លោក ត្រាំ បានប្រាប់អ្នកយកព័ត៌មានក្នុងអំឡុងព្រឹត្តិការណ៍សេដ្ឋកិច្ចមួយនៅក្នុងបន្ទប់ Roosevelt នៃសេតវិមានថា មានមេដឹកនាំជាច្រើនចង់ចូលរួមក្នុងក្រុមប្រឹក្សា ដែលត្រូវបានបង្កើតឡើងក្រោមផែនការ ហ្គាហ្សា ដែលបានបង្កើតបទឈប់បាញ់ដ៏ផុយស្រួយរវាងអ៊ីស្រាអែល និងពួកសកម្មប្រយុទ្ធហាម៉ាស។
លោក ត្រាំ បានមានប្រសាសន៍ថា «ព្រះមហាក្សត្រ ប្រធានាធិបតី នាយករដ្ឋមន្ត្រី...ពួកគេទាំងអស់គ្នាសុទ្ធតែចង់ក្លាយជាសមាជិកក្រុមប្រឹក្សាសន្តិភាពនេះ ដូច្នេះវាគួរតែត្រូវបានប្រកាសនៅក្នុងឆ្នាំថ្មីខាងមុខ»។
លោកបន្តថា «វានឹងក្លាយជាក្រុមប្រឹក្សាភិបាលដ៏ល្បីល្បាញបំផុតមួយដែលមិនធ្លាប់មាន...គ្រប់គ្នាចង់ស្ថិតនៅក្នុងក្រុមប្រឹក្សាភិបាលនេះ...»។
សេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិដែលបានអនុម័តកាលពីថ្ងៃទី១៧ ខែវិច្ឆិកា បានអនុញ្ញាតឱ្យក្រុមប្រឹក្សាសន្តិភាព និងប្រទេសនានាធ្វើការជាមួយគ្នាដើម្បីបង្កើតកម្លាំងស្ថិរភាពអន្តរជាតិ (ISF) បណ្តោះអាសន្នមួយនៅហ្គាហ្សា។
សេចក្តីសម្រេចដែលព្រាងដោយសហរដ្ឋអាមេរិកនេះ បានបញ្ជាក់ថា ក្រុមប្រឹក្សាសន្តិភាពនេះជាគណៈគ្រប់គ្រងអន្តរកាល «ដែលនឹងកំណត់ក្របខណ្ឌ និងសម្របសម្រួលការផ្តល់មូលនិធិសម្រាប់ការអភិវឌ្ឍហ្គាហ្សាឡើងវិញ» ឱ្យស្របតាមផែនការសន្តិភាព ២០ចំណុចរបស់លោក ត្រាំ។
សេចក្ដីថ្លែងការណ៍បានបញ្ជាក់ថា ក្រុមប្រឹក្សាសន្តិភាពនេះនឹងដំណើរការ «រហូតដល់ពេលដែលអាជ្ញាធរប៉ាឡេស្ទីន (PA) បានបញ្ចប់កម្មវិធីកែទម្រង់របស់ខ្លួនយ៉ាងពេញចិត្ត...និងអាចដណ្តើមការគ្រប់គ្រងតំបន់ហ្គាហ្សាមកវិញដោយសុវត្ថិភាព និងមានប្រសិទ្ធភាព»៕
