ប្រធានាធិបតីអាម៉េរិក លោក ដូណាល់ ត្រាំ បានសម្រេចដំឡើងពន្ធ២៥% លើផលិតផលដែកថែប និងអាលុយមីញ៉ូមនាំចូលទៅកាន់ទីផ្សារសហរដ្ឋអាម៉េរិក ដែលចាប់ផ្តើមអនុវត្តចាប់ពីថ្ងៃទី១២ ខែកុម្ភៈ ដើម្បីលើកទឹកចិត្តអ្នកវិនិយោគ និងផលិតកម្មដែកនៅក្នុងស្រុក និងកាត់បន្ថយការគំរាមកំហែងដល់សន្តិសុខជាតិរបស់សហរដ្ឋអាម៉េរិក។
ប្រទេសជប៉ុន និងកូរ៉េខាងត្បូង ដែលជាអ្នកនាំចេញដែកថែប និងជាសម្ពន្ធមិត្តចាក់ទឹកមិនលិចរបស់សហរដ្ឋអាម៉េរិក ទំនងជាត្រូវទទួលថ្មបាក់ពីការយកពន្ធគយនេះធ្ងន់ធ្ងរជាងគេនៅក្នុងតំបន់អាស៊ី។ ដូច្នេះហើយទើបកាលពីពេលថ្មីៗនេះ ប្រទេសទាំងពីរបានខិតខំប្រឹងឆ្លើយតបចំពោះបញ្ហាពន្ធគយនេះយ៉ាងប្រញាប់ប្រញាល់តែម្ដង។
ជាក់ស្ដែងនាយករដ្ឋមន្ត្រីជប៉ុន លោក ស៊ីហ្គេរូ អ៊ីស៊ីបា (Shigeru Ishiba) បានជួបពិភាក្សាជាមួយលោក ដូណាល់ ត្រាំ នៅសេតវិមានកាលពីចុងសប្តាហ៍មុនជុំវិញការដំឡើងពន្ធ២៥% លើដែកថែប និងអាលុយមីញ៉ូមរបស់អាម៉េរិក។ ទន្ទឹមនឹងនេះ រដ្ឋាភិបាលជប៉ុននឹងពិនិត្យឱ្យបានហ្មត់ចត់អំពីផលប៉ះពាល់លើប្រទេសជប៉ុន និងស្នើឱ្យសហរដ្ឋអាម៉េរិក លើកលែងពន្ធលើផលិតផលដែករបស់ខ្លួន។
ប្រធានខុទ្ទកាល័យនាយករដ្ឋមន្ត្រីជប៉ុន លោក យ៉ូស៊ីម៉ាសា ហាយ៉ាស៊ី (Yoshimasa Hayashi) បានប្រាប់អ្នកសារព័ត៌មានថា ជប៉ុនបានដាក់សំណើសុំលើកលែងពន្ធនេះទៅកាន់រដ្ឋាភិបាលសហរដ្ឋអាម៉េរិករួចហើយតាមរយៈស្ថានទូតជប៉ុន ប្រចាំទីក្រុងវ៉ាស៊ីនតោន កាលពីថ្ងៃអង្គារ សប្តាហ៍នេះ។
ចំណែកប្រទេសកូរ៉េខាងត្បូងវិញ ប្រធានាធិបតី ស្តីទី លោក ឆយ សាងមុក (Choi Sang-mok) កាលពីថ្ងៃទី១២ ខែកុម្ភៈ បានកោះប្រជុំមន្ត្រីរដ្ឋាភិបាលពាក់ព័ន្ធពាណិជ្ជកម្ម ដើម្បីពិភាក្សាអំពីយុទ្ធសាស្ត្រឆ្លើយតបទៅនឹងលក្ខខណ្ឌប្រែប្រួលកាន់តែខ្លាំងឡើងនៅបរទេស។ ក្នុងកិច្ចប្រជុំនោះលោក ឆយ បានសង្កត់ធ្ងន់ពីភាពមិនប្រាកដប្រជានៅក្នុងបរិយាកាសពាណិជ្ជកម្មពិភពលោក ដែលកំពុងកើនឡើងក្រោយការប្រកាសដំឡើងពន្ធលើដែកថែប និងអាលុយមីញ៉ូម និងពន្ធទ្វេភាគីលើប្រទេសជាច្រើនរបស់សហរដ្ឋអាម៉េរិក។
ពាក់ព័ន្ធនឹងបញ្ហាពន្ធនេះ លោក ត្រាំ ក៏បានបង្ហាញពីលទ្ធភាពនៃការចរចាគ្នាដើម្បីបន្ធូរបន្ថយការអនុវត្តពន្ធនេះផងដែរ ប្រសិនបើសហរដ្ឋអាម៉េរិក រកឃើញថា ប្រទេសរងគ្រោះដោយសារពន្ធនេះមានទំនាក់ទំនងសន្តិសុខល្អជាមួយនឹងសហរដ្ឋអាម៉េរិក៕
អត្ថបទ៖ សុខ មង្គល
