ទីផ្សារអគារការិយាល័យនៅហុងកុងនៅតែបន្តធ្លាក់ចុះ ខណៈក្រុមហ៊ុនជាច្រើនរើប្រតិបត្តិការចេញ

ក្រុមហ៊ុន Renaissance ដែលជាក្រុមហ៊ុនអចលនទ្រព្យដ៏ធំមួយនៅលើពិភពលោកបានអះអាងថា នៅក្នុងខែកញ្ញា ឆ្នាំ២០២៤ កន្លងទៅនេះ ទីផ្សារអគារការិយាល័យនៅក្នុងទីក្រុងហុងកុងបាន និងកំពុងប្រឈមមុខនឹងការធ្លាក់ចុះដ៏យូរបំផុត ហើយមកដល់ពេលនេះ អត្រាទំនេរនៅតាមអគារនានាបានកើនឡើងរហូតដល់១៧% ខណៈដែលនៅទីក្រុងសិង្ហបុរីមានត្រឹម៥,១% ហើយនៅទីក្រុងតូក្យូមានត្រឹមតែ៣,៤%ប៉ុណ្ណោះ។ បើតាមសេចក្តីរាយការណ៍បានបង្ហាញថា តម្លៃនៃការជួលអគាការិយាល័យនៅតាមអគាកណ្តាលទីក្រុងនេះបានធ្លាក់ចុះជាង៤០% ដែលនាំឲ្យអ្នកអភិវឌ្ឈន៍អគារថ្មីពីរកន្លែង គឺ Henderson Land និង CK Asset Holdings កំពុងថ្លឹងថ្លែងលើតម្លៃនៃការជួលបន្ថែមទៀតនៅឆ្នាំនេះ។

ក្រុមហ៊ុន Hang Lung Property ដែលជាក្រុមហ៊ុនអភិវឌ្ឍន៍អចលនទ្រព្យដ៏ធំមួយបានប្រកាសថា ខ្លួនកំពុងទទួលរងនូវការខាតបង់ពីរខ្ទង់លើការជួល និងលក់ការិយាល័យនៅកោះហុងកុងក្នុងអំឡុងឆមាសទី១នៃឆ្នាំនេះ ហើយបានសម្រេចចិត្តកែសម្រួលលក្ខខណ្ឌមួយចំនួន។

ជាមួយគ្នានេះ កាលពីខែសីហា កន្លងទៅថ្មីៗនេះ ក្រុមហ៊ុន CK Asset ដែលជាក្រុមហ៊ុនបង្កើតឡើងដោយមហាសេដ្ឋីហុងកុង លី កាស៊ីង ( Li Ka-Shing ) ក៏បានប្រកាសកែសម្រួលតម្លៃនៃការជួលអគារឡើងវិញ ជាពិសេសនៅតាមអគារ ដែលមានយូនីតទំនេរច្រើនផងដែរ។

លោកស្រី គ្រីស្តាល់ ជន (Krystal Chun) ប្រធានផ្នែកហិរញ្ញវត្ថុនៅក្រុមហ៊ុនមួយបានអះអាងថា កាលពីមុនខែកញ្ញា ក្រុមហ៊ុនរបស់លោកស្រីបានជួលការិយាល័យនៅក្នុងអគារមួយកន្លែង ដែលមានទីតាំងនៅកណ្តាលក្រុង ប៉ុន្តែនៅពេលនេះបានផ្លាស់ប្តូរការិយាល័យមកកន្លែងថ្មីដោយមួយខែចំណាយត្រឹមតែ៦ពាន់៤រយដុល្លារប៉ុណ្ណោះ ខណៈកាលពីមុនបន្ទប់ការិយាល័យរបស់ក្រុមហ៊ុននេះមានតម្លៃជាង១ម៉ឺនដុល្លារឯណោះក្នុង១ខែ៕

ដោយៈ សរ សុជាតិ