ក្រុមវិស្វករចិនកំពុងសាងសង់ផ្លូវនៅក្រោមសមុទ្រដ៏អស្រារ្យនៅទីក្រុងអាប៊ូដាប៊ី ប្រទេសអារ៉ាប់រួម

ផ្លូវរូងក្រោមបាតសមុទ្រនៅទីក្រុងអាប៊ូដាប៊ី 1B (Abu Dhabi 1B) ដែលតភ្ជាប់កោះសាដឌីយ៉ាត (Saadiyat) និងកោះអាំយីហ្វេណា (Umm Yifenah) កំពុងដំណើរការសាងសង់ដោយសម្ព័ន្ធក្រុមហ៊ុនដឹកនាំដោយក្រុមហ៊ុន China Railway International Group របស់ប្រទេសចិនដែលបានចាប់ផ្តើមកាលពីខែតុលា ឆ្នាំ២០២៤ និងគ្រោងបញ្ចប់នៅចុងឆ្នាំ២០២៦។ ដោយជំនួសឱ្យការជីករូងក្រោមដីបែបការពារធម្មតា ឬវិធីសាស្ត្រចោះដាក់បំពង់ក្រោមសមុទ្រ ក្រុមការងារជំនាញរបស់ចិនពេលនេះបានបង្កើតការដ្ឋានសំណង់ស្ងួតមួយដោយការបង្កើតជញ្ជាំងទប់ទឹកសមុទ្ធព័ទ្ធជុំវិញ ហើយបូមទឹកចេញដើម្បីធ្វើផ្លូវរូងក្រោមសមុទ្រ។

ពេលនេះការជីកកកាយដីក្រោមសមុទ្របានបញ្ចប់ហើយ ហើយទំនប់ទឹកដែលព័ទ្ធជុំវិញនោះនៅតែមានស្ថិរភាពធម្មតាដោយគ្មានការដួលរលំឡើយ ខណៈពេលនេះគម្រោងនេះកំពុងបន្តចូលដល់ដំណាក់កាលរចនាសម្ពន្ធសំខាន់ៗហើយ។

លោក លូ ឃុន (Liu Kun) អ្នកគ្រប់គ្រងគម្រោងនេះបាននិយាយថា ជញ្ជាំងទប់ទឹកសមុទ្រជាមួយបន្ទះដែកក្រាស់ជាប់ៗគ្នានេះ គឺជាជញ្ជាំងទឹកដំបូងគេបង្អស់នៅលើពិភពលោក ហើយការធ្វើបែបនេះ ក៏ដោយសារតែបាតសមុទ្រ ដែលរាក់បំផុតនៅក្នុងទីក្រុងនេះ មានជម្រៅតែ២៧ម៉ែត្រប៉ុណ្ណោះ ដូច្នេះហើយវាអាចទប់នឹងសម្ពាធទឹកសមុទ្របានដោយជោគជ័យ៕

ដោយ៖ សុខ មង្គល