតបនឹងតម្រូវការ ដោយសារបញ្ហាជម្លោះពាណិជ្ជកម្មរវាងចិន និងអាម៉េរិក ធ្វើឱ្យរាំងស្ទះដល់ការផ្គត់ផ្គង់គ្រឿងបង្គុំ ជាពិសេសម៉ាស៊ីយន្តហោះតែម្តង។ លោក ម៉ាក ហ្សេនឡេន (Max J. Zenglein) អ្នកសេដ្ឋកិច្ចជាន់ខ្ពស់របស់ក្រុមហ៊ុន the Conference Board បានអះអាងថា ការផលិតយន្តហោះនៅក្នុងប្រទេសចិន កំពុងជួបបញ្ហាដ៏ចម្បងមួយ គឺខ្សែច្រវាក់ផ្គត់ផ្គង់គ្រឿងបង្គុំសម្រាប់បម្រើឱ្យការផលិតយន្តហោះកំពុងរងការរឹតបន្តឹងពីសហរដ្ឋអាម៉េរិក។

ឯកសាររបស់ធនាគារ Bank of America បានបង្ហាញថា គ្រឿងបង្គុំសម្រាប់ផលិតយន្តហោះ C919 របស់ចិន ភាគច្រើន ផ្គត់ផ្គង់ដោយក្រុមហ៊ុនអាម៉េរិក និងក្រុមហ៊ុនអឺរ៉ុប ក្នុងនោះក្រុមហ៊ុនអាម៉េរិក មានចំនួន៤៨ក្រុមហ៊ុន និងអឺរ៉ុប មាន២៦ក្រុមហ៊ុន ខណៈដែលក្រុមហ៊ុនចិន មានតែ១៤ ក្រុមប៉ុណ្ណោះ។ បញ្ហានេះបានកើតឡើងក្រោយលោក ដូណាល់ ត្រាំ បានរឹតបន្តឹងលើការនាំចេញផលិតផលបច្ចេកវិទ្យាទៅប្រទេសកាន់ចិន ប៉ុន្តែចិនវិញ ក៏មានគន្លឹះដែរ គឺយករ៉ែកម្រដែលអឺរ៉ុប និងអាម៉េរិកខ្វះខាតជាបន្ទុកដោះដូរនិងលើកជាទម្ងន់នៅក្នុងការចរចាពាណិជ្ជកម្ម។

ចិន បានបង្ហាញពីមហិច្ឆតាយកយន្តហោះ C919 ប្រកួតប្រជែងជាមួយក្រុមហ៊ុនផលិតយន្តហោះធំៗនៅលើពិភពលោកកាលពីឆ្នាំ២០២៣ ដោយចិន គ្រោងពង្រីកទីផ្សារយន្តហោះនេះទៅកាន់តំបន់អាស៊ីអាគ្នេយ៍ អាហ្វ្រិក និងអឺរ៉ុបផងដែរ។ កាលពីឆ្នាំ២០២៤ ក្រុមហ៊ុន COMAC បានប្រគល់យន្តហោះ C919 ចំនួន១៣គ្រឿងទៅឱ្យក្រុមហ៊ុនអាកាសចរណ៍ចិន ហើយនៅក្នុងឆ្នាំ២០២៥ គ្រោងប្រគល់យន្តហោះសរុបចំនួន៣០គ្រឿងបន្ថែមទៀត ប៉ុន្តែមកដល់ខែតុលា នេះ គឺក្រុមហ៊ុនទើបអាចផលិតនិងប្រគល់យន្តហោះឲ្យអតិថិជនបានត្រឹមតែ៧គ្រឿងប៉ុណ្ណោះ។ សរុបមកនៅពេលនេះមានយន្តហោះពាណិជ្ជកម្ម C919 ចំនួន២០គ្រឿងប៉ុណ្ណោះ ដែលកំពុងដំណើរការដោយក្រុមហ៊ុនអាកាសចរណ៍ Air China, China Eastern និង China Southern៕

ដោយៈ សរ សុជាតិ