ប្រភពការទូត បានទម្លាយឱ្យដឹងថា ប្រធានាធិបតីចិន លោក ស៊ី ជីនភីង នឹងមកបំពេញទស្សនកិច្ចប្រទេសចំនួន៣ ក្នុងតំបន់អាស៊ាន រួមមានប្រទេសវៀតណាម ម៉ាឡេស៊ី និងកម្ពុជា នៅអំឡុងពាក់កណ្ដាលខែមេសា នេះ។ ប្រភពមួយដែលបាននិយាយក្នុងលក្ខខណ្ឌមិនបញ្ចេញឈ្មោះបានទម្លាយឱ្យដឹងថាលោក ស៊ី ជីនភីង គ្រោងបំពេញទស្សនកិច្ចរយៈពេល៣ថ្ងៃ នៅក្នុងប្រទេសម៉ាឡេស៊ី។
ប្រភពការទូតមួយទៀតដែលសុំមិនបញ្ចេញឈ្មោះដូចគ្នាបាននិយាយថា ដំណើរទស្សនកិច្ចរបស់លោកទៅកាន់ប្រទេសម៉ាឡេស៊ី នឹងជួយពង្រឹងបន្ថែមពីលើជំនួបផ្លែផ្ការបស់លោក ស៊ី ជីនភីង កាលពីអំឡុងខែវិច្ឆិកា នៅក្នុងទីក្រុងប៉េកាំង ជាមួយនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម។ ប្រភពដដែលបានបន្ថែមថា ដំណើរទស្សនកិច្ចដែលបានគ្រោងទុកនេះ គឺពិតជាល្អណាស់សម្រាប់ពង្រឹងទំនាក់ទំនងទ្វេភាគី។
ដំណើរទស្សនកិច្ចរបស់លោក ស៊ី ជីនភីង មកកាន់តំបន់អាស៊ាននេះ ជាដំណើរទស្សនកិច្ចក្រៅប្រទេសលើកដំបូងរបស់លោកសម្រាប់ឆ្នាំ២០២៥ នេះ ហើយកើតមានឡើងក្នុងពេលដែលប្រទេសចិន មានបំណងរឹតទំនាក់ទំនងជាមួយបណ្ដាប្រទេសជិតខាង និងលើកកម្ពស់មុខមាត់ប្រទេសចិន ក្នុងនាមជាប្រទេសដៃគូក្នុងតំបន់ដ៏គួរឱ្យទុកចិត្ត និងមានការទទួលខុសត្រូវ។
គម្រោងដំណើរទស្សនកិច្ចនេះ ក៏កើតឡើងស្របពេលមានការព្រួយបារម្ភកាន់តែខ្លាំងឡើងចំពោះការប្តេជ្ញាចិត្តរបស់ក្រុងវ៉ាស៊ីនតោន ចំពោះតំបន់ ជាពិសេសនៅពេលដែលលោក ដូណាល់ ត្រាំ បានបង្ហាញមន្ទិល និងចោទសួរពីតម្លៃនៃសម្ពន្ធភាព និងភាពជាដៃគូជាប្រវត្តិសាស្ត្ររបស់ខ្លួនជាមួយតំបន់។
សូមបញ្ជាក់ថា ស្របពេលប្រទេសចិន មានទំនាក់ទំនងពាណិជ្ជកម្មរឹងមាំជាមួយតំបន់ មហាយក្សចិន ក៏មានជម្លោះដែនទឹកជាយូរមកហើយជាមួយប្រទេសមួយចំនួនផងដែរ រួមទាំងម៉ាឡេស៊ី ហ្វីលីពីន វៀតណាម និងព្រុយណេ ទាក់ទងនឹងការទាមទារតំបន់ត្រួតស៊ីគ្នានៅសមុទ្រចិន ខាងត្បូង៕
ដោយ: តែម សុខុម
