ប្រតិកម្មរបស់សហគមន៍អន្តរជាតិ និងប្រទេសមហាអំណាច ធ្លាក់មកនៅក្រោយ ដែលគេបានឃើញរូបភាពដ៏ឃោរឃៅ និងទិដ្ឋភាពដ៏គួរឲ្យអាណោចអាធ័ម នៅតំបន់ ប៊ូឆា ជាក្រុងតូចមួយនៅក្បែរក្រុងកៀវ ដែលរុស្ស៊ីដកជម្លៀសកងទ័ពចេញ។ នេះបើតាមការចុះផ្សាយដោយសារព័ត៌មានអន្តរជាតិធំៗជាច្រើន។
កាលពីចុងសប្តាហ៍មុននេះ ភាគីអ៊ុយក្រែនបានរកឃើញសាកសពសរុបជាង៤០០សាកសព នៅក្នុងទីប្រជុំជនក្រុងប៊ូឆា ចំងាយជិត ៤០គីឡួម៉ែតពីរដ្ឋធានីកៀវ។ បើតាមអភិបាលក្រុងមួយនេះ យ៉ាងហោចណាស់សាកសពជាង៣០០នាក់ ក្នុងចំណោមនោះ ត្រូវបានសម្លាប់ដោយកងទ័ពរុស្ស៊ី។
ប៉ុន្តែភាគី រុស្ស៊ីបានបដិសេធការចោទប្រកាន់ ដែលថា ទាហានខ្លួនបានសម្លាប់ជនស៊ីវិលនៅ ប៊ូឆា។ រដ្ឋាភិបាលទីក្រុងមូស្គូនិយាយថា គ្មានអ្នកស្រុកណាម្នាក់ទទួលរងគ្រោះពីអំពើហឹង្សាណាមួយពីកងកម្លាំងរុស្ស៊ីទេ ហើយបានចោទប្រកាន់ទីក្រុងកៀវវិញថាបានញុះញង់ និងបំភ្លៃព័ត៌មានសម្រាប់ប្រព័ន្ធផ្សព្វផ្សាយរបស់លោកខាងលិច។
ក្រសួងការពារជាតិរុស្ស៊ីបានចេញមកធ្វើសេចក្តីថ្លែងការណ៍ភ្លាមៗនៅយប់ថ្ងៃអាទិត្យ ទាត់ចោលការចោទប្រកាន់ទាំងនេះដោយបានរៀបរាប់ថា អំឡុងពេលដែលកងទ័ព រុស្ស៊ីនៅកាន់កាប់ក្នុងតំបន់ មិនមានពលរដ្ឋអ៊ុយក្រែនណាម្នាក់រងអំពើហិង្សានោះទេ។ ក្រសួងការពារជាតិរុស្ស៊ីបន្ថែមថា៖ មិនត្រឹមតែមិនបានប្រើអំពើហិង្សាលើពលរដ្ឋនោះទេ រុស្ស៊ីថែមទាំងបានបញ្ជូនស្បៀងអាហារប្រមាណ ៤៥០តោន សម្រាប់ជាជំនួយមនុស្សធម៌ មកក្នុងតំបន់ជុំវិញក្រុងកៀវថែមទៀត។
បើតាមសារព័ត៌មានរ៉យទ័របានចុះផ្សាយដោយស្រង់ប្រភពពីអាជ្ញាធរក្រុងប៊ូឆា ដោយបានអះអាងថា គេប្រទះឃើញសាកសពជនស៊ីវិលមួយចំនួន ត្រូវបានគេចងដៃព័ទ្ធទៅក្រោយ និងមានស្នាមគ្រាប់កំភ្លើងនៅលើក្បាលផងដែរ។
សហគមន៍អន្តរជាតិព្រួតគ្នាថ្កោលទោស និងបន្ថែមទណ្ឌកម្មលើរុស្ស៊ី
ប្រតិកម្មបានធ្លាក់មកជាបន្តបន្ទាប់ពីសហគមន៍អន្តរជាតិ ពិសេសប្រទេសលោកខាងលិច ចាប់តាំងពីពេលដែលរុស្ស៊ីឈានជើងចូលឈ្លានពានអ៊ុយក្រែនមក។ ប៉ុន្ដែ ថ្មីៗនេះ ទណ្ឌកម្មកំពុងត្រូវបានគេរៀបចំដាក់សង្កត់សង្កិនលើទីក្រុងម៉ូស្កូបន្ថែមផងដែរ ក្រោយមានការសម្លាប់ជនស៊ីវិលនៅទីក្រុងប៊ូឆារាប់រយនាក់។
អត្ថបទគួរអាន
សម្រាប់ចក្រភពអង់គ្លេស ឃាតកម្មប្រព្រឹត្តដោយយោធារុស្ស៊ីនេះ ត្រូវបានរដ្ឋមន្ត្រីការបរទេសអង់គ្លេស លោកស្រី លីសទ្រឺស (Liz Truss) បានទាមទារឲ្យតុលាការព្រហ្មទណ្ឌអន្តរជាតិ បើកការស៊ើបអង្កេតចំពោះឧក្រិដ្ឋកម្មសង្គ្រាម។ រដ្ឋមន្ត្រីការបរទេសអាមេរិកឯណោះវិញ គឺលោកអាន់តូនី ប្លីងខេន (Antony Blinken) បានហៅអំពើរបស់ទ័ពរុស្ស៊ីនៅអ៊ុយក្រែនថា ច្បាស់ណាស់វាជាឧក្រិដ្ឋកម្មប្រឆាំងមនុស្សជាតិ និងអាចជាឧក្រិដ្ឋកម្មប្រល័យពូជសាសន៍ផងដែរ។ ដោយឡែកប្រធានាធិបតីបារាំងលោក អេម៉ានូអែល ម៉ាក្រុង(Emmanuel Macron) បានទាមទារឲ្យរដ្ឋអំណាចក្រុងម៉ូស្កូ ត្រូវតែទទួលខុសត្រូវចំពោះឧក្រិដ្ឋកម្មដែលខ្លួនបានប្រព្រឹត្ត។
ក្រៅពីប្រទេសមហាអំណាច ក៏មានដែរតំណាងអង្គការ និងស្ថាប័នធំៗផ្សេងទៀតរួមមាន សហភាពអឺរ៉ុប អង្គការណាតូ និងអង្គការសហប្រជាជាតិ សុទ្ធតែបានថ្កោលទោសរុស្ស៊ីមិនដាច់ពីមាត់នោះទេ។
ប្រធានក្រុមប្រឹក្សាសហភាពអឺរ៉ុបលោក ឆាលមីឆែល(Charles Michel) បរិហារពីភាពឃោរឃៅរបស់រុស្ស៊ី ព្រមទាំងសន្យាថា សហភាពអឺរ៉ុបនឹងប្រមែរប្រមូលភស្តុតាងដាក់ប្តឹងរុស្ស៊ីទៅតុលាការអន្តរជាតិ។ អគ្គលេខាធិការអង្គការណាតូ លោក ចេន ស្តូលេនប៊ឺក(Jens Stoltenberg) ក៏អះអាងថា ទង្វើឃោរឃៅនេះ មិនដែលកើតមាននៅអឺរ៉ុបឡើយនាប៉ុន្មានទសវត្សរ៍ចុងក្រោយនេះ។
ប្រធានអង្គការសហប្រជាជាតិ គឺលោក អង់តូនីញូ ហ្គូទែរ៉េស(Antonio Guterres)ឯណោះវិញក៏បានបង្ហោះសារនៅលើបណ្តាញ Twitter ថាលោកមានក្តីរន្ធត់ចិត្តខ្លាំងណាស់នៅពេលបានឃើញរូបភាពជនស៊ីវិលស្លាប់នៅក្នុងទីក្រុងប៊ូឆា របស់អ៊ុយក្រែននិងបានអំពាវនាវឲ្យស៊ើបអង្កេតដោយឯករាជ្យពីមូលហេតុនាំឲ្យមានហេតុការណ៍នេះកើតឡើង។
ជាមួយគ្នានេះដែរ ប្រទេសអាល្លឺម៉ង់បានចេញមុខមកអះអាងមុនគេថា លោកខាងលិចនឹងយល់ព្រមដាក់ទណ្ឌកម្មបន្ថែមទៀតលើរុស្ស៊ីក្នុងរយៈពេលប៉ុន្មានថ្ងៃខាងមុខនេះ បន្ថែមពីលើសម្ពាធសេដ្ឋកិច្ចដ៏ធំធេង ដែលរុស្ស៊ីកំពុងមាននាពេលបច្ចុប្បន្ន។ អធិការបតីអាល្លឺម៉ង់លោក អូឡាហ្វ ស្កុល(Olaf Scholz) ព្រមានថា លោកពូទីន និងអ្នកគាំទ្ររបស់លោក នឹងទទួលរងផលវិបាកជាងនេះទៀត៕
None
