ភ្ញៀវទេសចរអន្តរជាតិ ទៅលេងប្រទេសថៃ ធ្លាក់ចុះជាង៧% នៅ៩ខែឆ្នាំនេះ

ទិន្នន័យពីក្រសួងទេសចរណ៍ថៃ បានបង្ហាញថា នៅក្នុងរយៈពេល៩ខែឆ្នាំ២០២៥ ប្រទេសថៃ ទាក់ទាញភ្ញៀវទេសចរបានប្រមាណ២៣លាននាក់ មានធ្លាក់ចុះជាង៧% បើធៀបនឹងរយៈពេលដូចគ្នាកាលពីឆ្នាំមុន ដែលស្រូបទាញភ្ញៀវទេសចរបានប្រមាណ២៥លាននាក់។ ម៉ាឡេស៊ី ជាទីផ្សារទេសចរណ៍ធំបំផុតរបស់ថៃ ដោយនៅក្នុងរយៈពេលនេះមានអ្នកដំណើរជាង៣លាននាក់បានទៅ​កម្សាន្តនៅក្នុងប្រទេសនេះ បន្ទាប់មកចិន មានជាង៣លាននាក់ដូចគ្នា។

ការធ្លាក់ចុះចំនួនភ្ញៀវទេសចររបស់ថៃនេះ ត្រូវបានទាញទម្លាក់ដោយសារការធ្លាក់ចុះចំនួនភ្ញៀវទេសចរចិន ក្រោយពួកគេបារម្ភពីសុវត្ថិភាព អំពើឆបោកតាមអនឡាញ និងការចាប់ជំរិតពលរដ្ឋ ជាពិសេសក្រោយមានការបាញ់ប្រហារនៅកណ្តាលទីក្រុងបាងកក។ ការបង្កជម្លោះព្រំដែនជាមួយកម្ពុជា និងការកែប្រែគោលនយោបាយរបស់ថៃ ក៏ជាកត្តាធ្វើឱ្យចំនួនភ្ញៀវទេសចរទៅកម្សាន្តនៅថៃ ធ្លាក់ចុះផងដែរ។ កាលពីមុនការទៅលេងកម្សាន្តនៅប្រទេសថៃ មានភាពងាយស្រួលដោយមិនចាំបាច់មានទិដ្ឋាការនោះ ប៉ុន្តែថ្មីៗនេះថៃ តម្រូវឱ្យតម្កល់លុយសម្រាប់ទិដ្ឋាការយ៉ាងតិច៦២០ដុល្លារ និងតម្រូវការមួយចំនួនទៀត។

ការធ្លាក់ចុះនេះ បានជំរុញឱ្យទីភ្នាក់ងាររៀបចំផែនការរបស់ថៃ បានបន្ទាបការព្យាករចំនួនភ្ញៀវទេសចរនៅឆ្នាំនេះមកនៅត្រឹម៣៣លាននាក់ ដោយទាបជាងការព្យាករកាលពីលើកមុនដែលរំពឹងទទួលបាន៣៧លាននាក់។ តែយ៉ាងណាថៃ ដាក់គោលដៅទាក់ទាញទេសចរចិន ឱ្យបានយ៉ាងតិច២លាននាក់នៅ៣ខែចុងក្រោយនេះ៕

ដោយ៖ សុខ មង្គល