ជប៉ុន ស្វែងរកការរម្ងាប់ជម្លោះការទូតជាមួយចិន ពាក់ព័ន្ធនឹងបញ្ហានៅតៃវ៉ាន់

នៅប៉ុន្មានថ្ងៃចុងក្រោយនេះ ប្រទេសក្បែរខាងជប៉ុន និងចិន បានផ្ទុះជម្លោះការទូតយ៉ាងខ្លាំង ក្រោយនាយករដ្ឋមន្ត្រីជប៉ុន លោកស្រី សាណាអិ តាកាអ៊ិឈិ (Sanae Takaichi) បានប្រាប់សមាជិកសភាជប៉ុន នៅដើមខែវិច្ឆិកា នេះថា ការវាយប្រហាររបស់ចិន លើកោះតៃវ៉ាន់ អាចគំរាមកំហែងដល់ការរស់រានមានជីវិតរបស់ជប៉ុន និងអាចបង្កឱ្យមានការឆ្លើយតបខាងយោធា។ ការលើកឡើងនេះ បានធ្វើឱ្យទីក្រុងប៉េកាំង ខឹងសម្បារយ៉ាងខ្លាំង និងបានប្រាប់ពលរដ្ឋចិន កុំឱ្យទៅលេងប្រទេសជប៉ុន ដែលបង្កើនការព្រួយបារម្ភថា ក្រុមហ៊ុនទេសចរណ៍នៅជប៉ុននឹងជួបបញ្ហាការធ្លាក់ចុះអាជីវកម្មមួយចំនួន។

ទោះយ៉ាងណា ពេលនេះ ប្រទេសជប៉ុន កំពុងស្វែងរកការរម្ងាប់ជម្លោះការទូតនេះ ដោយជប៉ុនគ្រោងបញ្ជូនលោក ម៉ាសាអាគិ កាណៃ (Masaaki Kanai) អ្នកការទូតជាន់ខ្ពស់ម្នាក់នៅក្រសួងការបរទេសជប៉ុន ទៅកាន់ប្រទេសចិន ដើម្បីជួបជាមួយសមភាគីចិន លោក លីវ ជីន សុង (Liu Jinsong) នៅសប្ដាហ៍នេះ។

លោក កាណៃ ត្រូវបានគេរំពឹងថា នឹងបកស្រាយនូវអ្វីដែលលោកស្រី តាកាអ៊ិឈិ បាននិយាយពាក់ព័ន្ធនឹងបញ្ហានៅកោះតៃវ៉ាន់ ដោយមិនបង្ហាញពីការផ្លាស់ប្តូរគោលនយោបាយយោធារបស់ជប៉ុន នោះទេ ដើម្បីជំរុញឱ្យចិន ចៀសវាងធ្វើសកម្មភាពណាមួយដែលធ្វើឱ្យខូចចំណងមិត្តភាពទ្វេភាគី។

ប្រធានាធិបតីតៃវ៉ាន់ លោក ឡៃ ឈីងតេ (Lai Ching-te) បានប្រាប់អ្នកយកព័ត៌មាននៅទីក្រុងតៃប៉ិថា ចិន កំពុងវាយប្រហារលើប្រទេសជប៉ុន ហើយលោកស្នើដល់សហគមន៍អន្តរជាតិ ឱ្យ​យកចិត្តទុកដាក់លើបញ្ហានេះ និងជំរុញឱ្យចិន អនុវត្តការអត់ធ្មត់ និងបង្ហាញអាកប្បកិរិយាឱ្យស័ក្ដិសមជាមហាអំណាច ជាជាងធ្វើជាអ្នកបង្កបញ្ហាសម្រាប់សន្តិភាព និងស្ថិរភាពក្នុងតំបន់៕

ដោយ៖ សុខ មង្គល