តើវៀតណាមអាចនឹងមានការរុះរើក្បាលម៉ាស៊ីនដឹកនាំកំពូលៗ រួមទាំងតំណែងប្រធានាធិបតីជាថ្មីដែរឫទេ?

សារព័ត៌មានធំៗបានរាយការណ៍ថា សភារបស់ប្រទេសវៀតណាម គ្រោងនឹងជួបប្រជុំគ្នានៅថ្ងៃព្រហស្បតិ៍សប្តាហ៍នេះ ដើម្បីពិភាក្សាអំពីបញ្ហាមន្រ្តី។ តែយ៉ាងណាគ្មានការបញ្ជាក់ច្បាស់លាស់ណាមួយជុំវិញបញ្ហានេះនោះទេ គ្រាន់តែការវិភាគខ្លះបានលើកឡើងថា អាចនឹងមានការរុះរើថ្នាក់ដឹកនាំកំពូលរបស់ប្រទេសនេះជាថ្មីម្តងទៀត។

មន្ត្រីនិងអ្នកការទូតវៀតណាមជាច្រើននាក់ បាននិយាយថា លទ្ធភាពនៃការលាលែងពីតំណែងរបស់ប្រធានាធិបតី ដែលកំពុងកាន់តំណែង គឺលោក វូ វាន់ ធុង (Vo Van Thuong ) អាចជាបញ្ហាមួយក្នុងចំណោមបញ្ហាបុគ្គលិកដែលសភានឹងពិភាក្សា។ មន្ត្រីវៀតណាមម្នាក់បានជូនដំណឹងអំពីបញ្ហានេះ ប៉ុន្តែការិយាល័យព័ត៌មាននៅក្រសួងការបរទេស និងសភាវៀតណាម មិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ។

យ៉ាងណាមិញអ្នកវិភាគមួយចំនួនបានលើកឡើងថា ស្ថានការណ៍នយោបាយនៅវៀតណាម គឺពិបាកនឹងប៉ាន់ស្មាន តែយ៉ាងណាការជូនដំណឹងពីរាជវង្សហូឡង់ អំពីការពន្យារពេលនៃដំណើរទស្សនកិច្ចផ្លូវរដ្ឋមកកាន់ប្រទេសវៀតណាម ដែលបានគ្រោងធ្វើនៅក្នុងអំឡុងពេលនេះ ត្រូវបានពន្យារពេលអាចជាអំណះអំណាងមួយ។

គួររំលឹកថា កាលពីឆ្នាំមុនរដ្ឋសភាវៀតណាម បានកោះប្រជុំពិសេសមួយនៅក្នុងខែមករា ដើម្បីទទួលយកការលាលែងពីតំណែងប្រធានាធិបតីភ្លាមៗរបស់លោក ឃ្វៀន ស៊ួន ភុក (Nguyen Xuan Phuc) នៅពេលនោះ គឺចំពេលដែលវៀតណាមកំពុងពង្រឹង និងអនុវត្តយុទ្ធនាការដ៏ធំទូលាយ និងយូរអង្វែងប្រឆាំងនឹងអំពើពុករលួយ ដែលអ្នករិះគន់បាននិយាយថា អាចត្រូវបានប្រើប្រាស់សម្រាប់ជម្លោះនយោបាយ៕

ដោយៈ សរ សុជាតិ