ទីផ្សារម្រេច

តើតម្លៃម្រេចនៅលើទីផ្សារមានការប្រែប្រួលយ៉ាងណានៅដើមឆ្នាំ២០២៥ នេះ?


ទិន្នផលម្រេចរបស់កម្ពុជា ក៏ដូចជាប្រទេសផ្សេងទៀតនៅឆ្នាំ២០២៤ កន្លងទៅ បានធ្លាក់ចុះ និងពុំមានការផ្គត់ផ្គង់គ្រប់តាមតម្រូវការពីទីផ្សារនោះទេ។ ការធ្លាក់ចុះទិន្នផលដែលបង្កឡើងដោយបញ្ហាអាកាសធាតុក្ដៅនេះបានធ្វើឱ្យតម្លៃម្រេចមានការកើនឡើងជាងមុន។ តើតម្លៃម្រេចនៅលើទីផ្សារមានការប្រែប្រួលយ៉ាងណានៅដើមឆ្នាំ២០២៥ នេះ?
ទីផ្សារម្រេច
ដោយ

លោក ម៉ាក់ នី ប្រធានសហព័ន្ធម្រេច និងគ្រឿងទេសកម្ពុជា បានគូសបញ្ជាក់ថា តម្លៃម្រេចធម្មតានៅដើមឆ្នាំនេះ មានតម្លៃចន្លោះពី២ម៉ឺន៦ពាន់រៀល ដល់២ម៉ឺន៧ពាន់រៀល ក្នុង១គីឡូក្រាម មានការកើនឡើងបន្តិចបើធៀបនឹងឆ្នាំមុន។ ការកើនឡើងតម្លៃម្រេចធម្មតានេះត្រូវបានអ្នកជំនាញរូបនេះអះអាងថា គឺដោយសារតម្រូវការពីទីផ្សារបរទេសមានការកើនឡើង គួបផ្សំទិន្នផលម្រេចកាលពីឆ្នាំ២០២៤ មានការថយចុះ ដែលបង្កឡើងដោយបញ្ហាអាកាសធាតុក្ដៅ។ ទន្ទឹមនេះ លោក ជឿជាក់ថា តម្លៃម្រេចធម្មតានៅក្នុងឆ្នាំនេះអាចនឹងមានស្ថិរភាពល្អជាងឆ្នាំ២០២៤ ផងដែរ។

​លោក កាន់ ស៊ីណុច ប្រធានក្រុមប្រឹក្សាភិបាល សមាគមលើកកម្ពស់ម្រេចកំពត បានគូសបញ្ជាក់ថា មកទល់ពេលនេះ កសិករជាសមាជិកសមាគមពុំទាន់មានការប្រមូលផលម្រេចស្ងួតប្រភេទ GI នៅឡើយទេ ហើយការប្រមូលផលអាចនឹងចាប់ផ្ដើមនៅអំឡុងខែមេសា ខាងមុខ។ បើតាមប្រធានក្រុមប្រឹក្សាភិបាល រូបនេះ បច្ចុប្បន្នមានក្រុមហ៊ុនមួយចំនួនបានប្រមូលទិញម្រេចខ្ចី ដើម្បីកែច្នៃធ្វើម្រេចជ្រក់ និងនាំចេញទៅបរទេស។ បើតាមការអះអាងរបស់លោក កាន់ ស៊ីណុច ម្រេច GI ប្រភេទខ្មៅលក់ចេញក្នុងតម្លៃ១៧ដុល្លារ ម្រេចក្រហម២៧ដុល្លារ និងម្រេចសតម្លៃ២៩ដុល្លារក្នុង១គីឡូក្រាម។ លោកបានសង្កត់ធ្ងន់ថា ទោះបីទីផ្សារម្រេចមានការឡើងថ្លៃបែបណាក៏ដោយ តែម្រេចស្ងួតប្រភេទ GI របស់សមាជិកសមាគមមិនមានការប្រែប្រួលខ្លាំងនោះទេ ព្រោះការទិញលក់រវាងសមាជិកសមាគមជាមួយក្រុមហ៊ុនមានកិច្ចសន្យាច្បាស់លាស់។

​បើតាមការលើកឡើងរបស់លោក ម៉ាក់ នី បច្ចុប្បន្នកម្ពុជាមានចម្ការម្រេចចន្លោះពី៦ពាន់ទៅ៧ពាន់ហិកតា និងអាចទទួលបានទិន្នផលចន្លោះពី១ម៉ឺន៧ពាន់តោន ដល់២ម៉ឺនតោនក្នុង១ឆ្នាំ៕

អត្ថបទ៖ បូ ដូឡា​




អត្ថបទបន្ទាប់


ការផលិតអំបិលរបស់កម្ពុជា ធ្លាក់ចុះជិត២ម៉ឺនតោន នៅ២ខែឆ្នាំនេះ តើមកពីមូលហេតុអ្វី?

ការផលិតអំបិលរបស់កម្ពុជា នៅឆ្នាំនេះ បានបង្ហាញទំនោរធ្លាក់ចុះគួរឱ្យកត់សម្គាល់ តួយ៉ាងនៅ២ខែដំបូងឆ្នាំនេះ កម្ពុជា ផលិតអំបិលបានជាង៧ពាន់២រយត…

តើមានកត្តាអ្វីជំរុញឱ្យអង្គការជំនាញសេដ្ឋកិច្ចដ៏ធំមួយទម្លាក់ការព្យាករកំណើនសេដ្ឋកិច្ចអឺរ៉ុបពី១,៣% មកនៅត្រឹម១% នៅឆ្នាំនេះ?

អង្គការសហប្រតិបតិ្តការ និងអភិវឌ្ឍន៍សេដ្ឋកិច្ច (OECD) បានទម្លាក់ការព្យាករកំណើនសេដ្ឋកិច្ចសម្រាប់តំបន់ចាយប្រាក់អឺរ៉ុប នៅឆ្នាំ២០២៥ ពី១,៣% មកន…
More

Related Stories


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ