រដ្ឋមន្ត្រីការពារជាតិ អ៊ីស្រាអែល លោក អ៊ីស្រាអែល ខាត បានបញ្ជាឱ្យបើកការវាយប្រហារយោធាជាថ្មីទៅលើទីក្រុងតេហេរ៉ង់ ដោយសំដៅលើគោលដៅរដ្ឋាភិបាល និងហេដ្ឋារចនាសម្ព័ន្ធភេវរកម្ម ហើយបានថ្កោលទោសការវាយប្រហារដោយកាំជ្រួចមីស៊ីលរបស់អ៊ីរ៉ង់មកលើអ៊ីស្រាអែលថា ជាការបំពានយ៉ាងច្បាស់ក្រឡែតលើបទឈប់បាញ់រយៈពេល១២ថ្ងៃ ដែលសម្របសម្រួលដោយប្រធានាធិបតី ដូណាល់ ត្រាំ។ ចំណែកឯយោធាអ៊ីស្រាអែល ឯណោះវិញបានបញ្ជាក់ថា ខ្លួនកំពុងស្ទាក់ចាប់កាំជ្រួចមីស៊ីល ដែលអ៊ីរ៉ង់ បានបាញ់ស្រោចមកលើទឹកដីអ៊ីស្រាអែល។
អ៊ីស្រាអែល បានប្រកាសថា ខ្លួននឹងផ្អាកការវាយប្រហារបន្ទាប់ពីសម្រេចបានគោលដៅយោធារបស់ខ្លួននៅក្នុងយុទ្ធនាការយោធា ដែលបានចាប់ផ្តើមកាលពីថ្ងៃទី១៣ ខែមិថុនា។ ទន្ទឹមនេះ អ៊ីរ៉ង់បាននិយាយថា ខ្លួននឹងបញ្ឈប់ការសងសឹក ប្រសិនបើអ៊ីស្រាអែលបញ្ឈប់ការទម្លាក់គ្រាប់បែករបស់ខ្លួន។
នាយករដ្ឋមន្ត្រីអ៊ីស្រាអែល លោក បេនចាមីន នេតាន់យ៉ាហ៊ូ (Benjamin Netanyahu) បាននិយាយថា បទឈប់បាញ់នេះ ត្រូវបានសម្របសម្រួលដោយប្រធានាធិបតី ដូណាល់ ត្រាំ ហើយបានថ្លែងអំណរគុណដល់សហរដ្ឋអាម៉េរិក សម្រាប់ការគាំទ្រខ្លួន។
រដ្ឋមន្ត្រីការបរទេសអ៊ីរ៉ង់ លោក អេបេស អេរ៉ាក់ឈី (Abbas Araqchi) នៅមុននេះ បានយល់ព្រមផ្អាកការវាយបករបស់អ៊ីរ៉ង់ ប្រសិនបើអ៊ីស្រាអែល បញ្ចប់ការវាយប្រហារនៅត្រឹមយប់នេះម៉ោង៤ទៀបភ្លឺម៉ោងនៅក្រុងតេហេរ៉ង់។
លោក ដូណាល់ ត្រាំ បានសរសេរបង្ហោះលើបណ្ដាញទំនាក់ទំនងសង្គមថា បទឈប់បាញ់ពេលនេះបានចូលជាធរមានហើយ ហាមបំពានបទឈប់បាញ់នេះឱ្យសោះ៕
ដោយ: តែម សុខុម
