ការស្ទង់មតិមួយបង្ហាញថា វិនិយោគិនកំពុងងាកចេញពីអាម៉េរិក ទៅវិនិយោគនៅអឺរ៉ុប

របាយការណ៍ស្ទង់មតិរបស់ក្រុមអ្នកវិភាគ ដែលធ្វើឡើងលើអ្នកគ្រប់គ្រងមូលនិធិនៅក្នុងប្រព័ន្ធធនាគារអាម៉េរិក បានបង្ហាញថា អ្នកចូលរួមឆ្លើយ៦០% បានអះអាងថា ក្រុមហ៊ុនវិនិយោគនានា កំពុងដកចិត្តពីអាម៉េរិក បាញ់ឆ្ពោះទៅកាន់តំបន់អឺរ៉ុប ដែលកំពុងមានភាពតានតឹងផ្នែកពាណិជ្ជកម្មជាមួយសហរដ្ឋអាម៉េរិក។

បើយោងតាមលទ្ធផលនៃការស្ទង់មតិ អាល្លឺម៉ង់ដែលជាបងធំរបស់សហភាពអឺរ៉ុប បានក្លាយជាគោលដៅវិនិយោគមានភាពទាក់ទាញជាងគេ ដោយសារប្រទេសនេះ កំពុងបង្កើនការចំណាយយ៉ាងច្រើន ហើយវិស័យការពារជាតិ របស់អាល្លឺម៉ង់ ក៏លេចធ្លោជាងគេក្នុងចំណោមសមាជិកផងដែរ។ កត្តាដែលធ្វើឱ្យគេជឿជាក់ថា អាល្លឺម៉ង់ជាស្នូលនៃកំណើនរបស់អឺរ៉ុប ដោយសារស្ថានភាពទីផ្សារភាគហ៊ុននៅអាល្លឺម៉ង់ នៅតែមានភាពល្អប្រសើរ។

ការងាកចេញពីអាម៉េរិក ទៅកាន់តំបន់អឺរ៉ុបនេះ គឺដោយសារវិនិយោគិនភាគច្រើនមានការព្រួយបារម្ភកាន់តែខ្លាំងឡើងចំពោះ​ទស្សនវិស័យសេដ្ឋកិច្ចរបស់អាម៉េរិក ក្នុងនោះវិនិយោគិន៨៣% រំពឹងថា កំណើនរបស់សហរដ្ឋអាម៉េរិកនឹងថយចុះ ខណៈអ្នកវិនិយោគ៦០% រំពឹងថា អឺរ៉ុបនឹងទទួលបានកំណើនកាន់តែខ្លាំងនៅឆ្នាំក្រោយ៕

ដោយៈ សរ សុជាតិ