សារព័ត៌មាន The Star ដែលបានដកស្រង់អត្ថបទចុះផ្សាយដោយសារព័ត៌មានសេដ្ឋកិច្ច Bloomberg បានឲ្យដឹងថា ការប្រមូលផលកាហ្វេរ៉ូប៊ូស្តានៅវៀតណាមបានធ្លាក់ចុះជាង ៧% បើធៀបនឹងឆ្នាំមុន ដោយវៀតណាមអាចផលិតកាហ្វេបានត្រឹមតែជិត ១ លាន ៧ សែនតោនប៉ុណ្ណោះ។
តាមពិត ការហ្វេរ៉ូប៊ូស្តាជាប្រភេទដែលគេនិយមប្រើជាភេសជ្ជៈឆុងផឹកភ្លាមៗ ប៉ុន្តែមូលហេតុដែលកសិករវៀតណាមបាននិងកំពុងតែបង្វែរការចាប់អារម្មណ៍ពីដាំកាហ្វេនេះមកដាំទុរេនវិញ គឺដោយសារតែតម្លៃកាហ្វេរូប៊ូស្តានៅលើទីផ្សារពិភពលោកបានឡើងខ្ពស់ ខណៈដែលអ្នកលីងកាហ្វេនិងអ្នកទទួលទានកាហ្វេបានងាកមករកជម្រើសផ្សេងៗដែលមានតម្លៃថោកជាងកាហ្វេរ៉ូប៊ូស្តា ដើម្បីដោះស្រាយបញ្ហាអតិផរណាខ្ពស់។ ក្រៅពីនេះ តម្លៃកាន់តែខ្ពស់របស់កាហ្វេរនេះក៏គឺដោយសារមានក្ដីបារម្ភអំពីឥទ្ធិពលអាកាសធាតុមិនល្អមកលើផលដំណាំសំខាន់ៗមួយចំនួនដែរ។ បញ្ហានេះបានជំរុញឱ្យកិច្ចសន្យាចាំប្រមូលទិញកាហ្វេរ៉ូប៊ូស្តាឡើងថ្លៃ ៣៥ ភាគរយ ក្នុងឆ្នាំនេះ នៅទីផ្សារក្រុងឡុងដ៍ ប្រទេសអង់គ្លេស ពោលគឺតម្លៃកាហ្វេនេះបានឡើងខ្ពស់បំផុតក្នុងរយៈពេលជាងមួយទស្សវត្សរ៍កន្លងទៅ។ នេះជាហេតុធ្វើឱ្យអ្នកលីងនិងអ្នកបរិភោគសាញ ហើយមិនសូវទិញកាហ្វេប្រភេទនេះច្រើនដូចមុន។
លោក ផាន់ ហ៊ុន អាញ់ ( Phan Hung Anh) នាយកប្រតិបត្តិនៃក្រុមហ៊ុននាំចេញកាហ្វេ ក្វាង មិញ ( Quang Minh Coffee Trading) នៅខេត្ត ប៊ិញ ឌឿង ( Binh Duong ) បាននិយាយថា៖ «ទិន្នផលជាក់ស្តែងគឺទាបជាងអ្វីដែលមនុស្សបានព្យាករពីមុន»។
លោកបានបញ្ជាក់ថា៖ «អ្នកដាំកាហ្វេបានបណ្តាក់ទុនតិចជាងមុនទៅក្នុងចំការកាហ្វេរបស់ពួកគេ ដោយបង្វែទុនមកលើដំណាំទុរេន និងផ្លែឈើដែលរកបានផលចំណេញច្រើនជាងមុន។»
នៅក្នុងរយៈពេល ៧ ខែដំបូងនៃរដូវកាលកាហ្វេ វៀតណាមបាននាំចេញកាហ្វេចំនួនរហូតដល់ទៅជិត ១ លាន ២ សែនតោន ដែលជាចំនួនខ្ពស់បំផុតមិនធ្លាប់មាន ប៉ុន្តែគេព្យាករថា ការនាំចេញនិងធ្លាក់ចុះវិញនៅក្នុងរយៈពេលដែលនៅសល់។
