តើការពង្រីកទីក្រុងហូជីមិញ បានបង្ហាញពីបញ្ហាប្រឈមនៃកំណែទម្រង់រដ្ឋឬយ៉ាងណា?

ទីក្រុងហូជីមិញ បានលេបត្របាក់យកខេត្តចំនួនពីរដែលធ្វើឲ្យទីក្រុងនេះ មានទំហំរីកកាន់តែធំរហូតធ្វើឱ្យអ្នកវិភាគមានចម្ងល់ចំពោះការសម្រេចចិត្តរបស់ថ្នាក់ដឹកនាំវៀតណាម។ អ្នកវិភាគបានវាយតម្លៃថា ការសម្រេចចិត្តរបស់ថ្នាក់ដឹកនាំវៀតណាម លើការពង្រីកដែនដីរដ្ឋបាលរបស់ទីក្រុងនេះ អាចជាការសាកល្បងសម្រាប់កិច្ចខិតខំប្រឹងប្រែងរបស់វៀតណាម ដើម្បីរៀបចំរដ្ឋាភិបាលទាំងមូលឡើងវិញ។

បន្ទាប់ពីខេត្តពីរត្រូវច្របាច់បញ្ចូលគ្នាឱ្យស្ថិតក្រោមការគ្រប់គ្រងរបស់រដ្ឋបាលក្រុងហូជីមិញរួចមក ក្រុមមន្ត្រីវៀតណាម អះអាងថា លំហូរវិនិយោគមកកាន់មជ្ឈមណ្ឌលពាណិជ្ជកម្មដ៏ធំរបស់វៀតណាម ហាក់បង្ហាញពីភាពល្អប្រសើរ ដោយនៅក្នុងរយៈពេល៨ខែ ឆ្នាំ២០២៥ ទីក្រុងនេះទាក់ទាញគម្រោងវិនិយោគមានទំហំរហូតដល់៦,៨ពាន់លានដុល្លារ។ ប៉ុន្តែអាជ្ញាធរមូលដ្ឋានកំពុងជួបបញ្ហាប្រឈមបញ្ហាជាច្រើនលើការរៀបចំ និងគ្រប់គ្រងអចលនទ្រព្យសម្រាប់អភិវឌ្ឍន៍ បញ្ហាបទបញ្ញត្តិ និងកង្វះបុគ្គលិក។

លោក ម៉ាតសូវ ឡូរ៉េ (Matthew Lourey) ប្រធានក្រុមហ៊ុនប្រឹក្សាធុរកិច្ចមួយបានអះអាងថា ប្រតិបត្តិករ និងពាណិជ្ជករនៅវៀតណាមជាច្រើនមិនអាចធ្វើប្រតិបត្តិការតាមគម្រោងអាជីវកម្មរបស់ពួកគេបាននោះទេ ដោយសារពីមុនដំណើរការចុះបញ្ជីពាណិជ្ជកម្មចំណាយពេលតែ៣ថ្ងៃ ប៉ុន្តែនៅពេលនេះពាណិជ្ជករ និងវិនិយោគិនត្រូវចំណាយពេលដល់ទៅ៣សប្តាហ៍៕

ដោយៈ សរ សុជាតិ