ក្រោយការចុះចេញពីតំណែងរបស់លោក ម៉ូយីឌីន មានអ្នកលេងបណ្តាញសង្គមជាច្រើន បានបង្កើតការបោះឆ្នោតតាមអនឡាញក្រៅផ្លូវការនានា ដើម្បីបង្ហាញពីការគាំទ្ររបស់ពួកគេលើបេក្ខភាពនាយរដ្ឋមន្ត្រីថ្មី។
ប៉ុន្តែបើតាមរដ្ឋធម្មនុញ្ញម៉ាឡេស៊ី មានតែស្តេចស៊ុលតង់មួយអង្គគត់ ដែលមានសិទ្ធិសម្រេចជ្រើសរើសយកបេក្ខភាពនាយករដ្ឋមន្ត្រីមួយរូប ដែលទ្រង់ជឿជាក់ថា អាចទទួលបានការគាំទ្រភាគច្រើននៅក្នុងរដ្ឋសភាពក្នុងកាលទេសៈបែបនេះ។
អត្ថបទទាក់ទង
យ៉ាងណាមិញ នេះមិនមែនជាលក្ខណៈវិនិច្ឆ័យតែមួយនោះទេ លក្ខណៈវិនិច្ឆ័យផ្សេងទៀតសម្រាប់នាយករដ្ឋមន្ត្រី ដែលមិនបានចែងនៅក្នុងរដ្ឋធម្មនុញ្ញ គឺសំដៅដល់បុគ្គលនោះ គួរតែមានសមត្ថភាព និង ភាពស្ញប់ស្ញែងខ្ពស់ ព្រោះគេត្រូវការនាយករដ្ឋមន្ត្រីថ្មី ដើម្បីអាចមកចាត់វិធានការដោះស្រាយវិបត្តិកូវីដ១៩ ដែលម៉ាឡេស៊ីកំពុងជួបប្រទះធ្ងន់ធ្ងរពេលនេះ។
បើតាមប្រភពដែលជិតស្និទនឹងសារព័ត៌មានជប៉ុន Nikkei របស់ជប៉ុនបានឲ្យដឹងថា យ៉ាងហោចណាស់មានបេក្ខភាពនាយករដ្ឋមន្ត្រី ៤រូប ដែលទំនងជាបេក្ខភាពប្រកួតប្រជែងខ្លាំងជាងគេ ចំពោះការស្នងតំណែងជានាយករដ្ឋមន្ត្រី បន្តពីលោក ម៉ូយីឌីន។
ទី១ គឺលោក អាសមីល សាប្រ៊ី យ៉ាកុប
បច្ចុប្បន្ន លោកអាសមីល សាប្រ៊ី យ៉ាកុប (Ismail Sabri Yaakob) កំពុងស្ថិតក្នុងតំណែងជាឧបនាយករដ្ឋមន្ត្រី។ លោកត្រូវបានគេប្រាប់ឲ្យដឹងថា ជាបេក្ខភាពឈានមុខគេមួយសម្រាប់តំណែងជានាយករដ្ឋមន្ត្រី ទៅតាមឋានានុក្រម។
ក្នុងវ័យ ៦១ឆ្នាំ លោកអាសមីល មានសញ្ញាបត្រជំនាញផ្នែកច្បាប់ ដោយលោកបានចាប់ផ្តើមអាជីពជាអ្នកនយោបាយ ដោយបម្រើការជារដ្ឋមន្ត្រីយុវជននិងកីឡា នៅឆ្នាំ២០០៨។ រហូតឆ្នាំ២០១៨ដល់ឆ្នាំ២០២០ លោកមានតួនាទីជារដ្ឋមន្ត្រីនៃរដ្ឋសហព័ន្ធម៉ាឡេស៊ី និងបច្ចុប្បន្នជាឧបនាយករដ្ឋមន្ត្រី។
លោក អាសមីល សាប្រ៊ី យ៉ាកុប
ចំណែកឯ បេក្ខភាពនាយករដ្ឋមន្ត្រីទី២ គឺលោក អានវ៉ា អ៊ីប្រាហីម
លោកអាន់វ៉ា អ៊ីប្រាហីម ជាអ្នកនយោបាយចាស់វស្សាមួយរូប ដែលតែងឈរឈ្មោះបេក្ខភាពនាយករដ្ឋមន្ត្រីតាំងតែពីឆ្នាំ ១៩៩៨មក ហើយនេះជាលើកទី៤សម្រាប់លោកហើយ ក្នុងការប្រជែងកៅអីក្បាលម៉ាស៊ីនរដ្ឋាភិបាលមួយនេះ។
លោក អាន់វ៉ា អ៊ីប្រាហីម ធ្លាប់កាន់តំណែងជា ឧបនាយករដ្ឋមន្ត្រីក្រោមអាណត្តិរបស់អតីតនាយករដ្ឋមន្ត្រី មហាធៀរ ពីឆ្នាំ ១៩៩៣ដល១៩៩៨។ លោក អាន់វ៉ា មានប្រវត្តិរូបការងារខ្ពស់ ប៉ុន្តែជីវិតឯកជនរបស់លោក ក៏មានភាពច្របូកច្របល់ណាស់ដែរ ដោយលោកធ្លាប់មានរឿងអាស្រូវផ្លូវភេទ និងពុករលួយរំលោភអំណាច ហើយក៏ធ្លាប់ជាប់ពន្ធនាគារផងដែរ។
លោក អានវ៉ា អ៊ីប្រាហីម
ដោយឡែកបេក្ខភាពនាយករដ្ឋមន្ត្រីម៉ាឡេស៊ីទី៣ គឺលោក តេងគូ រ៉ាហ្សាហាមហ្សា
លោកតេងគូ រ៉ាហ្សាហាមហ្សា (Tengku Razaleigh Hamzah) ជាអ្នកនយោបាយចាស់វស្សាជាងគេបំផុត ពោលបច្ចុប្បន្នលោកកំពុងមានតំណែងជាសមាជិកសភា ហើយលោកតេងគូ បានកាន់តំណែងនេះចំនួន ១១អាណត្តិជាប់ៗគ្នាមកហើយ។
ក្នុងវ័យ៨៤ឆ្នាំ លោគ តេងគូ ចាប់ផ្តើមជីវិតជាអ្នកនយោបាយ កាលពីឆ្នាំ១៩៧៦ ក្នុងតំណែងជារដ្ឋមន្ត្រីហិរញ្ញវត្ថុ ក្រោយមកនៅឆ្នាំ ១៩៨៤ លោកត្រូវបានគេប្ដូរមកជារដ្ឋមន្ត្រីពាណិជ្ជកម្មវិញ។
ទោះក្នុងវ័យចាស់ជរាបន្តិចមែន ប៉ុន្តែលោកតេងគូ ត្រូវបានគេមើលឃើញថា អាចជាបេក្ខភាពសំខាន់មួយរូបសម្រាប់តំណែងជានាយករដ្ឋមន្ត្រីដោយសារតែលោកជិតស្និទនឹងស្តេចស៊ុលតង់ ដែលជារឿយៗលោកត្រូវបានមហាក្សត្រកោះហៅឲ្យផ្តល់ជាយោបល់ និងបទពិសោធន៍នយោបាយនានាដល់ទ្រង់ផងដែរ។
លោក តេងគូ រ៉ាហ្សាហាមហ្សា
ឥឡូវនេះយើងមកមើលបេក្ខភាពនាយករដ្ឋមន្ត្រីម៉ាឡេស៊ីទី៤ ចុងក្រោយនេះ គឺលោក ហីសាម៉ូឌីន ហ៊ូសេន
លោក ហីសាម៉ូឌីន ហ៊ូសេន (Hishammuddin Hussein) ជាអ្នកនយោបាយដែលមានប្រវត្តិរូបល្អមួយរូប។ លោកចាប់ផ្តើមជីវិតនយោបាយតាំងពីវ័យ៣៤ឆ្នាំ ដោយបម្រើការជាសមាជិកសភា ក្នុងឆ្នាំ១៩៩៥ ក្រោយមកធ្វើជារដ្ឋមន្ត្រីយុវជននិងកីឡានៅឆ្នាំ១៩៩៩។
បច្ចុប្បន្នក្នុងវ័យ ៦០ឆ្នាំ លោក ម៉ូឌីន ត្រូវបានគេមើលឃើញថា ជាឥស្សរជនជាន់ខ្ពស់មួយរូប ដែលមិនចេះឈ្លោះប្រកែកគ្នាច្រើន និងអាចបង្រួបបង្រួមគណបក្សនិងប្រទេសម៉ាឡេស៊ីជាធ្លុងមួយបាន។
លោកក៏ជាអ្នកនយោបាយដ៏មានបទពិសោធន៍មួយរូបផងដែរ ដោយសារតែលោកធ្លាប់កាន់ការក្នុងមុខតំណែងជាច្រើនដូចជារដ្ឋមន្ត្រីការបរទេស រដ្ឋមន្ត្រីការពារជាតិ និងរដ្ឋមន្ត្រីក្រសួងអប់រំផងដែរ។
លោក ហីសាម៉ូឌីន ហ៊ូសេន
សូមបញ្ជាក់ថា នាយករដ្ឋមន្ត្រីថ្មីដែលនឹងត្រូវជ្រើសតាំងនេះ ត្រូវបានគេមើលឃើញថា នឹងត្រូវចូលខ្លួនមកដោះស្រាយបញ្ហាធំៗចំនួន២ គឺទី១ទាក់ទងនឹងបញ្ហាគ្រប់គ្រងការឆ្លងរាលដាលកូវីដ-១៩ ដែលកំពុងធ្វើឲ្យម៉ាឡេស៊ីកាន់តែដុនដាប និង បញ្ហាស្ដារសេដ្ឋកិច្ចឡើងវិញពីវិបត្តិកូវីដ-១៩៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
