ទិន្នន័យបឋមបានបង្ហាញថា ពលករជាជនអន្តោប្រវេសន៍ប្រមាណ១,២លាននាក់ ត្រូវបានជម្រុះក្រោមគោលនយោបាយរឹតបន្តឹងជនអន្តោប្រវេសន៍របស់លោក ដូណាល់ ត្រាំ ដែលកំពុងធ្វើឱ្យវិស័យមួយចំនួន ជាពិសេសវិស័យកសិកម្មប្រឈមនឹងខ្វះកម្លាំងពលកម្ម។ លោកស្រី ស្តេហ្វានី ក្រាម័រ (Stephanie Kramer) អ្នកប្រឹក្សាផ្នែកការងារ១រូបបាននិយាយថា ជនអន្តោប្រវេសន៍មានចំនួនជិត២០% នៃកម្លាំងការងារសរុបនៅសហរដ្ឋអាម៉េរិក ដោយនៅក្នុងវិស័យកសិកម្ម ពលករជាជនអន្តោប្រវេសន៍បានរួមចំណែកប្រមាណ៤៥% សំណង់៣០% និងផ្នែកសេវាកម្ម២៤%។
ការជម្រុះជនអន្តោប្រវេសន៍ចេញពីបញ្ជីការងារនេះ កំពុងធ្វើឱ្យកសិករអាម៉េរិក មានការព្រួយបារម្ភពីកង្វះខាតកម្មករប្រមូលផល ខណៈចម្ការពោត និងកប្បាសរបស់ពួកគេជិតដល់រដូវប្រមូលផល។ បន្ថែមលើនេះដំណាំក្រូច ផ្លែបឺរ និងកាហ្វេ នៅរដ្ឋកាលីហ្វ័រញ៉ា ក៏កំពុងជួបបញ្ហានេះដែរ។ ក្រៅពីវិស័យកសិកម្ម វិស័យសំណង់ ក៏កំពុងប្រឈមមុខនឹងខ្វះកម្មករផងដែរ។
លោកស្រី អេលីហ្សាបេត រ៉ូឌ្រីហ្គេ (Elizabeth Rodriguez) កសិករមួយរូបបានអះអាងថា កាលពីខែឧសភា ចម្ការឪឡឹក និងត្រសក់ស្រូវរបស់ខ្លួនបានរងគ្រោះម្តងហើយ ដោយសារខ្វះពលករប្រមូលផល ដែលធ្វើឱ្យផលឪឡឹក និងត្រសក់ស្រូវជាច្រើនត្រូវទុករលួយចោល៕
ដោយៈ សរ សុជាតិ
