តម្លៃភាគហ៊ុន និងមាសធ្លាក់ចុះ ខណៈប្រាក់ដុល្លារ និងប្រេងឆៅកើនឡើង ក្រោយលោក ត្រាំ ព្រមានបង្កើនការវាយប្រហារលើអ៊ីរ៉ង់
ប្រធានាធិបតីសហរដ្ឋអាម៉េរិកលោក ដូណាល់ ត្រាំ បានថ្លែងថា គោលបំណងយុទ្ធសាស្ត្រស្នូលរបស់ទីក្រុងវ៉ាស៊ីនតោននៅក្នុងសង្គ្រាមជាមួយអ៊ីរ៉ង់ជិតឈានដល់ទ…
យោងតាមការចុះផ្សាយរបស់សារព័ត៌មាន Euro News លោកប្រធានាធិបតី អេម៉ានូអែល ម៉ាក្រុង បានថ្លែងទៅកាន់មេដឹកនាំអាជីវកម្ម និងវិនិយោគិនជប៉ុននៅទីក្រុងតូក្យូថា លោកដឹងយ៉ាងច្បាស់ថា អឺរ៉ុបពេលខ្លះត្រូវបានគេមើលឃើញថា ជាទ្វីបមួយដែលដើរយឺតជាងគេ ប៉ុន្តែអ្វីដែលជាតម្លៃពិតប្រាកដរបស់អឺរ៉ុប គឺសមត្ថភាពនៃការព្យាករណ៍ និងការមើលឃើញគោលដៅច្បាស់លាស់។ លោកបានសង្កត់ធ្ងន់ថា ទោះបីអឺរ៉ុបដើរយឺតតែមានគោលដៅច្បាស់លាស់ថាត្រូវដើរទៅទីណា។
នៅក្នុងអំឡុងពេលនោះ លោក ក៏បានឆ្លៀតរិះគន់ និងដៀមដាមដោយប្រយោលថា៖«ប្រជាជាតិខ្លះពិតជាដើរលឿនណាស់ លឿនជាងសម្ព័ន្ធមិត្តទៅទៀត ប៉ុន្តែនៅថ្ងៃស្អែកពួកគេបែរជាមិនដឹងថាខ្លួនឯងកំពុងស្ថិតនៅទីណា ឬត្រូវសម្រេចចិត្តដើរទៅទីណាបន្តឡើយ។
ទោះបីលោក ម៉ាក្រុង មិនបាននិយាយចំឈ្មោះប្រទេសណាមួយក៏ដោយ តែមនុស្សភាគច្រើនបានវាយតម្លៃថា ការលើកឡើងរបស់មេដឹកនាំប្រទេស ដែលជាបងធំទី២នៅតំបន់អឺរ៉ុបនេះ ទំនងជាចង់សំដៅដល់សហរដ្ឋអាម៉េរិក។ ការវាយតម្លៃបែបនេះ ក៏ដោយសារតែការលើកឡើងបែបនេះកើតមានឡើងក្រោយលោកប្រធានាធិបតី ដូណាល់ ត្រាំ បានរិះគន់បារាំងយ៉ាងចាស់ដៃជុំវិញការសម្រេចចិត្តមិនអនុញ្ញាតឱ្យយន្តហោះយោធាអាម៉េរិកហោះកាត់ដែនអាកាសបារាំង ដើម្បីទៅធ្វើអន្តរាគមន៍ក្នុងជម្លោះនៅមជ្ឈិមបូព៌ា។ លោក ត្រាំ ថែមទាំងបានបង្ហោះសារលើបណ្តាញសង្គមថា ទីក្រុងប៉ារីសគ្មានប្រយោជន៍ទាល់តែសោះនៅក្នុងសង្គ្រាមជាមួយអ៊ីរ៉ង់។
ឆ្លើយតបនឹងបញ្ហានេះលោក ម៉ាក្រុង បានប្រាប់សារព័ត៌មានជប៉ុន NHK ថា បារាំងមិនពាក់ព័ន្ធនឹងយុទ្ធនាការវាយលុកយោធារបស់សហរដ្ឋអាម៉េរិក និងអ៊ីស្រាអែលទៅលើអ៊ីរ៉ង់នោះទេ។ ជាមួយគ្នានេះ លោកបានបញ្ជាក់ពីជំហររួមជាមួយលោកស្រី សាណាអិ តាកាអ៊ិឈិ (Sanae Takaichi) នាយករដ្ឋមន្ត្រីជប៉ុនក្នុងការប្រកាន់ខ្ជាប់នូវច្បាប់អន្តរជាតិ និងសណ្តាប់ធ្នាប់ពិភពលោក ដោយផ្អែកលើធម្មនុញ្ញអង្គការសហប្រជាជាតិ។
លោក ម៉ាក្រុង បានសង្កត់ធ្ងន់ថា នេះហើយជាមូលហេតុដែលបារាំង និងជប៉ុនកំពុងរួមដៃគ្នាតស៊ូមតិ ដើម្បីទាមទារឱ្យមានបទឈប់បាញ់ និងការវិលត្រឡប់ទៅរកសន្តិភាព ជាពិសេសការធានានូវសេរីភាពនាវាចរណ៍នៅច្រកសមុទ្រហ័រមូស ដែលជាសរសៃឈាមសេដ្ឋកិច្ចពិភពលោក៕
ដោយៈ សរ សុជាតិ
